Tapukïkuna kaq

◼ ¿Discursokunata grabëkur o grabacionpita qellqëkur pï mëtapis qoshwantsuraq?

Bibliapita discursokunaqa kushitsimantsik y kallpatam qomantsik (Hech. 15:32). Tsëmi höraqa reunionman mana shamushqa kaqkuna discursota wiyariyänanta munarintsik. Kanan witsanqa, discursokunata grabanapaq y wakinkunaman ras chäratsinapaqmi tukï yarqamun. Wakinkunaqa amïgonkunata prestayänampaq o grabayäpunampaqmi, atska grabashqa discursokunata y unë wata kaqkunata katsiyan. Wakinkunanäqa Internetmanmi discursokunata churayashqa, tsëpita munaq kaqkuna horqakuyänampaq.

Pero manam pipis michäkuntsu discursokunata kikimpaq o familiampaq grabayänantaqa. Hinamampis, qeshyar reunionman mana ëwëta puëdeq wawqikunapaq panikunapaqpis anciänokuna grabatsiyanmanmi. Tsëpis, discursokunata grabëkur o grabacionpita qellqëkur manam pï mëtapis qonantsiktsu.

Congregacionchö wanayanqanmannömi discursokunataqa rurayan, tsëmi pi mëpa makinman chaptinqa, itsa imanir tsëpaq parlanqanta mana musyar discursopa wakin yachatsikïninta mana allipa rikäyanman. Hinamampis rasumpa y kanan yachakunqantsiknö kanqanta musyanapaqqa, pï, y imë discursanqanta musyanantsik sasaraqmi kanman (Luc. 1:1-4). Y discursokunata grabëkur y grabacionpita qellqëkur pï mëtapis qoshqaqa, itsa discursaqta wakinkuna alabar qallëkuyanman (1 Cor. 3:5-7).

Mäkoq mäkoq cumplido sirveqqa, imëpis trabajëkanmi “alli” y ‘öranchö micuycunata garamänapag’ (Luc. 12:42, NTCN). Congregacionchö discursokuna rurayämunqan, y Internet www.jw.org. nishqanchö grabacionkunata horqunapaq churayämunqanmi mikï cuenta kayan. Mäkoq mäkoq cumplido sirveq, y Jehoväpa Testïgonkunapa Pushaqninkuna alli tsarakunapaq wananqantsikta höranchö qomänapaq kaqta musyantsikmi (Hech. 16:4, 5).