Tapukïkuna kaq

◼ ¿Imatataq wamrakuna yachakuyanman Diospa kaqchö poquyänampaq?

Cristiänu teytakunaqa kallpachakïkäyan Jehovä mandakunqanmannö wamrankunata wätayänampaqmi (Efes. 6:4). Llapan junaqkuna Bibliapita yachakunapaq follëtutam cada qoya leyiyan y alli kanqantam cuentata qokuyashqa. Familiachö Diosta Adorana Hörachö y juk kutikunapis, wakin familiakunaqa rikäyan y yachakuyan juk vidëupitam. Jina yachakuyan Los jóvenes preguntan nishqan yachatsikïkunapitam y Bibliapa willakïninmannömi actuayan o imanö yachatsikuyänampaqpis demostracionta rurayanmi. Peru wamrakuna poqu cristiänu kayänampaqqa, Bibliapa mas sasa (aja) kaq yachatsikïninkunatapis yachakuyänanmi (Heb. 6:1).

Territoriuntsikchö nunakunata imapita yachatsinqantsikman pensarishun. Punta visïtachö o watukaq kutirnimpis, Rasumpëpaqa, ¿imatataq Biblia yachatsikun? libruwanmi estudiu biblicuta qallëta procurantsik y usharirnam, “Dios Yayapa kuyakïninchö imëpis kawakuyë” libruwan yachatsir sïguintsik. Porqui Yachatsikun libruta estudiarqa Bibliapa precisaq yachatsikïninllatam yachakuyan, peru “Dios Yayapa kuyakïninchö” libruqa yanapanqa yachakuyanqanmannö kawayänampaqmi. Tsëkunam yanapanqa fëninkuna “alli firmi patsacashqa” kanampaq (Col. 2:6, 7). Allim kanman teytakunapis wamrankunata tsë librukunawan yachatsiyanqanqa, porqui pëkunapis wanayanmi rescätipita, Diospa Gobiernumpita, wanushqakuna imanö këkäyanqampita, sufrimientu kananta Dios imanir permitinqampita y ushanan junaqkunachö kawëkanqantsikta imanir musyanqantsikta yachakïta. Segürum kayänan Testïgunkuna rasumpa kaqta yachatsikuyanqanta, Bibliapa musyatsikïninkunatam entiendiyänan y ‘ima alli o mana alli cangantam’ yachakuyänan (Heb. 5:14, NTCN). Teytakunaqa cuentachömi katsiyänan wamrankunapa edäninta y mëyaqlla entiendiyänantapis. Mëtsikaq wamrakunam Bibliapa sasa yachatsikïninkunata yachakïta puëdiyashqa (Lüc. 2:42, 46, 47).