Juk sacerdöti maqëkaptimpis manash tikrapunaqtsu

Arturqa Armenia nacionchö Jehoväpa testïgunkunatam markan markan watukan. Juk kutish juk markaman watukakoq ëwanaq. Tsëchö Testïgukunaqa manash nunakuna puriyanqan sitiuman churakëkur yachatsikuyaqtsu. Tsëshi pëkunata yanapëta munar, warmin Änawan y Yirair jutiyoq wawqiwan nunakuna puriyanqan sitiuman juk mostradorta churakëkur yachatsikuyänaq.

Tsënash nunakuna witirir revistakunata y librukunata leyiyänampaq apar qallëkuyänaq. Tsëmanchi ishkaq sacerdötikuna piñashqa o ajashqa chäkuriyänaq. Y juknin kaqchi mostradorta jëtëkur wawqi Arturta lentisnimpis volaqpaq o vuëlaqpaq kutëkunaq. Peru wawqi Arturwan warmin Äna, y wawqi Yirairqa, sacerdötikunata shumaq parlaparshi mana piñakuyänampaq niyänaq. Tsënö nikäyaptimpis, tsë ishkan sacerdötikunaqa mostradorta, librukunata y revistakunatash jalur o jarur ushayänaq. Y wawqikunata imëkata nikacharkurshi jeqariyänaq.

Tsënash wawqikunaqa denunciata churaq puestuman ëwayänaq, y imanö pasakunqanta policïakunata willarirshi Bibliapita parlapäyänaq. Peru policïakunapa mandaqninqa masta musyëta munarshi, wawqikunata oficïnanman qayatsinaq. Y wawqi Arturta jatunta rikëkurqa, espantakunaqshi sacerdöti kutëkaptimpis mana tikrapunqampita. Tsëshi Bibliapitana tapupar qallëkunaq. Y chusku hörapanö Bibliapita parlariyaptinshi tsë mandakoq policïaqa, “¡qamkunam sïqa alli kaq religion kayanki. Noqatapis religionnikikunachö këmi gustamanman!” ninaq.

Waränin junaqpis Arturqa yapëshi mostradorwan yachatsikoq yarqunaq. Tsënash juk nunana witirir kënö ninaq: “Qanyanqa llapan pasakunqantam rikarqö; sacerdöti kutëkäshuptikipis manataq tikrapurqëkitsu. Tsë sacerdötikuna mana alli portakuyanqampitam kananqa imatapis pëkunata creïnatsu”.

Tsë ampillash o paqasllash, wawqi Arturta policïakunapa mandaqnin yapë qayatsinaq. Peru manash pasakunqampita masta tapupänampaqtsu, sinöqa Bibliapita maslla tapupänampaqshi, y ishkë mas policiakunash wiyakur kayänaq.

Y waräninnash wawqi Arturqa, videukunata rikätsinampaq tsë policïata watukanaq, y tsë policiaqa wakin kaq policïakunatash qayanaq pëkunapis tsë videuta rikäyänampaq.

Tsë sacerdötikuna mana alli portakuyanqanqa, mëtsikaq policïakuna Bibliapita wiyakuyänampaqmi yanapakushqa, y Jehoväpa Testïgunkunatam allichö quedatsishqa.