Jesusqa templuchö rantikoqkunatam qarqurqan

Jesusqa 30 watachömi abril killamampa Jerusalenman ëwarqan. Y mëtsikaq nunakunam Pascua Fiestata celebraq ëwashqa kayarqan. Tsë fiestachömi animalkunata templuchö Diospaq rupatsiyaq. Wakinkunaqa kikinkunapa animalninkunatam apayaq, peru wakinqa jinan Jerusalenchömi rantiyaq.

Templuman Jesus chärinampaqmi, nunakunaqa animalkunata tsëchö rantikur këkäyänaq. ¡Jehoväta adorana wayichömi rantikur këkäyänaq! ¿Imatataq Jesus rurarqan? Juk chikutita rurëkurmi üshakunata y wäkakunata templupita qarqurqan, y qellë cambiaqkunapa qellëninkunata y mësankunatam jitar usharqan. Y paluma rantikoqkunatam kënö nirqan: “¡Kë llapanta këpita jipiyë! ¡Amana Teytäpa wayinta mercäduman tikratsiyëtsu!”.

Templuchö këkaq nunakunaqa Jesus ruranqanta espantashqam rikaräyarqan. Y qateqninkunaqa Diospa Akrashqampaq kënö qellqarëkanqantam yarpäyarqan: “Wayikita alläpa kuyaptïmi, shonqüqa nina rupaqnöraq achachanqa”.

Tiempu pasariptinnam, 33 watachö templuta Jesus yapë limpiarqan. Manam permitirqantsu Teytampa wayinchö pï nunapis munëninta rurakunanta.