Jatun mikïman invitashqakuna

Jesusqa fariseupa wayinllachöran këkarqan, y hidropesïa qeshyayoq nunatam kachakäratsishqa karqan. Y tsëchömi mikï höra wakin invitädukuna mas precisaq sitiukunata akraqta rikarqan, tsëmi humildi këpaq alläpa precisaq yachatsikïta yachatsikurqan.

Kënömi nirqan: “Pipis casakï mikïman convidashuptikiqa, ama mas alli kaq sitiumanqa täkïtsu. Itsapis pëqa qampitapis mas precisaqta convidashqa kanman. Tsënam convidayäshoqniki kaq shamunqa, y kënö nishunki: ‘Qam tëkanqëkichö kë nuna täkunanta jaqi’. Tsënam, penqakur ultimu kaq sitiuman täkoq ëwanki” (Lücas 14:8, 9).

Jina kënömi nirqan: “Pipis convidashuptikiqa, ëwë y ultimu kaq sitiuman täkï, tsënöpa convidashoqniki shamur, kënö nishunëkipaq: ‘Amïgu, mas alli kaq sitiuman shamï’. Tsëqa llapan convidashqakunapa nöpanchömi mas respëtuwan rikashqa kanki”. Jesusqa manam respetakoq këllatatsu yachatsikïkarqan; sinöqa tsëpitapis mas precisaqtaran, tsëmi kënö entienditsikurqan: “Porqui llapan precisaq tukoq kaqkunam, penqakatsishqa kayanqa, y pipis qollmi shonqu kaqqa, precisaqpaq churashqam kanqa” (Lücas 14:10, 11). Jesusqa llapan wiyëkaqkunatam humildi kayänampaq nikarqan.

Tsëpitanam, wayinman convidaq fariseuta alläpa precisaq yachatsikïta yachatsirqan. Diosta kushitsinampaq pikunata mikoq invitanampaqmi kënö nirqan: “Mikïman o cënaman convidakurqa, ama amïguïkikunata, wawqikikunata, kastëkikunata ni kapoqyoq vecïnïkikunata convidëtsu. Tsëta ruraptikiqa itsa imëllapis rantinta pëkunapis convidayäshunki, y tsënöpa kutitsiyäshunki. Peru jatun mikïta rurarqa, waktsakunata, lisiädukunata, cöjukunata y wiskukunata convidë, y kushishqam kanki, porqui pëkunapaqa manam kutitsiyäshunëkipaq imankunapis kantsu” (Lücas 14:12-14).

Jesusqa manam amïgukunata, kastakunata o vecïnukunata convidë mana alli kanqantatsu nikarqan. Tsëtaqa pï mëmi ruran. “Waktsakunata, lisiädukunata, cöjukunata y wiskukunata convidë” nirqa, tsënö ruranqampita Diospita bendicionta chaskinampaq kaqtam rikätsikïkarqan. Tsë fariseutam kënö nirqan: “Tsëta ruranqëkipitam alli kaqta ruraqkuna kawariyämuptin Dios kutitsishunki”. Y Jesus tsënö ninqanwan acuerdu karninmi, tsëchö mikïkaqkunapita juk kënö nirqan: “Kushishqam Diospa Gobiernunchö mikoq kaqqa” (Lücas 14:15). Tsë nunaqa Diospa Gobiernunchö këqa alläpa kushikïpaq kanqantam cuentata qokurirqan. Peru manam llapankunatsu agradecikoqqa kayarqan. Tsëmi Jesusqa kë igualatsikïta churarqan:

“Juk nunam juk jatun mikïta rurarqan, y mëtsikaqtam convidarqan. Y mikï höram sirweqninta kacharqan convidashqakunata kënö ninampaq: ‘Shayämï, porqui llapampis listunam këkan’. Peru mana ëwayänanrëkurmi llapankuna tsapäkur qallëkuyarqan. Punta kaqmi kënö nirqan: ‘Juk chakratam rantirqö y tsëta rikaqmi ëwanä; tsëmi shamïta puëdillämushaqtsu’. Y juknam kënö nirqan: ‘Pitsqa par törukunatam rantirqö, y tsëkunata rikaqmi ëwanä; tsëmi shamïta puëdillämushaqtsu’. Jina juk masmi kënö nirqan: ‘Tsëran casakurirqö, tsëmi ëwëta puëdishaqtsu’” (Lücas 14:16-20).

¡Ardëmi tsënöqa nikäyarqan! Juk chakrata o juk animalta manaraq rantirmi pipis rikaqqa ëwan, tsëmi yapë rikaq ëwananqa precisarqantsu. Y juknin kaqqa manam casakunampaqtsu alistapakïkarqan. Casakushqanam karqan, tsëmi imanir ëwëta mana puëdinqampitaqa ni imanöpis tsapäkïta puëdeqtsu. Convidaqninkuna tsënö tsapäkuyanqanta wiyarirmi, alläpa piñakur sirweqninta kënö nirqan:

“Jinan höra ëwë markapa mas precisaq kaq näninkunaman y llanu cällinkunaman, y tsëpita apamï lisiädukunata, wiskukunata y cöjukunata”. Sirwipakoqninqa tsënömi rurarqan, peru mas sitiukunaqa karqanran. Tsëmi patronninqa kënö nirqan: “Ëwë jatun nänikunaman y llanu nänikunaman, y imëkanöpa änitsir nunakunata yëkatsimï, tsënöpa wayï junta kanampaq. Porqui këtam qamkunata niyaq: tsë llapan convidashqa nunakunapitaqa manam ni mëqampis ruranqä mikïta llaminqatsu” (Lücas 14:21-24).

Jesus churanqan igualatsikïqa rikätsikurqan, Gobiernunchö kayänampaq Jesusta utilizarnin nunakunata Jehovä invitëkanqantam. Puntataqa judïukunam tsë invitacionta chaskiyarqan, y masqa pushakoq religiösukunam. Peru Jesus sagrädu rurëninta ruranqan witsanqa, cäsi llapanmi tsë invitaciontaqa chaskikuyarqantsu. Tsëmi jukkunata invitarqan. Ishkë kaq grüpuchöqa despreciashqa judïukuna y judaismu religionman yëkushqakunam këkäyarqan. Y kima kaq grüpuchönam, mana judïu kaqkuna këkäyarqan (Hëchus 10:28-48).

Awmi, Jesuswan mikïkaq nuna ninqannömi, “kushishqam Diospa Gobiernunchö mikoq kaqqa” kanqa.