¿Imanirtan polïticarëkur nunakuna alläpa chikinakuyan? | ¿Ima nintan Bibliachö?

Mëtsë nacionkunachömi nunakunaqa polïticarëkur imëpitapis mas chikinakur qallëkuyashqa. Centro de investigación Pew Research Center niyanqanchö trabajaqkuna encuestata rurarnin “19 nacionkunachö nunakunata tapuyaptinmi, cada 100 nunakunapita 65 kaqqa niyan jukläya jukläya partïduta yanapar nunakuna alläpa chikinakuyanqanta y wakinqa wanuypa chikinakuyanqanta”.

¿Qampa markëkichöpis allipaku polïticarëkur nunakuna chikinakuyan? ¿Musyankiku imanir tsënö pasanqanta? ¿Imëllapis tsë problëma ushakanqatsuraq? Bibliachö ima ninqanta këchö yachakuy.

¿Imanirtan nunakuna chikinakuyan?

Bibliachöqa unënam willakushqa karqan “ushanan tiempuchöqa“ nunakuna mas mana alli tikrayänampaq kaqta. Kënömi nirqan:

• “Ushanan tiempuchöqa alläpa mana alli y mana aguantëpaqnö tiempukunam kanqa. Nunakunam kayanqa kikinkunallata kuyakoq, [...] manam acuerduman chëta munayanqatsu” (2 Timoteu 3:1-3).

Gobernaqkuna y gobiernuchö trabajaqkunaqa, allita rurëta munarpis manam puëdiyantsu nunakunata sufritseq problëmakunata altsëta ni ushakätsita. Mëläya kallpachakurpis, jukläya jukläya pensarmi puëdiyantsu shumaq juntu trabajëta y problëmakunata altsëta. Tsëchömi rikantsik Bibliachö kënö ninqan rasumpa kanqanta:

• “Nunaqa, nuna mayinta dominarpis kikinllam mana allichö ushan” (Eclesiastes 8:9).

Tsënö kaptimpis, tsë problëma altsakänampaq kaqtam Bibliachöqa nin: nunakunata sufritseq problëmakunata juk alli gobiernu y juk alli gobernanti ushakätsinampaq kaqtam willakun.

Juk alli gobernantiqa nunakunapaqmi yarpachakun

Bibliachöqa juk alli gobernantipaqmi parlan. Tsë gobernantiqa puëdinmi llapan problëmakunata ushakätsita. Tsë gobernantiqa Señor Jesucristum. Pëqa puëdinmi y munanmi nunakuna alli y yamë kawakuyänampaq yanapakuyta. Pëpaqmi Bibliachö kënö nin:

• “Pë gobernaptinqa, alli nunakunaqa shumaq wëtëkaq plantanömi kayanqa, imanömi killa imëpis ushakantsu, tsënömi alli kawakuyanqanqa imëpis ushakanqatsu” (Salmus 72:7).

• “Mëtsë nacionchö nunakunam sirweqnin kayanqa” (Salmus 72:11).

Jesusnö alli gobernantiqa manam ni pipis kantsu. Pëqa rasumpam nunakunata yanapëta munan alli y kushishqa kawakuyänampaq, y masqa sufreqkunatam yanapëta munan. Bibliachömi kënö nin:

• “Pëmi salvanampaq mañakoq waktsakunata, humildikunata y yanapayänanta munar qayakoqkunata salvanqa. Pëqa waktsakunata y humildikunatam llakipanqa, y waktsakunatam salvanqa. Pëkunapa vïdanta alläpa valorarmi sufritseqninkunapita y maqaqninkunapita salvanqa” (Salmus 72:12-14).

Jesusqa Diospa Gobiernunchö Mandakoqmi. Tsë Gobiernu imanö yanapashunëkipaq kaqta y tsë Gobiernuta imanö yanapanëkipaq kaqta yachakuy.

• ¿Imataq Diospa Gobiernun? neq videuta rikë.

• “El Reino de Dios: un gobierno sin corrupción” neqta leyi.