¿Imanirtan mëtsika judïukunata wanutsiyarqan? ¿Imanirtan tsëta rurayänanta Dios micharqantsu?
Familiankuna wanushqa kaptinmi, mëtsikaq nunakuna tsënö tapukuyashqa. Manam wanushqa familiankunata imanir tsë desgracia pasanqanta musyëta munarllatsu, sinöqa shoqashqa këta munarmi. Wakin nunakunam niyan, mëtsika judïukunata wanutsiyanqanqa alläpa mana alli kanqanta, y Teyta Dios rasumpa kawarqa imanir tsëta permitinqanta.
Mëtsika judïukunata wanutsiyanqampaq y Diospaq mana rasumpa kaqta niyanqan
Mana rasumpa kaq: Mëtsika judïukunata wanutsiyänanta Teyta Dios imanir permitinqanta tapukuyqa jutsam.
Rasumpa kaq: Diosman markäkoq o yärakoq mëtsikaq nunakunam, mana allikuna kananta imanir permitinqanta tapukuyashqa. Këllaman pensarishun, Habacucmi Teyta Diosta kënö tapurqan: “¿Imanirtan imëka mana allikunata rikätsimanki? ¿Imanirtan wakinkunata mana alli tratayänanta permitinki?” (Habacuc 1:3). Habacucta qayapänampa rantinmi, Teyta Diosqa tapukunqanta Palabran Bibliaman qellqayänanta permitirqan, tsënöpa llapan nunakuna yachakunampaq.
Mana rasumpa kaq: Sufreqta rikämarnintsikpis, Teyta Diosqa manam llakipämantsiktsu.
Rasumpa kaq: Mana allikunata rurayanqanta y sufriyanqanta rikëqa, manam Teyta Diosta gustantsu (Proverbius 6:16-19). Bibliachömi willakun, Noë kawanqan witsan nunakuna mana allikunata rurayanqanta rikarnin, Teyta Dios ‘shonqunchö nanatsikunqanta’ (Genesis 6:5, 6). Mëtsika judïukunata wanutsiyanqanta rikarpis, Teyta Diosqa alläpachi llakikurqan (Malaquïas 3:6).
Mana rasumpa kaq: Mëtsika judïukunata wanutsiyanqanqa Diospa castïgunmi karqan.
Rasumpa kaq: Punta cristiänukuna kawayanqan witsanmi, Röma soldädukuna unë Jerusalen markata ushakätsiyarqan, y Diosnintsikqa permitirqanmi (Mateu 23:37–24:2). Peru tsë tiempupitaqa, manam ima kasta nunakunatapis mas allitanöqa rikashqatsu ni castigashqatsu. Teyta Diospaqqa, “judïu nunakunawan griëgu nunakunaqa manam imachöpis jukläyatsu kayan” (Romänus 10:12).
Mana rasumpa kaq: Alläpa puëdeq Dios kuyakoq karqa, manam permitinmantsu karqan mëtsika judïukunata wanutsiyänanta.
Rasumpa kaq: Teyta Diosqa manam sufrinqantsikpita culpayoqtsu, tsënö kaptimpis höraqa juk tiempupam sufrinantsikta permitin (Santiägu 1:13; 5:11).
¿Imanirtan mëtsika judïukunata wanutsiyänanta Teyta Dios permitirqan?
Teyta Diosqa unëpitam sufrinantsikta permitishqa, pï mas alli gobernaq kanqanta musyanapaq. Bibliachöqa clärum willamantsik kë mundutaqa Diablu gobernëkanqanta, y manam Teyta Diostsu (Lücas 4:1, 2, 6; Juan 12:31). Bibliachö ninqampita ishkëta yachakunqantsikmi rikätsimäshun, mëtsika judïukunata wanutsiyänanta Teyta Dios imanir mana michanqanta.
Diosqa nunata kamashqa imatapis kikin decidinampaqmi. Adantawan Ëvataqa Teyta Dios clärum nirqan imata rurayänampaq kaqta, peru pëta cäsuyänampaqqa manam obligarqantsu. Adanwan Ëvaqa kikinkunam decidita munayarqan ima alli y ima mana alli kanqanta, y mana allita decidiyanqampitam imëka mana allikunapa pasayarqan (Genesis 2:17; 3:6; Romänus 5:12). Tsëpita kananyaqmi nunakunaqa mana alli decidiyanqampita imëkata sufriyashqa. Tsëpaqmi Declaración de principios del judaísmo conservador libruchö kënö willakun: “Nunakuna imatapis mana alli decidiyaptinmi, entëru Patsachöqa mëtsika sufrimientukunata rikantsik”. Peru kikinkuna imatapis decidiyänanta michänampa rantinmi, Teyta Diosqa munanqannö imatapis rurayänampaq tiemputa permitikan.
Diosqa munanmi y puëdinmi mëtsika judïukunata wanutsiyanqanchö sufreqkunata yanapëta. Teyta Diosqa mëtsika wanushqakunata kawaritsimunampaqmi änimantsik, y unë wanutsiyanqan mëtsika judïukunatapis kawaritsimunqam. Tsë tiempuchö imëkata sufreqkunatapis pasayanqankunata manana yarpänapaqmi yanapanqa (Isaïas 65:17; Hëchus 24:15). Teyta Dios nunakunata alläpa kuyanqanta musyarmi, änikunqanman confiakuyta puëdintsik (Juan 3:16).
Tsë tiempuchö imëkata sufreqkunapitaqa mëtsikaqmi kananqa kushishqa kawakuyan, y Diosmanmi markäkuyan o yärakuyan. ¿Imatan pëkunata yanapashqa? Mana allikuna kananta imanir Teyta Dios permitinqanta y sufritsimaqnintsikkunata ichikllachöna ushakätsinanta musyayanqanmi.