¿Imataq Diospa Gobiernun?
Biblia yachatsikunqan
Tsë Gobiernutaqa kikin Jehovä Diosmi patsätsishqa. Diospa Gobiernunqa ciëluchömi këkan, tsëmi Bibliaqa nin “ciëluchö gobiernu” kanqanta (Marcus 1:14, 15; Mateu 4:17). Kë Patsachö gobiernukunapitaqa, Diospa gobiernunmi mas alli kaq gobiernuqa.
¿Pitaq tsë Gobiernuchö mandakoq? Diosqa Jesucristutam akrashqa tsë Gobiernunchö mandakoq kanampaq, y pëtam churashqa kë Patsachö llapan gobernaqkunapitapis mas puëdeq kanampaq (Mateu 28:18). Jesusqa alli kaqllata ruranampaqmi puëdeq këninta utilizan, y rikätsikushqanam alli mandakoq y llakipäkoq kanqanta (Mateu 4:23; Marcus 1:40, 41; 6:31-34; Lücas 7:11-17) Jina Jesusqa Diosnintsik mandaptinmi atskaq nunakunata akrashqa ciëluta ëwayänampaq, y pëkunawan juntum ciëlupita gobernayämunqa (Revelacion 5:9, 10).
¿Imëllapis Diospa Gobiernun ushakanqatsuraq? Manam ni imëpis ushakanqatsu. Nunakunapa gobiernunqa pasareqllam, peru Diospa Gobiernunqa “mana ushakaq gobiernum” (Daniel 2:44).
¿Pikunatataq Diospa Gobiernun gobernamunqa? Ima nacionpita kayaptimpis, Diosnintsik munanqanta ruraq kaqkunallatam, peru mana cäsukoq kaqkunataqa ushakätsinqam. Tsëmi tsë Gobiernunchö këta munarqa Diosnintsikta cäsukunantsik (Hëchus 10:34, 35).
¿Ima leykunatataq Diospa Gobiernun respetatsinqa? Dios Yayapa leyninkunatam respetatsinqa. Tsë leykunaqa mana allikunata mana ruranapaq y alli kawakunapaqmi yanapakun. Bibliachömi kënö nin: “‘Jehovä Diosnikitam llapan shonqïkiwan, llapan kawënikiwan y llapan yarpënikiwan kuyanëki’. Tsëmi mas precisaq y punta kaq mandakï. Y ishkë kaqpis punta kaqnöllam, y këmi: ‘Nuna mayikitam kikikitanö kuyanëki’” (Mateu 22:37-39). Diosta y nuna mayinkunata kuyaqkunallam Diospa Gobiernumpa mandädunchö kayanqa, y shumaqmi kawakuyanqa.
¿Ima allikunatataq tsë Gobiernu rurëkan? Kanampitanam mëtsikaq nunakunata yanapëkan Diospa leyninkunata yachakuyänampaq y cäsukuyänampaq, y tsënöpa alli kawakuyänampaq (Isaïas 48:17, 18).
¿Imapaqtaq tsë Gobiernu patsätsikashqa? Diosnintsikqa qallanampita patsëmi nunakuna alli kawakuyänanta munarqan, y tsëta cumplinampaqmi tsë Gobiernunta patsätsishqa. Tsëmi tsë Gobiernuqa Diosta kuyaq y cäsukoq kaqkunata yanapanqa mana wanushpana kawakuyänampaq, y pëkunapaqmi kë Patsata juk shumaq huertaman tikratsinqa (Isaïas 35:1, 5, 6; Mateu 6:10; Revelacion 21:1-4).