Sordukunata Diospita yachatsita munanqätaqa cumplirqömi

Virrat (Finlandia) markachömi familia täkurqan y noqaqa 1941 watachömi yurikurqä. Papänï, mamänï, wawqï y panïmi sordu kayarqan. Pëkunawanqa sëñasllapam parlayaq kayä.

Bibliachömi alli noticiakunata tarirqä

Estudiëkanqä escuëlaqa wayipita 240 kilömetrus karuchömi karqan. Tsëchöqa sëñaspa parlayänätaqa manam munayaqtsu. Tsë tiempuqa Finlandia nacionchö sordukunapaq escuëlakunachömi, sordukunata yachatsiyaq jukkuna parlayaptin shiminkunata kuyutsir ima nita munayanqanta rikar entiendiyänampaq. Tsëmi shimïkunata kuyutsir parlayänäta y tsëta rikar ima nita munëkäyanqäta entiendiyänäpaq obligayämaq. Y profesorkunaqa makïkunawan sëñasta rurëkaqta rikäyämarnïqa reglawan o puntëruwanmi makïkuna nananqanyaq fuerti maqayämaq. Alliyänampaqqa juk ishkë junaqkunaraqmi pasaq.

Papänïwan mamänïqa chakrachömi atska animalkunata wätayaq, tsëmi chakrachö imanö murunäpaq y alli cosechanäpaq yachakuyta munar universidäman estudiaq ëwarqä. Estudiëta usharirnam wayïman kutir mësa jananchö Täpakoq y ¡Despertad! revistata tarirqä. Papänïnam nimarqan tsë revistakunachö Bibliapita yachatsikuykuna shumaq kanqanta, y nimarqanmi mamänïwan Bibliapita yachakuykäyanqanta. Pëkunataqa juk Testïgum warminwan Bibliapita yachëkätsiyarqan y parlapänakuyänampaqqa papelmanmi qellqayaq.

Papänïqa wanushqakuna kawariyämunampaq y kë patsa shumaq huertaman tikranampaq kaqtam nimarqan. Bibliapita yachëkätseq Testïgukunaqa manam sëñas idiömata yachayarqantsu, tsëmi següru këkarqä papänï mana entiendishqa kanqanta. Noqataqa wamra kanqäpitam yachatsiyämarqan wanushqakuna ciëluman ëwayänampaq kaqta.

Papänïta y mamänïta Testïgukuna yapë watukaq kutiyämuptinmi tapurqä papänï nimanqampita, y pëkunanam niyämarqan: “Papäniki nishunqëkiqa rasumpam”. Juan 5:28, 29 ninqantam leyipäyämarqan. Tsëpitanam entienditsiyämarqan Diosqa patsachö mana allikunata ushakätsimunampaq kaqta y nunakuna alli saloryoq y yamë kawakuyänampaq kaqta (Salmus 37:10, 11; Daniel 2:44; Apocalipsis 21:1-4).

Masta yachakuyta munarmi Antëru jutiyoq testïguwan Bibliapita yachakur qallarqä, pëqa manam sëñas idiömata yacharqantsu. Yachakuyanqä höraqa tapukuykunapa respuestantam juk papelman qellqaq kä. Tsëpitanam wawqi Antëruqa qellqanqäkunata leyeq y mas tapukuykunata o maskunata entiendinäpaqmi qellqamoq. Tsënömi cada semäna ishkë hörapa yachakuyaq kayä. ¡Pëqa pacienciawanmi yachatsimarqan!

1960 watachömi Testïgukunapa asamblëankunaman ëwarqä y sëñas idiömachömi yachatsikayämurqan. Y viernis tardipam willakayämurqan säbadu junaq bautismu kanampaq kaqta. Tsëmi waräninqa bautizakunapaq röpäta y toälläta aparqä. ¡Tsë asamblëachömi bautizakurqä!a Tsëpita wallka tiempullatanam papänï, mamänï, wawqï y panï bautizakuyarqan.

