Milagrukunata rurëkaptimpis Nazaretchö wiyëta munayantsu

Decäpolispita kutinqan junaqqa, Jesusqa yawar ëwëwan qeshyaq juk warmitam kachakätsirqan y Jairupa warmi wamrantam kawaritsirqan. Peru tsë junaqqa maskunataran rurarqan. Jairupa wayimpita yarquriptinmi, “ankupëkalläyämë Davidpa Tsurin” nirnin ishkaq wisku nunakuna Jesuspa qepanta ëwayarqan (Mateu 9:27).

Jesusta “Davidpa Tsurin” nirqa, Davidpa gobernar täkunanman täkunampaq kaqta y Mesïas kanqantam creiyarqan. Sinchipa qayëkäyaptimpis, Jesusqa manam cäsurqantsu, itsachi imë hörayaq tsënö qayakur kayänampaq kaqta musyëta munarqan. Peru pëkunaqa qayakurmi sïguiyarqan. Juk wayiman yëkuriptimpis, qepantam yëkuriyarqan. Tsënam Jesusqa, “¿markäkuyankiku nawikikunata kichëta puëdinqäman?” nir tapurqan. Pëkunanam, “awmi Teytë” nirnin contestayarqan. Tsënam Jesusqa, nawinkunata yatëkur, “markäkuyanqëkimannö rurakätsun” nirqan (Mateu 9:28, 29).

¡Jinan höram nawinkunaqa kichakärirqan! Juk kutikunachö ninqannöllam, Jesusqa pëkunapaq ruranqampita pitapis mana willakuyänampaq nirqan. Peru pëkunaqa chipyëpa kushishqam këkäyarqan, tsëmi pï mëta Jesuspita willakuyarqan.

Tsë nunakuna yarquriyanqanllachömi, supëyoq mana parlëta puëdeq nunata Jesus kaqman apayarqan. Supëta qarquriptinmi, tsë nunaqa parlar qallëkurqan. Tsëta rikëkurmi, alläpa espantakur kënö niyarqan: “Israelchöqa manam ni imëpis kënöqa pasakushqatsu”. Jina tsëchöqa wakin fariseukunapis këkäyarqanmi. Y tsë milagrukunata Jesus rurashqa kanqanta neguëta mana puëdirmi, yapë kënö acusayarqan: “Supëkunata gobernaqpa yanapakïninwanmi pëqa supëkunata qarqun” (Mateu 9:33, 34).

Tsëpitanam, winanqan Nazaret markaman qateqninkunawan Jesusqa ëwakurqan. Juk watanönam pasarishqa tsë markachö këkaq Diospa adorayänan wayichö yachatsikunqampitaqa. Tsë kutiqa, llapankunam yachatsikunqampita espantakuyarqan, peru tsëpitaqa, alläpam piñakuyarqan y wanutsitam munayarqan. Peru Jesusqa yapëmi pëkunata yachatsir yanapëta tïrarqan.

Yapëmi säbadu junaqchö Diosta adorayänan wayichö yachatsikoq ëwarqan. Mëtsikaqmi imanö yachatsikunqampita espantakur kënö tapunakuyarqan: “¿Mëchötaq kë nunaqa tsëläya yachëyoq tikrashqa, y pitaq kë milagrukunata ruranampaq podernin qoshqa? ¿Manaku pëqa carpintërupa tsurin? ¿Manaku mamänimpa jutinqa Marïa, y wawqinkunapana Santiägu, Josë, Simon y Jüdas? Y paninkunapis, ¿manaku llapankuna noqantsikkunawan këkäyan? Tsëqa, ¿pitaq kë nunata tsë llapankunata qoshqa?” (Mateu 13:54-56).

Tsë nunakunaqa tsë markapita wakin nunakunatanöllam Jesusta rikäyaq. Kënömi pensayaq: “Noqantsikwan winashqa këkarqa, ¿imanöpataq Mesïas kanman?”. Tsëmi, alläpa yachaq kanqanta y milagrunkunata rikëkarpis, wiyëta munayarqantsu. Kastankunapis manam Mesïas kanqantaqa creiyarqantsu. Tsëmi Jesusqa, “Diospa willakoqninqa më tsëchöpis respetashqam, peru markanchö y wayinchöqa manam” nirqan (Mateu 13:57).

Jesusqa alläpam espantakurqan Nazaret marka nunakuna mana markäkoq kayanqampita. Tsëmi tsëchöqa, “atska milagrukunata rurëta puëdirqantsu, sinöqa, juk ishkë qeshyëkaqkunallamanmi makinta churarqan y kachakätsirqan” (Marcus 6:5, 6).