¿Entëru patsachöku guërra qallëkunqa? | ¿Ima nintan Bibliachö?

Treinta watapanam mëtsikaq nunakuna imëkapis allina kanqanta següru këkäyan, y mas allina kanampaq kaqtam pensëkäyan. Peru manam pensayanqannötsu, noticiakunachömi këta willakuyan:

“Lïbanu nacionpa frontëranchö Israelpa soldädunkuna y Hizbulä grüpupa soldädunkuna pelyayaptinmi, Gäzachö guërra mas kanqa” (Reuters, 6 de enëru de 2024).
“Occidenti läduchö këkaq nacionkunatam Iran nacionqa, Rusiawan y Chïna nacionwan juntakarkur guërrata rurëta munar qallapëkan. Iran nacionpa poderninchö këkaq grüpu grüpu soldädukunam, mëtsë sitiukunata ataquëkäyan. Y tsë nacionchöqa yapëmi mëtsika armakunata rurar qallëkuyashqa” (The New York Times, 7 de enëru de 2024).
“Rusiapita soldädukunaqa Ucrania nacionta atacarmi imëkata ushakëkätsiyan” (UN News, 11 de enëru de 2024).
“Chïna nacionchö qellëninkuna atska kaptin y armankuna mëtsika kaptin y Taiwanchö nunakuna juk nacionkunapa poderninchö këta mana munayaptinmi, imë höra karpis guërra qallëkunman. Y Chïna nacionwan Estädus Unïdus nacionnam imëkarëkur guërrata rurëta munayan” (The Japan Times, 9 de enëru de 2024).

¿Bibliachöqa willakuntsuraq kë llapan pasakunampaq kaqta? ¿Entëru patsachöku guërra kanqa?

Bibliachöqa willakurqannam guërrakuna kanampaq kaqta

Bibliachöqa manam willakuntsu kanan witsan më nacionkunachö o më sitiukunachö guërra kanampaq kaqta. Peru willakunmi mëtsëchö guërrakuna kar “patsapita yamë këta ushakätsinampaq” kaqta (Apocalipsis 6:4).

Daniel libruchömi willakurqan ‘ushanan tiempuchö’ puëdeq nacionkuna ‘pelyata ashipänakuyänampaq’ kaqta, o puëdeq këta munar guërrata rurayänampaq kaqta. Y rikätsikuytam munayan mëtsika armayoq kayanqanta y ‘örunkunatam’ utilizäyanqa, tsëqa rikätsikun armakunachö mëtsika qellëta gastayänampaq kaqtam (Daniel 11:40, 42, 43).

Ichik tiempullachönam juk guërra qallëkunqa

Bibliachömi willakun, imëkapis mas mana alliman chänampaq kaqta. Jesusmi kënö nirqan: “Tsë witsanqa alläpa sufrimientum kanqa. Tsënö sufrimientuqa manam nunakuna kawar qallanqampita kashqaraqtsu” (Mateu 24:21). ‘Alläpa sufrimientuqa’ ushanqa Armagedon guërrachömi, tsë guërraqa “Llapanta Puëdeq Teyta Dios nunakunata juzganan tiempuchö” guërram (Apocalipsis 16:14, 16).

Armagedon guërrachöqa mëtsikaq nunakunam salvakuyanqa. Y tsë guërrawanmi Teyta Diosqa llapan gobiernukunata ushakätsinqa. Armagedon guërra pasariptin imanir yamëna kawakunapaq kaqta musyëta munarqa, kë yachatsikuykunata leyi: