Mas alli yachatsikoq kanapaq kallpachakur sïguishun
1. Mas alli yachatsikoq kanapaqqa, ¿imatataq yachakuntsik Punta cristiänukunapita?
1 Cristiänukunaqa mas alli yachatsikoq kanapaqmi kallpachakur sïguinantsik. Tsëmi, mas alli yachatsikoq kayänampaq qateqninkunata Jesus yanaparqan (Lüc. 9:1-5; 10:1-11). Jina tsënöllam Äquilawan Priscïlapis, Apölusta “mas allipa cäyitsiyarqan Diospa alli willaquininta” (Hëch. 18:24-26). Timoteu mëtsika watapana Diospita yachatsikïkaptimpis, mas alli yachatsikoq kanampaqmi Pabluqa yanaparqan, tsënöpa alli yachatsikoq kanqanta ‘llapancuna cuentata qocuyänampaq’ (1 Tim. 4:13-15). Mëtsika watapana Diospita yachatsikïkarnimpis, kallpachakurmi sïguinantsik yachatsikïnintsikchö mas alliyänapaq.
2. ¿Imatataq rurashwan wakin publicadorkunapita yachakunapaq?
2 Wakinkunapita yachakushun. Mas alli yachatsikoq kanapaqqa wakinkuna imanö rurayanqantapis rikänantsik (Prov. 27:17). Tsëmi, yachatsikoq yarqurqa yanaqintsik parlëkaptinqa shumaq wiyanantsik. Jinamampis, alli yachatsikoqkunapa consëjunkunatam mañakunantsik y wiyakunantsik (Prov. 1:5). ¿Sasaku yachakïta munaqkunaman kutinantsik, estudiu biblicuta qallanantsik o maskunachö yanapakunantsik? Tsëqa, grüputa rikaq anciänuwan o juk alli yachatsikoq publicadorwan parlarishun yanapamänantsikpaq. Yarpäshun alli yachatsikoq kanapaqqa santu espïritupis yanapamänapaq kaqta. Tsëmi, Jehoväta imëpis santu espïritunta mañakunantsik (Lüc. 11:13).
3. ¿Imanötaq chaskikushwan consëjuta mana mañakïkashqapis, pillapis consejaramashqaqa?
3 Consëjuta mana mañakïkashqapis, pillapis consejaramashqaqa manam piñakushwantsu (Ecl. 7:9). Apölusnöpis agradecïdu y humildim kashwan, y consejamanqantsikkunatam chaskikushwan. Tsënöpam rikätsikushun yachëyoq kanqantsikta (Prov. 12:15).
4. ¿Imanirtaq precisan mas alli yachatsikoq kanapaq kallpachakur sïguinantsik?
4 Diospa kaqchö poqunqantsikqa Diostam alaban. Alli yachatsikoq kayänampaq discïpulunkunata yanapanqanchömi, Jesusqa juk igualatsikïta utilisarqan. Pë monti cuenta kanqanta y qateqninkuna wayoq räma cuenta kayanqantam nirqan, tsëkunataqa Teytallam shumaq winanampaq y ‘atscata wayünanpaq’ rutupan (Juan 15:2, Noqakunam yanayätsiyarqö). Imanömi juk chakrayoq nuna imëkata ruran montinkuna mas wayunampaq, tsënöllam Jehoväpis munan yachatsikïnintsik mas alli kananta y mas miranantam (Heb. 13:15). ¿Imatataq lograshun mas alli yachatsikoq kanqantsikpita? Jesusmi kënö nin: “Taytä poderöso cangantam llapan runacuna aläbayan, gamcuna imayca alli wayugnö paypa Alli Willacuyninta mas miratsiyaptiqui” (Juan 15:8, NTCN).