Jesús templota limpian

ALLÄPA piñashqam këchö Jesús këkan. ¿Imanir-raq musyankiku? Jerusalén Diospa templonchö alläpa mallaqäkoq nunakuna kayaptinshi. Teyta Dios adoraq nunakuna shayämuptinshi alläpa qellëninkunata horqapëkuyaq.

¿Rikankiku tsëchö palömakunata, üshakunata y novïllokunata? Kë kikin templo rurinchöshi rantikïkäyänaq kë nunakunaqa tsë animalkunata. ¿Imanir-raq musyankiku? Teyta Diospaq sacrificiota rurayänampaqshi animalkunatapis y pishqukunatapis necesitäyan kë israelïtakunaqa.

Mana allita rurarerqa huk israelïtaqa ley nenqannöshi huk sacrificiota ruranan kanaq Teyta Diospaq. Hina hukläya sacrificiokunatapis israelïtakunaqa rurayaqshi. Pero ¿mëchöraq sacrificiota rurayänampaqqa animalkunata, pishqukunata tariyänan karqa?

Kikinkunapash wakinkunapaqa kayäpoq animalninkuna sacrificäyänampaq. Pero wakin israelïtakunapaqa manash pishqunkuna ni ima animalninkuna kayäpoqtsu. Y wakinnash temploman animalkunata apamïta puëdeyaqtsu Jerusalenpita karuchö tärarnin. Tsëshi wakin nunakunaqa kë temploman shamïkur rantiyaq pishqukunata y animalkunatapis. Pero kë nunakunaqa alläpa chaniyoqchöshi rantikïkuyaq animalkunata. Tsënöpash nunakunata alläpa suwapëkuyaq. Hinamampis manash kë kikin Teyta Diospa templonchöqa rantikuyanmantsu.

Tsëshi Jesusqa alläpa piñëkunaq. Y mësakunatapis limpu tikrakacharkurshi qellëkunatapis ramakacharkamunaq. Animalkunatapis waskawan sheqir sheqirshi limpu qarqaramunaq templopita. ‘¡Këpita këkunata horqayë. Y ama Teytäpa wayinta qatuna wayikunatanö rurayëtsu!,’ nishpash mandarinaq paloma qatoqkunatapis.

Y kë Jerusalén templochöshi wakin Jesuspa qateqninkunapis këkäyänaq. Jesús ruranqanta rikarshi mantsakäyänaq. Tsënash: ‘Diospa wayin kuyëninqa ninanöran rawrärenqa,’ nishpa Biblia Teyta Diospa Tsurimpaq nenqanta yarpäriyänaq.

Y atska milagrokunatash ruranaq Jesusqa Jerusalén Pascuachö këkarnin. Tsëpitanash, Jesusqa Galilëaman kutimur qallëkamunaq Judëapita yarqurïkur. Pero Samaria nishqan distrïtopash pasamunaq. Mä rikärishun imash tsëchö pasanaq.