Alli willakï më tsëman chan

PABLU cristiano këman chärirmi, Diospa Gobiernompita kushishqa yachatsikurqan. Pero kananqa kikintanam chikiyänan karqan. Pëqa karu markakunapam viajaq Diospa Gobiernonlla nunakunata shumaq paraïsoman kutitsinampaq kaqta willakurnin.

Punta kaq viäjenchöqa, Listra markatam watukarqan, y tsëchömi cojo yurikushqa nunata kachakätsirqan. Pabluwan Bernabe rurayanqanta nunakuna rikëkurnam, dioskunam kayan niyarqan. Y imëka sacrificiokunatam rurëta munayarqan, pero pëkuna mana permitïkuyaptinnam, Pablupa chikeqninkunaman qaqar qallëkuyarqan y rumiwan tsampiyarqan o samgayargan. Wanushqanam nikäyaptimpis apostolqa kawëkarqanran, y tiempowanqa tsë markaman kutïkurmi Jesuspa qateqninkunata yanaparqan.

Y tsëpitanam wakin judío cristiänokuna niyarqan mana judío cristiänokunapis Moises qellqanqan wakin Leyta casokuyänampaq. Tsëta altsayänampaqnam, Pablu Jerusalenchö apostolkunaman y anciänonkunaman ëwarqan. Y pëkunam Diospa Palabranta alli estudiarir y santo espïritupa yanapakïninta mañakurir congregacionkunaman cartakuyarqan, tsëchömi mandakuyarqan ïdolokunata mana adorayänampaq, yawarta, ni yawaryoq ëtsata mana mikuyänampaq y jukwan jukwan mana pununakuyänampaq. Tsëkunata cumpliyänanqa alläpam ‘presisarqan’, pero Moises chaskinqan Leytaqa mananam qatiyänannatsu karqan (Hechos 15:28, 29).

Ishkë kaq viäjenchönam, kanan Grecia nacionchö këkaq Berea markata Pablu watukarqan. Tsëchö täraq judïokunaqa allim wiyakuyarqan, y yachakuyanqan rasumpa kanqanta musyayänampaqmi Diospa Palabranta cada junaq yachakuyaq. Pero tiempowanqa, Pablu yapëmi chikeqninkunapita escaparqan. Y Atënasman chärirnam, alli yachaq nunakunapaq shumaq y respëtowan discursarqan.

Kima kaq viäjenta usharirllam Pabluqa Jerusalenta ëwakurqan. Temploman chäriptinnam, chikeqninkuna wanutsita tïrayarqan. Pero romano soldädokunanam washäyarqan y tapupäyänampaq apakuyarqan. Romano nuna kaptinmi permitiyarqan gobernador Fëlixwan parlanampaq. Ulikurkur o llullakurkur tumpayanqampita manam judïokunapa pruëbankuna karqantsu. Tsënö këkaptimpis, Fëlixpa rantin gobernador yëkoq Festuqa judïokunata entreguëkïtam munarqan. Y tsëta mana munarnam apostolqa mañakurqan Cësar-raq tsë problëmata rikänampaq, tsënam gobernador Festuqa nirqan: tsëpinqa “cesarman ew[ë]” (Hechos 25:11, 12).

Tsë juicioqa Römachömi rurakänan karqan. Tsënam Pabluqa Italia nacionta barcowan viajarqan, pero lamarchö hundikäriptinmi, alalë witsan Malta nishqan islachö quedakurqan. Y Römaman chärirnam, ishkë watapa juk wayita arrendëkur täkurqan. Guardiakuna mëläya täparëkäyaptimpis, Pabluqa kushishqallam këkarqan y llapan watukaqninkunatam Diospa Gobiernompita yachatsirqan.

(Hechos 11:22–28:31 textokunapita jorqashqam.)