Jehoväpa testïgunkunaqa, ¿cristiänu religionku kayan?

“Cristiänu” nirqa reqiyan Jesucristuman creikoqkunatam. Këkunam rikätsikun cristiänu religion kayanqäta:

• Jesucristu yachatsikunqantam cäsukuyä y Dios Yayata pënö adorayänäpaqmi kallpachakuyä (1 Pëdru 2:21).

• Jesucristu noqantsikrëkur wanunqantam yachatsikuyä. Bibliachö ninqannöpis, patsachöqa manam salvamänantsikrëkur Dios akranqan Jesucristupitaqa “jukqa kantsu” (Hëchus 4:12).

• Jesucristupa jutinchömi bautizakuyä (Mateu 28:18, 19).

• Jesucristupa jutinchömi Dios Yayaman mañakuyä (Juan 15:16).

• Jesucristuqa llapan ollqu kaqkunapa dirigeqnin kanqantam creiyä (1 Corintius 11:3).

Tsënö kaptimpis, juk religionyoq kaqkunapis “cristiänu religion” kayanqantam niyan, peru pëkunapitaqa jukläyam kayä. Pëkunaqa creiyan kamakoq Yayawan Jesucristu igual kayanqantam, y jukllëlla kayanqantam, peru Bibliachöqa clärum nin Jesucristuqa Diospa Tsurin kanqanta, y Dios Yayaqa Jesucristupita mas puëdeq kanqanta (Marcus 12:29). Jina noqakunaqa manam creiyätsu wanurishqa almantsik kawar sïguinqanta, o infiernuchö mana upeq ninawan nunakunata Diosnintsik castiganqanta. Jinamampis religionnïkunachö dirigikoqkunataqa manam wakinkunapita mastanötsu rikäyä ni wakinkunapita mas allitsu tratayä. Llapäkunapis igualmi respetanakuyä y kuyanakuyä (Eclesiastes 9:5; Ezequiel 18:4; Mateu 23:8-10).