Mëtsëchö alläpa tamya y fuerti vientu | ¿Ima nintan Bibliachö?

Mëtsëchö alläpa tamyaptin y fuerti vientuptinmi nunakunaqa sufrikäyan. Noticiakunachömi këta willakuykäyan:

• “Chïna nacionpa capitalninchömi tutë säbadupita qallëkur mierculisyaq mana pärëpa tamyashqa, tsëmi mëtsëchö cäsi juk metrunö (74.408 centïmetrus)a yaku juntashqa. Unënam tsënöqa tamyashqatsu karqan, cäsi 140 watatam yapë tsënö tamyamushqa” (AP News, 2 de agostu 2023).

• “Juëvischömi Japon nacionchö sur lädu kaqpa ishkë junaqpa alläpa fuerti vientur tamyashqa, tsëtaqa reqiyan tifón Khanun nirmi. Tsëchöqa ishkaq nunakunam wanuyashqa. [...] Taiwanchö mas reqishqa jirkaman tamyaptinqa mediu metrupitapis mas (60.96 centïmetrus)b yaku juntanampaqmi nikäyan” (Deutsche Welle, 3 de agostu 2023).

• “Semäna ushëmi Canadä nacionchö alläpa tamyashqa, tsëmi Nuëva Escocia markaman yaku juntashqa. 50 watapanam tsënö fuertipaqa tamyashqatsu” (BBC News, 24 de juliu 2023).

Kë llapan mana allikuna pasëkanqampaqqa, ¿imatataq Biblia nin?

Ushanan tiempupaq señalkuna

Bibliachöqa nin ushanan tiempuchö kawëkanqantsiktam (2 Timoteu 3:1). Tsëmi Jesusqa willakurqan ushanan tiempuchö ‘imëka espantëpaqkuna pasanampaq’ kaqta (Lücas 21:11). Höra höraqa alläpa fuerti tamyaptin y seguïdu usyaptinmi nunakunaqa mantsakäyan.

¿Imatan ichikllachöna ushakanqa?

Bibliachömi willakun, ichikllachöna imëka mana allikuna ushakänampaq kaqta. Jesusmi kënö nirqan: “Tsëkuna pasakunqanta rikar[qa], Diospa Gobiernun chämunampaqna këkanqanta[m] musyayanki” (Lücas 21:31; Mateu 24:3).

Imëka pasëkanqankunam rikätsimantsik Diospa Gobiernun ichikllachöna imëkatapis controlamunampaq kaqta. Y manam kanannöqa alläpa fuerti tamyanqatsu ni usyanqatsu (Job 36:27, 28; Salmus 107:29).

Kë patsata Diospa Gobiernun imanö altsamunampaq kaqta musyëta munarqa, rikäri ¿Quién salvará el planeta? neq yachatsikuyta.