Jesucristum mana alli nunakunata ushakätsimunqa

Jesusqa entiendinmi mana alli nunakunapa culpan imanö sufrinqantsikta. Pëtaqa mana kaqpitam acusayarqan, mana culpayoqtam maqayarqan, culpannaq këkaptinmi juzgar condenayarqan y mana llakiparmi wanutsiyarqan. Jesusqa culpannaq këkarpis, listum këkarqan jukkunarëkur sufrinampaq y ‘vïdanwan pagakur mëtsikaqta salvanampaq’ (Mateu 20:28; Juan 15:13). Jesusqa Diospa Gobiernunchömi gobernëkanna, y ichikllachönam mana alli nunakunata ushakätsinqa y entëru Patsachö justiciata ruramunqa (Isaïas 42:3).

Bibliachömi willakun mana alli nunakunata Jesus ushakätsiptin imanö kawakunapaq kaqta:

• Salmus 37:10 y 11 textuchömi kënö willakun: “Ichikllanam faltan mana alli nunakuna ushakäyänampaq, pëkuna kayanqan kaqman rikachakurpis manam rikankinatsu. Alli shonquyoq nunakunapaqmi kë patsa herenciankuna kanqa. Tsëchömi imëpis yamë y tranquïlu kawakuyanqa”.

Jesus noqantsikpaq ruranqanta y ruramunampaq kaqtaqa, ¿imanötan agradecikushwan? Jukqa kanman këta rurarmi: “Diospa Gobiernumpita alli noticiakuna” ima kanqantam shumaq yachakushwan (Lücas 4:43). Jesuspis tsë alli noticiakunatam willakurqam. Leyi “¿Imataq Diospa Gobiernun?” neqta.