Jeremïas

44 Egiptu nacionchö këkaq Migdol,+ Tahpanhes,+ Nof+ y Patros+ kinrëchö këkaq judïukunapaqmi, Teyta Dios Jeremïasta parlapar kënö nirqan:+ 2 “Israel nunakunapa Diosnin angelkunata mandaq Teyta Jehovämi këta nin: ‘Qamkunaqa rikäyarqunkim Jerusalenman+ y Judä kinrëchö markakunaman, imëka mana allikunata apamunqäta. Tsëmi, tsë kinrëkunaqa tsunyaq këkäyan y ni pï tsëchö kawantsu.+ 3 Tsëtaqa rurarqä, noqata cöleratsimar, qamkuna y unë kastëkikuna mana reqiyanqëki santukunapaq qarëkunata rupatsishqa kayaptiki,+ y imëkata rurar tsëkunata adorashqa kayaptikim.+ 4 Noqaqa kutin kutinmi sirwimaqnï willakoqkunata, qamkunata kënö niyäshunëkipaq mandamurqä: “Chikinqä melanëpaq rurëkunata manana rurayänëkipaqmi qamkunata rogä”.*+ 5 Peru qamkunaqa manam wiyakuyarqëkitsu ni cäsukuyarqëkitsu, y manam mana alli rurëkunata dejayarqëkitsu, sinöqa santukunapaqmi qarëkunata rupatsir sïguiyarqëki.+ 6 Tsëmi qamkunawan alläpa cölerakur, Judä kinrë markakunaman y Jerusalenpa cällinkunaman, imëka mana allikunata chätsimurqä. Tsëmi kanan rikäyanqëkinöpis, ushakashqa y tsunyaq sitiu këkan’.+

7 Israel nunakunapa Diosnin angelkunata mandaq Teyta Jehoväqa këtapis ninmi: ‘¿Imanirtan imëka mana allikuna pasayäshunëkipaq kikikikuna ashiyanki? Qamkunapa culpëkikunam Judächö ollqukuna, warmikuna, wamrakuna y llullukunapis wanuyanqa o wañuyanqa, y manam mëqëkipis kawëkar quedayankitsu. 8 ¿Imanirtan kanan kawëkäyanqëki Egiptu nacionchö adorayanqan santukunapaq qarëkunata rupatsir cöleratsiyämanki? Tsëta rurayanqëkipitam qamkunaqa wanuyanki, y mëtsë nacionpita nunakunam qamkunata maldiciyäshunki y insultayäshunki.+ 9 ¿Qonqayarqunkinaku unë kastëkikuna, Judächö gobernaqkuna+ y warminkuna,+ qamkuna y warmikikuna,+ Judä kinrë markakunachö y Jerusalenpa cällinkunachö, imëka mana allikunata rurayanqëkita? 10 Qamkunaqa kananyaqmi arrepentikuyarqunkitsu* ni respetayämarqunkitsu,+ manam qamkunata y unë kastëkikunata entreganqä leynïkunata ni mandakunqäkunatapis cäsukuyarqunkitsu’.+

11 Tsëmi Israel nunakunapa Diosnin angelkunata mandaq Teyta Jehoväqa këta nin: ‘Qamkunamanmi imëka mana allikunata chätsimushaq, y Judä kinrë markakunatam ushakätsishaq. 12 Imëkanöpa Egiptuman ëwëta munaq Judächö quedaq nunakunataqa, tsë nacionchö ushakätsiyänantam permitishaq.+ Espädawanmi ushakätsiyäshunki y mallaqëpitam wanuyanki. Awmi, ichiktapis jatuntapis espädawanmi ushakätsiyäshunki, y mallaqëpitam wanuyanki. Qamkunata pasayäshunqëkita rikarmi, mëtsë nacionpita nunakuna alläpa mantsakäyanqa, pïmëmi maldiciyäshunki y insultayäshunki y qamkunapitam burlakuyanqa.+ 13 Jerusalenpita nunakunata castiganqänömi, Egiptu nacionchö kawëkaq nunakunatapis castigashaq. Y espädawanmi ushakätsiyanqa, y mallaqëpita y qeshyawanmi wanuyanqa.+ 14 Egiptu nacionchö kawaq Judäpita quedaqkunapis, manam salvakuyanqatsu ni kawëkar quedayanqatsu. Y manam yapëqa Judä kinrëman kutiyanqatsu. Kutimuyta munarpis manam llapantsu kutiyämunqa, sinöqa juk ishkë salvakoqkunallam’”.

15 Jeremïas tsënö niptinnam, warminkuna santukunapaq qarëkunata rupatsiyanqanta musyaq ollqukuna, santukunapaq qarëkunata rupatseq mëtsika warmikuna y Egiptuchö këkaq+ Patros kinrëchö kawaq nunakuna,+ Jeremïasta kënö contestayarqan: 16 “Teyta Jehoväpa jutinchö niyämanqëkitaqa, manam cäsukuyäshaqtsu. 17 Tsëpa rantinqa, parlayanqätam rurayäshaq. Awmi, Ciëluchö Reina* niyanqan santupaqmi qarëkunata rupatsiyäshaq, tsë qarëkunamanmi vïnuta jichayäshaq.+ Tsëtam noqakuna, unë kastäkuna, gobernaqnïkuna y dirigimaqnïkunapis, Judä kinrë markakunachö y Jerusalenpa cällinkunachö rurayarqä. Tsëtaqa rurayarqä, tantäkuna y imëkäkuna mëtsika kaptinmi, y imëka mana allikunata manaraq pasarmi. 18 Ciëluchö Reina niyanqan santupaq qarëkunata manana rupatsiyanqäpita, tsë qarëkunaman vïnuta manana jichayanqäpitam, imëkäkuna pishishqa, y marka mayïkunatapis espädawanmi ushakätsiyashqa y mallaqëpitam wanuyashqa”.

