Rasumpa kaq adoracionta alläpa respetanqanta Jesus rikätsikun

Canä markachö casakï fiesta ushariptinmi, mamäninwan y Santiägu, Josë, Simon y Jüdas wawqinkunawan Capernaumta Jesus ëwarqan.

Peru ¿imanirtaq Capernaumta ëwarqan? Kë markaqa Nazaretpita o Canä markapitaqa mas alli sitiuchömi këkarqan y mas jatunmi karqan. Jina mëtsikaq mushoq qateqninkunam tsëchö o tsë markapa amänunchö täräyarqan. Tsënöpam winayanqan markachö Jesusqa pëkunata mas alli yachatsinan karqan.

Jesusqa Capernaumchöpis precisaq milagrukunatam rurarqan. Tsë markachö y jiruroqnin markakunachö täraq nunakunaqa, pë ruranqampita parlayaqtam wiyayarqan. Peru tsëpita ichik tiempullatanam Diosta adoraq wakin judïukunanöpis, Jesuswan qateqninkunaqa Jerusalenta 30 watachö Pascua fiestaman ëwayarqan.

Jerusalen templuchö këkäyaptinnam, Jesus imëpis mana ruranqanta ruraqta rikäyarqan y alläpam espantakuyarqan.

Diospa Leyninqa mandakoq Jerusalen templuchö pishtashqa ofrendakunata israelïtakuna rurayänampaqmi. Karu sitiukunapita templuman ëwaqkunaqa tsë junaqkuna quedakuyänampaqmi tsë markachö rantipakuyaq. Y Diospa Leyninqa wäkakunata, üshakunata, cabrakunata y imatapis wanayanqan cösaskunata rantiyänampaqmi permiteq (Deuteronomiu 14:24-26). Tsëmi Jerusalenchö qatukoqkunaqa templupa jatun patiunchö pishqukunata y juk animalkunata rantikuyaq. Jinamampis, wakin qatukoqkunaqa alläpa chaniyoqchömi imatapis rantikuyaq.

Tsëta rikëkurmi Jesusqa alläpa piñakurqan. Tsëmi qellë trokaqkunapa qellëninta ramakacharkur y mësankunata tikrakacharkur templupita qarqurqan. Tsëpitanam pëkunata kënö nirqan: “¡Këkunata këpita jorqayë! ¡Amana Teytäpa wayinta qatukuna wayiman tikratsiyëtsu!” (Juan 2:16).

Jesuspa qateqninkuna tsëta ruraqta rikëkurmi, Diospa Tsurimpaq kënö qellqarëkanqanta yarpäriyarqan: “Wayikirëkurmi shonqüqa nina cuentaraq rawranqa”. Peru judïukunaqa, “¿ima señaltataq rikätsiyämanki tsëkunata ruranëkipaq derëchuyoq kanqëkita rikäyänäpaq?” nirmi Jesusta tapuyarqan. Pënam kënö nirqan: “Kë templuta juchuratsiyë, y kima junaqchömi sharkatsimushaq” (Juan 2:17-19; Salmus 69:9).

Jerusalen templupaq parlëkanqanta pensarmi judïukunaqa Jesusta kënö niyarqan: “Kë templuqa chusku chunka joqta (46) watakunachömi rurashqa kashqa, y ¿tsëtsuraq qamqa kima junaqllachö sharkatsimunki?” (Juan 2:20). Peru templu nirqa, Jesusqa cuerpumpaqmi parlëkarqan. Tsëmi kima wata pasarinqanchö, wanushqakunapita sharkatsimushqa kariptin, tsënö nishqa kanqanta qateqninkuna yarpäriyarqan.