Wiyanapaq grabacionkunata utilizäshun
1. Leyinapaq publicacionkuna këkaptimpis, ¿ima yanapakï mastaq kapamantsik?
1 Internetchö jw.org/que neq pagïnantsikchömi mëtsikaq nunakuna alli yachatsikïta leyirnin yanapakïta tariyan (Ecl. 12:10). Y qamqa, ¿wiyarqunkinaku wiyanapaq grabacionkunata? Kë päginantsikchö këkaq cäsi llapan publicacionkunam wiyanapaq grabacionchö kan. ¿Imachötaq yanapakun?
2. ¿Imanötaq grabacionkunata utilizashwan japallantsik y familiantsikwan estudianantsik hörapaq?
2 Japallantsik y familiantsikwan estudianantsikpaq. Viajëkar o imatapis rurapakïkar wiyanapaq grabacionchö Bibliata, revistakunata o juk publicacionkunata wiyëkarqa tiempuntsiktam alli provechëkantsik (Efes. 5:15, 16). Jina Familiachö Diosta Adorana Hörachöpis wiyanapaq grabacionta wiyar wiyarmi imprimishqa publicacionchö leyir qatita puëdintsik. Y japallantsik estudianqantsik hörachöpis wiyanapaq grabacionqa yanapamäshun leyita mas yachakunapaq o juk idiömata mas yachakunapaqmi.
3. Yachatsikunqantsikchöqa, ¿pikunatataq mas yanapëta puëdin wiyanapaq grabacionkuna?
3 Yachatsikunapaq. Yachatsikurnin publicacionta jaqipïta munashqaqa mëtsikaqmi leyiyänampaq tiempunkuna mana kanqanta nimantsik, peru itsa munariyanqa juk grabacionta wiyaritaqa. Wakinkunaqa mana parlanqantsik idiömatam parlayan, peru itsa idiömanchöqa wiyarita munayanqa Diospa alli willakïninta (Hëch. 2:6-8). Wakin markakunachöqa precisanmi imatapis wiyëqa. Tantiyarinapaq, hmong markapa costumbrinqa unë pasakunqankunata teytakuna wamrankunata willayanqanmi, y tsëqa yanapan wiyayanqanta fäcil-lla yarpäyänampaqmi. Africachöpis willakïkunata wiyar yachakïqa mëtsikaq nunakunatam alläpa gustan.
4. ¿Ima tapukïkunatataq puntata rurakushwan yachatsikunqantsikchö grabacionkunata utilicëta munarqa?
4 Yachatsikunqëki territoriukunachö, ¿allitsuraq kanman wiyashoqniki nunata wallka tiempullachö idiömanchö grabacionta wiyaratsinqëki? ¿Reqinkiku pillatapis corrëu electrönicupa wiyanapaq grabacionta aparatsishqa yanaparinampaq kaqta? Maslla yachakï munaq nunata, ¿yanapanmantsuraq CD-man jorqarïkur wiyanapaq grabaciontawan imprimishqa publicacionta juntu qaranqantsik? Wiyanapaq grabacionchö libruta, follëtuta, revistakunata o tratädukunata qarakurninqa informintsikmanmi qellqashwan. Tsë grabacionkunaqa manam japallantsik estudianqantsik hörachö utilizänallapaqtsu, sinöqa Diospita yachatsikunapaqwanmi (1 Cor. 3:6).