19 Tsë warmikunaqa kënöpis niyarqanmi: “Noqakunaqa qowäkuna o runäkuna* musyëkäyaptinmi, Ciëluchö Reina niyanqan santupaq qarëkunata rupatsiyarqö y tsë jananmanmi vïnuta jichayarqö. Tsënöllam santu rikoq wawakunata rurayanqätapis y tsëman vïnuta jichayanqätapis qowäkuna musyayan”.

20 Tsënam Jeremïasqa, tsëchö këkaq ollqukunata, warminkunata y pëwan parlëkaq llapan nunakunata kënö nirqan: 21 “Qamkuna, unë kastëkikuna, gobernaqnikikuna, dirigeqnikikuna y llapan nunakuna, Judä kinrëchö y Jerusalenpa cällinkunachö+ santukunapaq qarëkunata rupatsiyanqëkitaqa, Teyta Jehoväqa manam qonqashqatsu, kananyaqmi yarparëkan. 22 Qamkuna imëka mana allikunata y melanëpaqkunata rurayanqëkita manana aguantarmi, Teyta Jehoväqa kawayanqëki markakunata ushakätsishqa. Tsëmi kanan rikäyanqëkinöpis, tsë markakunachö ni pï kannatsu. Y pasayäshunqëkita rikarmi, mëtsë nacionpita nunakuna alläpa mantsakäyanqa, y pïmëmi maldiciyäshunki.+ 23 Qamkunaqa Jehovä niyäshunqëkikunata mana cäsukur, y leyninkunata, mandayäshunqëkita y yarpätsiyäshunqëkita mana cäsukurmi, santukunapaq qarëkunata rupatsir, Jehoväpa rikëninchö jutsata* rurayarqunki. Tsëmi kanan rikäyanqëkinöpis, qamkunaman imëka mana allikuna chämushqa”.+

24 Jeremïasqa tsëchö këkaq nunakunata y llapan warmikunataqa, kënöpis nirqanmi: “Egiptuchö këkaq Judäpita nunakuna, Teyta Jehovä ninqankunata wiyayë. 25 Israel nunakunapa Diosnin angelkunata mandaq Teyta Jehovämi këta nin: ‘Qamkuna y warmikikunaqa, niyanqëkinöllam rurayarqunki. Qamkunaqa kënömi niyarqëki: “Ciëluchö Reina niyanqan santupaq qarëkunata rupatsiyänäpaq y tsë qarëkunaman vïnuta jichayänäpaq+ änikuyanqätaqa, änikuyanqänöllam cumpliyäshaq”. Awmi, qamkuna warmikuna, änikuyanqëkitam niyanqëkinölla cumpliyanki’.

26 Tsëmi Egiptuchö kawëkaq Judäpita nunakuna, Teyta Jehovä kënö ninqanta wiyayë. Teyta Jehovämi këta nin: ‘“Alläpa respetashqa jutïchö jurarmi nï, Egiptuchö kawëkaq Judäpita nunakunata+ imatapis jurar jutïchö jurayänampaq, manana permitinäpaq kaqta. Awmi, pëkunaqa manam, ‘¡Llapanta Gobernaq Teyta Jehovä rasumpa kawanqannöllam!’ nir jurayanqanatsu.+ 27 Pëkunapaq allikunata ruranäpa rantinmi, pëkunaman imëka mana allikunata chätsimunäpaq altantu këkäshaq.+ Y Egiptuchö kawëkaq Judäpita nunakunataqa, espädawanmi ushakätsiyanqa, y mallaqëpita wanurmi llapankuna ushakäyanqa.+ 28 Y juk ishkëllam espädapita salvakur, Egiptu nacionpita Judä kinrëman kutiyämunqa.+ ¡Tsëchömi Egiptu nacionman shamoq Judäpita quedaq nunakunaqa musyayanqa, pëkuna niyanqankuna o noqa ninqäkuna cumplikanqanta!”’”.

29 “Teyta Jehoväqa kënöpis ninmi: ‘Qamkunataqa, këkäyanqëki sitiuchö imëka mana allikunawan castiganäpaq kaqtam nirqö. Tsënö ninqäta cumplinqätaqa, imëka pasakunqankunam rikätsikun. 30 Noqa Jehovämi këta nï: “Judächö gobernaq Sedequïasta, chikeqnimpa y wanutsita munaq Babiloniachö gobernaq Nabucodonosorpa makinman entreganqänöllam, Egiptuchö gobernaq faraon Hofrätapis, chikeqninkunapa y wanutsita munaqkunapa makinkunaman entregashaq”’”.+