3 KAQ YACHATSIKÏ
Jehovämanmi Rahabqa creirqan
Canaanchö këkaq Jericö markaman yarpärishun. Tsë markachö täraq nunakunaqa manam Jehoväman creiyaqtsu. Peru tsëchömi Rahab jutiyoq warmi täraq y pëqa Jehovämanmi creirqan.
Wamra kanqampita patsëmi, Jehovä ruranqankunapita nunakuna parlayanqanta Rahabqa wiyashqa karqan. Chikikoq egipciukunapita israelïtakunata jorqamunampaq Moisesta imanö utilisanqanta, y ¡hasta puka lamarta kicharinqanta! Peru kananqa juk noticiatam wiyarin. ¡Israelïtakunam Jericöpa lädunchöna këkäyan!
Rahabqa musyapakoqkunata yanaparqan Jehoväman creirninmi
Juk paqasmi, ishkaq israelïtakuna rikapakoq Jericöman yëkuriyan. Rahabpa wayinmanmi chäyan y pënam posadatsin. Tsëta Jericöpa reynin musyarirnam, nunankunata (runankunata) mandarin musyapakoqkunata tsariyänampaq. ¿Imatataq Rahabqa ruran? Wayimpa altusninmanmi pakärin, y nïkurmi reypa nunankunata nin: “Musyapakoqkunaqa ëwakuyashqanam, qatiparninqa taripäriyankim”. ¡Tsënömi Rahabqa ishkan israelïtakunata salvarin! ¿Imanirtaq tsënöqa tsapëkurqan?. . . Porqui Jehovämanmi crein. Musyanmi Jericöta y Canaanchö këkaq markakunata ushakätsiyänampaq Jehovä yanapanampaq kaqta.
Manaraq ëwakurninmi, musyapakoqkunaqa Rahabta awniyan, Jericö ushakaptin pë y familiankuna salvakuyänampaq. Peru tsëpaqqa, Rahabqa mandayanqantaran ruranan karqan. ¿Imatataq mandayarqan?. . . Kënömi niyarqan: “Kë puka waskatam ventänëkipa warkunëki y llapan familiëkitam këman juntamunëki”. Y tsënömi Rahabqa rurarqan. ¿Tsëpita ima pasanqanta musyëta munankiku?. . .
Rahabtawan familiantam Jehoväqa salvarqan
Tsëpita junaqkuna pasariptinnam, Jericö markapa jiruroqnimpa israelïtakuna tumar qallëkuyan. Cada junaqmi juk kuti upällalla tumayan. Y tsënömi rurayan joqta junaqpa. Peru qanchis kaq junaqchöqa qanchis kutim tumayan y tsëpitanam llapan kallpankunawan qapariyan. Tsënam, ¡Jericöpa jiruroq perqankunata Jehovä juchuratsin! ¿Rahabpa wayinqa juchurinku? Manam, ventänanchö puka waska kaptinmi juchuntsu. ¿Rikankiku dibüjuchö warkurëkaq waskata?. . . ¡Tsënömi Rahab y familiankunapis salvakuyarqan!
¿Jehoväta wiyakunqanrëkurmi Rahabqa salvakurqan aw?. . . Jehovä imëkata ruranqanta willayashqa kayaptinmi, cuidanampaq kaqman creirqan. Qampis Jehoväpitaqa imëkatam yachakïkanki. ¿Rahabnötsuraq Jehovä ninqanta wiyakunki?. . . ¡Tsëqa allim kanqa!