Bibliapita yachakuyänampaqmi jukkunata yanapä

Bibliapita yachakunqäkunatam noqanö sordukunata imëkanöpa yachatsita munarqä. Tsëmi täkunqä sitiuchö sordukunata sëñas idiömachö yachatsir qallëkurqä.

Tiempu pasariptinnam Tampëre markaman täkoq ëwakurqä. Wayin wayinmi sordukunata asheq kä, y atskaqtam Bibliapita yachatsir qallarqä. Y juk ishkë watakuna pasariptinnam Tampëre markachö diezpitapis masna publicadorkuna kayarqan.

1965 watachömi Maire jutiyoq paniwan reqinakuyarqä, pëqa yachanëpaq panim karqan. Y qateqnin kaq watachömi casakuyarqä. Maireqa sëñas idiömatam raslla o saslla yachakurqan, y 50 watapam juntu Jehoväta sirwiyarqä. Alläpa trabajadöra y kuyakoq warmim karqan.

Casakuyanqäpita ishkë wata pasariptinmi wamrä Marku yurirqan. Pëqa wiyëtam puëdeq, tsëmi finlandes idiömata y sëñas idiömata yachakurqan. Markuqa 13 watayoq këkarmi bautizakurqan.

Tampëre markachö sordukuna sëñas idiömata atskaqna yachakushqa kayaptinmi, 1974 watachö Turku markaman yanapakoq ëwayarqä. Tsëchöqa manam ni juk testïgu sordu karqanraqtsu. Tampëre markachö wayin wayin sordukunata ashiyanqänömi Turku markachöpis ashiyarqä. Tsë markachöqa atskaqtam sordukunata Bibliapita yachatsirqä y döceqmi bautizakuyarqan.

Balticu lamar kuchunkunachö këkaq nacionkunachömi Bibliapita yachatsikuyä

1987 watachömi Markuta Betelchö yanapakunampaq invitayarqan. Tsënam warmïwan juk markapa ëwayänäpaq yapë patsätsipakuyarqä. Y Turku markachöqa Jehoväta sirweq sordukunam atskaqna kayarqan.

Tsë tiempupaqqa Euröpachö rupay o inti jeqamunan lädupaqa librinam Diospita yachatsikuyta puëdiyaq. Tsëmi 1992 wata enëru killachö juk wawqiwan Tallin (Estonia) markaman viajayarqä.

Tsëchöqa juk Testïgu panitam reqiyarqä y turinqa sordum karqan. Turinqa manam Bibliapita yachakuyta munarqantsu, tsënö kaptimpis tsë markachö juk sordukunatam reqitsiyämarqan, y Tallin markapita manaraq ëwakuyaptïmi sordukuna juntakäyanqan localman ëwayarqä. Reunion manaraq qallaptinmi juk mësaman estonio y rusu idiömachö librukunata y revistakunata churayarqä. ¡Tsëchö sordukunaqa 100 librukunata y 200 revistakunatam apakuyarqan! Y watukaq ëwayänäpaqmi 70 sordukuna mëchö täkuyanqanta niyämarqan. Tsëpita witsëpanam Estonia nacionchö mëtsikaq sordukuna Diospita yachakur qallayarqan.

Estonia nacionchö Diospita yachatsikuyänäpaqmi warmï Mairewan seguïdu viajayarqä. Wallka tiempullanam trabajayarqäpis y precursor regularnömi yanapakur qallëkuyarqä. Y 1995 watachömi Helsinki nacionpa amänunman täkoq ëwayarqä. Tsëpitaqa Tallin markaman barcuwan viajëqa mas fäcilmi karqan. Estonia nacionchöqa pensayanqäpitapis masmi sordukuna Bibliapita yachakur qallëkuyarqan.

Mëtsikaq sordukunatam Bibliapita yachatsiyarqä y ishkaqmi sordu y wisku kayarqan. Pëkunataqa makinkunachö sëñasta rurarmi Bibliapita yachatsiyarqä. Y Bibliapita yachakoqkunaqa dieciseismi bautizakuyarqan.

