1 Äninakuyanqëkita qonqayëtsu

¿IMA NINANTAN?

Casakurnin äninakuyanqanta yarpaqkunaqa, imëkatam rurayanqa mana rakikäkuriyänampaq y imëpis kushishqa kayänampaq. Y imëka mana allikunapa pasarnimpis, mana rakikäyänampaqmi kallpachakuyanqa.

Wakin casakoqkunaqa familiankuna y amïgunkuna niyaptinllam juntu kayan. Peru tsërëkurtsu manam juntuqa kayänan, sinöqa kuyanakurnin y respetanakurmi.

BIBLIACHÖ YACHAKUNQANTSIK: “Qowaqa manam warminta jaqirinmantsu” (1 Corintius 7:11).

Mïca nunam kënö nin: “Äninakunqantsikta casädukuna yarpashqaqa, manam imallapitapis piñakushuntsu y llakitsinakurnimpis perdonanakushunmi. Y manam imallapis pasariptin rakikäkurishuntsu”.

¿IMANÖTAN YANAPAMANTSIK?

Casakuyanqan junaq äninakuyanqanta mana yarpaq casakoqkunaqa, mana allikunapa pasarqa manana kuyanakuyanqantam yarpar qallëkuyan. Tsëmi imëkanöpapis rakikäkurita munayan.

Jimmi kënö willakun: “Mëtsikaq nunakunaqa casakuyan rakikëman yarpëkarnam. Tsënö yarpëkar casakushqaqa, manam casakur änikunqantsikta cumplikashwantsu”.

¿IMATATAN RURANKIMAN?

KËKUNAMAN YARPË:

¿Imatatan rurankiman majëkiwan piñatsinakurqa?

• ¿“Imanir-raq pëwan casakurqä” ninkitsuraq?

• ¿“Jukwan casakushqa karqa mas allichi kawaküman karqan” ninkiku?

• ¿“Dejarikurnikim ewkushaq y mas kuyamaq warmita o nunatam ashishaq” ninkiku?

Kë tapukuykunapita mëqanllatapis “awmi” nishqa karqa, casakur änikunqëkita cumplinëkipaq kallpachuy.

WARMIKIWAN O NUNËKIWAN PARLANËKIPAQ

• ¿Imanirtan casakur äninakuyanqëkita cumplikäyankinatsu?

• ¿Imatan yanapayäshunki äninakuyanqëkita mana qonqëkuyänëkipaq?

KËKUNAM YANAPASHUNKI:

• Kuyanqëkita rikätsinëkipaq majëkipaq cartata qellqari.

• Majëkipa fötunta mëta ëwarpis katsi.

• Mëchö këkar y imata rurëkarpis majëkitaqa llapan junaqkuna qayë.

BIBLIACHÖ YACHAKUNQANTSIK: “Juk yüguman Dios juntanqantaqa, ama ni pipis rakitsuntsu” (Mateu 19:6).