Jehoväpa testïgunkunata y mëtsika nunakunata wanutsiyanqan | ¿Ima nintan Bibliachö?

2023 wata 27 de enëru junaqmi, Día Internacional en Memoria del Holocausto niyanqanta mëtsikaq nunakuna celebrayanqa. Imëka mana allikunata rurayanqampita 75 watapitapis masna pasashqa kaptimpis, capazchi ¿imanirtan tsëta rurayänanta Teyta Dios permitirqan? nir tapukunki.

• Bibliachö tsëpaq willakunqampita masta musyëta munarqa, “¿Imanirtan mëtsika judïukunata wanutsiyarqan? ¿Imanirtan tsëta rurayänanta Dios micharqantsu?” neqchö willakunqanta leyiri.

Mëtsikaq nunakunata wanutsiyanqanchöqa, judïukunatam alläpa sufritsiyarqan y mëtsikaqtam wanutsiyarqan. Juk grüpupita nunakunatapis, imëkata rurarmi sufritsiyarqan y wanutsiyarqan. Tsë grüpuchömi Jehoväpa testïgunkunapis këkäyarqan. Pëkunataqa Bibliachö ninqanman creiyanqanrëkurmi imëkata rurar sufritsiyarqan.

• Tsëpaq masta musyëta munarqa, “¿Qué les ocurrió a los testigos de Jehová durante el Holocausto?” neqchö willakunqanta leyiri.

‘Imapis alliyänampaq kaqman confiakuyänëkita y shumaq kawakuyänëkitam munä’

Mëtsikaq nunakunata wanutsiyanqannö yapë pasanantaqa, atskaq nunakunam mantsayan. Peru Bibliachöqa willakun, yapëqa manana tsënö pasanampaq kaqtam. Tsëta musyanqantsikqa, mana alläpa yarpachakunapaqmi yanapamantsik.

• “Teyta Jehoväqa kënöpis ninmi: ‘Noqaqa allim musyä qamkunapaq munanqäta. Noqaqa mana allikunapa pasayänëkipa rantin yamë kayänëkita, imapis mas allina kanampaq kaqman confiakuyänëkita y shamoq tiempuchö shumaq kawakuyänëkitam munä’” (Jeremïas 29:11).a

Imëka mana allikunata ushakätsirnin y mana alli nunakuna rurayanqanta ushakätsirmi, Teyta Jehoväqa Bibliachö änikunqanta cumplinqa. Ichikllachönam Teyta Diosqa këkunata y maskunata ruranqa:

• Jukkunata mana allita ruraq nunakunatam ushakätsinqa (Proverbius 2:22).

• Imëkata sufrishqa kaqkunatam, mas allina sientikuyänampaq yanapanqa (Apocalipsis 21:4).

• Wanushqa kaqkunatam kë Patsachö kawayänampaq kawaritsimunqa (Juan 5:28, 29).

Bibliachö tsëkunata änikunqanmanqa confiakuyta puëdinkim. Imanir confiakunëkipaq kaqta musyëta munaptikiqa, Jehoväpa testïgunkunawan Bibliapita yachakunëkipaqmi niriyaq.