Tsë tiempuqa sëñas idiömachö publicacionkuna mana kaptinmi sordukunata Bibliapita yachatsiqa fäciltsu karqan, tsëmi publicacionkunapita dibüjukunata rutur cuadernuman pegarqä y alläpam yanapamarqan sordukunata yachatsinäpaq.

Finlandia sucursalpitam niyämarqan lamar kuchunkunachö këkaq wakin nacionkunaman ëwanäpaq y niyämarqanmi sëñas idiömachö yanapakunapaq. Tsëmi Letonia y Lituania nacionkunaman atska kuti ëwarqä, tsëchömi yanapakurqä Testïgukuna sordu nunakunata tariyänampaq. Cada nacionchömi sëñas idiömaqa jukläya jukläya, tsëmi yachakurqä Estonia, Letonia y Lituania nacionkunachö imanö sëñas idiöma kanqanta. Y Balticu lamar kuchunkunachö këkaq nacionkunachö sordukunam rusuchö sëñas idiömata utilizäyaq, tsëmi rusuchöpis sëñas idiöma imanö kanqanta ichikllata yachakurqä.

Öchu watapam Estonia nacionman y Balticu lamar kuchunkunachö këkaq wakin nacionkunaman viajayarqä. Peru warmï Maire párkinson qeshyawan qeshyanqanrëkurmi viajëta puëdiyarqänatsu.

Sordukunapaq publicacionkunata rurayan

1997 watachömi Finlandia sucursalchö sëñas idiömaman traduciyänampaq juk grüputa patsätsiyarqan. Sucursalpa amänunchö täkurmi Mairewan sëñas idiömaman publicacionkunata traducir yanapakuyarqä. Y wamrä Markuwan y warmin Kirsiwampis juntum trabajayarqä. Markuqa juk nacionkunachöpis sëñas idiömaman traduceqkunatam yanaparqan. Y tiempuwannam Finlandia sucursalchö patsätsiyanqan grüpuchöpis necesitäyämanqan höra yanapakurqä.

Sucursalpitam patsätsiyarqan wawqi panikuna sëñas idiömata yachakuyänampaq. Tsëpitanam patsätsiyanqan grüpukunachö y congregacionkunachö mëtsikaq wawqi panikuna sëñas idiömachö yanapakuyarqan. Pëkunaqa Diospita yachatsikurmi imëkanöpa yanapakuyarqan y wakinkunanam juk cargukunachö yanapakuyarqan.

Sordukunata yanaparmi sïguï

2004 watachömi warmï Mairewan yanapakuyarqä sëñas idiömachö punta kaq congregacion kanampaq, tsëqa Helsinki markachömi karqan. Kima wata pasariptinqa mëtsikaq wawqi panikuna y atska precursorkunanam kayarqan.

Atskaqna kayaptinmi juk markamanna yanapakoq ëwayarqä. Tampere markachömi sëñas idiömachö juk grüpu karqan, tsëmi 2008 watachö tsë grüpuman yapë kutiyarqä, y tsë grüpupita ëwakuyanqäqa 34 watanam pasashqa karqan. Juk wata pasariptinnam tsë grüpuqa congregacionman tikrarqan. Y Finlandia nacionchöqa sëñas idiömachö ishkënam congregacionkuna karqan.

Warmï Maireqa qeshyanqampita manam alliyarqannatsu, tsëmi 2016 watachö wanukurqan. Warmïtaqa shumaqmi cuidarqä y allim tratarqä, alläpa llakirnimpis musyämi shamoq tiempuchö kawarimunampaq kaqta, tsë tiempuqa manam qeshya kanqanatsu. ¡Kawarimunantanam munëkü! (Isaïas 33:24; Apocalipsis 21:4).

60 watapanam sordukunata Diospita yachatsikä. Qallananchö ruranqänöllam sordukunataqa Diospita yachatsir sïguishaq.