Atska nacionkuna pukllayanqan futbolqa, ¿rasumpaku yanapakun nunakuna mas unïdu kayänampaq? | ¿Ima nintan Bibliachö?

Copa Mundial de la FIFA niyanqan pukllataqa 5.000 millon nunakunapitapis masshi rikäyanqa. Tsë pukllataqa 2022 watachömi 20 de noviembripita 18 de diciembriyaq pukllayanqa. Kënö pukllakunaqa llapan nunakuna mas unïdu kayänampaq yanapakunqantam pïmë niyan.

• Sudafricachö unë presidenti Nelson Mandëlam kënö nirqan: “Pukllakunaqa imapitapis masmi nunakunata yanapëta puëdin mas kushishqa y mas unïdu kayänampaq”.

• FIFA niyanqampa presidentin Gianni Infantïnunam kënö nirqan: “Futbolqa [...] juk yarpëyoqlla kanapaq; llapantsik juntu kushishqa kanapaq, imanö sientikunqantsikta rikätsikunapaq, kuyanakunapaq y juknölla kanapaqmi yanapakun”.a

Atska nacionkuna pukllayanqan futbol, y juk pukllakuna, ¿puëdinku nunakunata yanapëta mas kuyanakuyänampaq y juknölla kayänampaq? ¿Imëllapis llapantsik kuyanakur, shumaq y yamë kawakushuntsuraq?

¿Yanapakunku nunakuna mas unïdu kayänampaq?

Kë wata atska nacionkuna pukllayanqan futbolchöqa, pïmë nunakunam discutir qallayashqa nunakunapa derëchunkunapaq, juk color nunakunata imanir chikiyanqampaq y imanir wakinlla rïcu kayanqampaq.

Tsënö kaptimpis, pïmëmi niyan atska nacionkuna pukllayanqan pukllakunaqa, nunakuna mas kushishqa y unïdu kayänampaq yanapakunqanta. Peru nunakuna tsëta munayaptimpis, tsë pukllakunachöqa, juk rätullam nunakuna kushishqa kariyan. Peru tsëpitaqa, imachöpis mana acuerdu kayanqankunapaq discutirmi mas chikinakur ushayan. Bibliachöqa willakushqanam karqan, “ushanan tiempuchöqa” nunakuna mas mana alli portakuyänampaq kaqta y imachöpis acuerdu këta mana munayänampaq kaqta (2 Timoteu 3:1-5).

Llapantsik unïdu kanapaq ima yanapamänapaq kaq

Bibliachöqa willakunmi llapantsik unïdu kanapaq ima yanapamänapaq kaqta. Entëru munduta juk gobiernulla gobernamuptin llapantsik shumaq kawakunapaq kaqtam Bibliachöqa willakun, y tsë gobiernuqa ‘Diospa Gobiernunmi’ (Lücas 4:43; Mateu 6:10).

Tsë Gobiernuchö mandakoqqa Señor Jesucristum. Pë gobernamuptinmi entëru Patsachö yamë kawakuy kanqa. Bibliachömi kënö nin:

• “Pë gobernaptinqa, alli nunakunaqa shumaq wëtëkaq plantanömi kayanqa, [...] alli kawakuyanqanqa [manam] imëpis ushakanqatsu” (Salmus 72:7).

• “Pëmi salvanampaq mañakoq waktsakunata [...] sufritseqninkunapita y maqaqninkunapita salvanqa” (Salmus 72:12, 14).

Kanan tiempupis, Señor Jesus yachatsikunqankunaqa 239 nacionkunapitapis maschö nunakunatam yanapashqa chikinakuyänampa rantin shumaq kawakuyänampaq. Tsëpaq masllata musyëta munarqa, “Ama chikikoq kashuntsu” neqchö llapan yarqamoqta leyi.