Diospa ishkë willakïninkuna

Bibliachö llapan qellqarëkaqqa Diospa willakïninmi. Ciëluchö Teytantsikqa tsëta qomarquntsik imëkata yachatsimänapaqmi. Angel Gabrieltawan ishkë precisaq willakïkunata Diosnintsik willatsinqampitaqa, ishkë waranqa watanam pasarishqa, tsëpitam yachakushun. “Diospa amänunchö y nöpanchö shäraq” angel kanqantam Bibliaqa nin (Lücas 1:19). ¿Imëtaq y mëchötaq tsë precisaq willakïkunata angel Gabriel willakurqan? ¿Y pikunatataq willarqan?

Jesus shamunampaq kima watanö pishikaptinmi, angel Gabrielqa punta kaq willakïta willakurqan. Jehoväta sirweq Zacarïas sacerdötiqa Judëa markapa jirkanchömi tärarqan, itsachi Jerusalenpa amänunchö. Pëwan warmin Elisabetqa edänam kayarqan y manam wamrankuna karqantsu. Juk kutim Jerusalen templuchö Zacarïasqa sacerdöti rurëninta rurëkarqan. Templupa santu cuartunchö këkaptinmi, inciensuta rupatsiyänan altarpa lädunchö illaqpita angel Gabriel yurirkurqan.

Tsëmi Zacarïasqa alläpa mantsakarqan, peru tsë angelqa kënömi nirqan: “Ama mantsakëtsu Zacarïas, porqui rogakunqëkitam Dios wiyashqa, tsëmi warmiki Elisabet juk ollqu wamrata qeshpikunqa, y Juan nirmi jutin churanki”. Jina “pëqa alläpa precisaq nunam Jehoväpa rikëninchö kanqa” nirqanmi. Y Jehoväpaq juk markata alistanampaqpis nirqanmi (Lücas 1:13-17).

Zacarïaswan Elisabet wamrayoq kayänampaqqa edänam kayarqan, tsëmi angel ninqantaqa creirqanllatsu. Tsëmi angel Gabrielqa kënö nirqan: “Müdum tikrarinki y manam parlëta puëdinkitsu këkuna pasakunqan junaqyaq, porqui manam ninqaqkunata creirqunkitsu” (Lücas 1:20).

Tsëyaqmi waqtachö nunakunaqa Zacarïas yarqamoqta mana rikar tapunakur qallëkuyarqan. Y yarqaramurqa pëqa manam parlëta puëdirqantsu. Makinwan sëñasta rurarllam nunakunata parlaparqan. Pipis mana rikashqa kanqanta Santu cuartuchö Zacarïas rikanqantam nunakuna cuentata qokuriyarqan.

Templuchö rurëninta usharirmi Zacarïasqa wayinta kutikurqan. Tsëpita ichik tiempullatanam Elisabetqa qeshyaq tikrarirqan. Wamran yurinqanyaqmi ni mëtapis yarqurqantsu y pitsqa killapam wayinllachö kakurqan.

Tsëpitanam angel Gabrielqa yapë yurirkurqan. ¿Pï kaqman? Galilëa kinrëchö Jerusalenpa uma kaq lädunchö Nazaret markachö täraq Marïa jutiyoq shipashman. ¿Imataq nirqan? “Diospa rikëninchömi alli këkanki. Y ¡rikë!, qeshyaqmi tikrarinki, y juk wamratam qeshpikunki, y Jesus nirmi jutin churanëki. Pëqa precisaqmi kanqa, y Llapampa Janampa Këkaqpa Tsurin nirmi reqishqa kanqa [...], y Jacobpa mirëninkunatam Reynö imëyaqpis gobernanqa, y Gobiernunqa manam ni imëpis ushakanqatsu” (Lücas 1:30-33).

Angel Gabrielqa alläpachi kushikurqan tsë willakïkunata willakurnin. Qateqnin kaq yachatsikïkunachömi rikäshun Diospa kë ishkan willakïninkuna imanir alläpa precisaq kanqanta.