Noë kawanqan tiempuqa imëka mana allikunatam nunakuna rurayaq (Genesis 6:5).

Adanpawan Ëvapaqa wamrankunam karqan, tsëmi Patsachöqa mëtsika nunakuna mirar qallëkurqan. Y mëtsika angelkunam Diabluta qatir Diospita rakikäyarqan y contran churakäyarqan.

Tsë angelkunaqa warmikunawan casakuyta munarmi Patsaman uräyämurqan y nunaman tikrayarqan. Pëkunapa tsurinkunaqa alläpa chikikoq y wakinkunapitapis mas kallpayoqmi kayarqan.

Entëru Patsachömi nunakunaqa mana allita ruraqlla kayarqan. Bibliachömi nin “entëru patsachö nunakuna imëka mana allikunata rurëkäyanqanta” y mana alli rurëkunallaman imëpis pensëkäyanqanta.

Teyta Dios mandanqanta wiyakurmi Noëqa juk arcata rurarqan (Genesis 6:13, 14, 18, 19, 22).

Noëqa alli nunam karqan. Teyta Jehovämi Noëta nirqan alläpa tamyawan mana alli nunakunata ushakätsinampaq kaqta.

Qerupita aynaq o kaskaq jatun cäjata ruranampaqmi Diosqa Noëta nirqan. Tsëtam Noëpa arcan nir reqiyan. Tsëmanmi yëkatsinan karqan familianta y tukuyläya animalkunata.

Alläpa tamya kanampaq kaqtam Noëqa llapan nunakunata willarqan, peru manam wiyakuyarqantsu. Wakinkunaqa burlakurmi asikuyarqan, y wakinkunanam cölerakuyarqan.

Arcata rurar usharirnam, Noëqa llapan animalkunata yëkatsirqan.

Teyta Diosqa mana alli nunakunata ushakätsirqanmi, peru Noëtawan familiantaqa salvarqanmi (Genesis 7:11, 12, 23).

Cuarenta junaq y cuarenta paqasmi yakupis Patsaman juntanqanyaq tamyarqan. Tsëchömi llapan mana alli nunakuna wanuyarqan o wañuyarqan.

Mana alli angelkunaqa nunanö cuerpunkunata dejarirmi, Diabluman qaqäyarqan. Pëkunaqa demoniukunam kayan.

Arca rurinchö këkaqkunallam salvakuyarqan. Tiempuwanqa Noëwan familian wanuyarqanmi, peru Teyta Diosqa kawaritsimunqam y manana wanurmi kawakuyanqa.

Teyta Diosqa ichikllachönam yapë mana alli nunakunata ushakätsinqa y alli ruraq nunakunataqa salvanqam (Mateu 24:37-39).

Diabluwan demoniukunaqa imëkatam rurëkäyan nunakuna Jehoväta mana wiyakuyänampaq.

Kanan tiempupis Noëpa tiempunchönöllam nunakunaqa Jehovä Diosta wiyakuyta munayantsu. Ichikllanam pishin llapan mana alli nunakunata Teyta Jehovä ushakätsinampaq (2 Pëdru 2:5, 6).

Noënö alli nunakunaqa kanan tiempupis kanmi y Dios ninqantam cäsukuyan. Pëkunaqa Jehoväpa testïgunkunam kayan.