JÖVINKUNA MUSYËTA MUNAYANQAN
¿Imanötan Biblia yanapaman? Ishkë: Bibliata leyi gustashunëkipaq
Will jutiyoq jövinmi nin: “Bibliata imanö leyinëkipaq kaqta mana musyarqa, qelanankim leyita”.
¿Diospa Palabranta kushishqa leyita munankimanku? Këchö yachakunqëkim yanapashunki.
Imëka tsëchö këkaqnö Bibliata leyi
Imëka tsëchö këkaqnö leyinëkipaqqa, këkunam yanapashunki:
Imapita yachakunëkipaq kaqta akrë. Ima pasakunqanta Biblia willakunqampita, Jesuspa kawënimpita o jw.org päginachö Biblia willakunqan grabacionpitam, yachakuyta puëdinki.
Akranqëkita leyï. Japallëki leyïta puëdinkim. Y familiëkikunawan o amïguykikunawan leyirqa, juknikikuna willakoq kayanki y wakinkunana Biblia willakunqan nunakunanö leyiyämunqa.
Këkunam yanapashunki:
Leyinqëki imapita willakunqanta rikätsikoq dibüjuta o dibüjukunata rurë. Tsëpitana cada dibüjukunachö ima pasakunqanta qellqë.
Llapan shonqunwan Teyta Diosta sirweq nunapaq o warmipaq yachakurqa; imakunata ruranqanta, alli nuna kanqanta y ima bendicionkunata chaskinqanta qellqë.
Imatapis mas yachakuyta munaqnö leyï. Juknöpapis yachakunqëkita rikë, y tsë willakuychö nunakuna parlayanqanta y juk nunakuna willakuyanqantapis leyï.
Bibliachö willakunqan nunakuna mana allita rurayänampa rantin allita rurayashqa kayaptinqa, ¿imanöraq kanman karqan? Pëdruta pasanqanman yarpärishun. Pëdruqa, Jesusta mana reqinqantam nirqan (Marcus 14:66-72). Nunakunata mantsanampa rantinqa, ¿imataraq Pëdru ruranman karqan?
Munarqa Bibliachö pasakunqan willakuyta, qamta pasëkäshunqëkitanö qellqë. Y imata yachakunqëkitapis qellqëta puëdinkim (Romänus 15:4).
Imëka tsëchö këkaqnö Bibliëkita leyi.
Mas yachakunëkipaq kallpachakuy
Bibliata leyir mas yachakunëkipaq kallpachakurqa, imëka mastam yachakunki.
Rikärishun Mateu 28:7 y Marcus 16:7 ima ninqanta.
¿Imanirtan Marcusqa nirqan Pëdrutapis Jesus yuripunampaq kaqta?
Këmi yanapashunkiman: Marcusqa manam tsëchötsu këkarqan. Tsëqa, ¿imanöraq musyarqan? Itsapis Pëdru willashqa karqan.
Bibliachö yachakunqantsik: Jesus yapë yuripunqanqa, ¿Pëdruta yanaparqanku? (Marcus 14:66-72). ¿Imanötan Jesusqa Pëdruta rikätsirqan amïgun kanqanta? ¿Imanötan Jesus ruranqannölla noqantsikpis alli amïgu kanqantsikta rikätsikushwan?
Imëka tsëchö këkaqnö y mas yachakunëkipaq kallpachakurqa, masmi gustashunki Bibliata leyi.