Jesuspa punta kaq milagrun

Natanael Jesuspa qateqnin tikranqampitaqa kima junaqnam pasarishqa karqan. Tsëpitaqa Jesus winanqan Galilëa provinciatam pë y wakin qateqninkuna ëwayarqan. Natanael yurikunqan Canä markachö casakï fiestamanmi invitayarqan. Tsë markaqa Jesus winanqan Nazaret markapa uma kaq lädunchömi këkarqan.

Jesuspa maman Marïapis tsëchömi këkarqan. Casakoqkunapa familianwanmi reqinakoq, y itsachi invitädukunata atiendirnin yanapakïkarqan. Vïnu ushakashqa kanqanta cuentata qokurirmi Jesustaqa raslla willarirqan (Juan 2:3).

Rasumpa kaqchöqa, Jesus imatapis ruranampaq kaqtam Marïaqa munëkarqan. Peru Jesusqa shumaqllapam rikätsirqan mañëkanqanqa mana alli kanqanta, tsëmi kënö nirqan: “Warmi, ¿imanirtaq tsëpaqqa noqantsik yarpachakushwan?” (Juan 2:4). Jesusqa Dios churanqan Reymi, tsëmi ciëluchö këkaq Teytanlla imata ruranampaqpis mandëta puëdirqan y manam kastankunatsu ni amïgunkunatsu. Marïaqa wamran tsë asuntuta rikänampaqmi jaqirirqan y tsëchö yanapakïkaqkunatam kënö nirqan: “Llapan niyäshunqëkita rurayë” (Juan 2:5).

40 litruta tsaraq rumipita joqta kuntukunam tsëchö këkarqan. Tsënam Jesusqa kënö mandarqan: “Kuntukunaman yakuta winayë”. Tsëpitanam nirqan: “Kananqa ichik chaqarkur, casakï fiestata rikaqman apayë” (Juan 2:7, 8).

Casakï fiestata rikaqqa, alläpam kushikurqan alli kaq vïnuta sirwikäyaqta llamirir, peru manam musyarqantsu tsë milagruta Jesus rurashqa kanqantaqa. Tsëmi noviuta qayarir kënö nirqan: “Wakinkunaqa mas allin kaq vïnutam puntata churayan, y nunakuna shinkarkuyaptinnam, mana allin kaq vïnullatana churayan. Peru qamqa mas allin kaq vïnutam kanan hörayaq churarätsirqunki” (Juan 2:10).

Kë milagruqa Jesuspa punta kaq milagrunmi karqan y pëman creikoqkuna y qateqninkunam mas markäkïyoq tikrariyarqan. Casakï fiesta ushariptinnam mamäninwan y wawqinkunawan Galilëa qochapa amänunchö këkaq Capernaum markaman uräyarqan.