3 Jesuspita rasumpa kaqta musyë
“Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq.” (Juan 3:16)
¿IMANIRTAQ ALLÄPA SASA KANMAN? Nunakuna Jesuspaq tukïta parlayaptinmi. Jesusqa manam ni imëpis kë Patsachö kawashqatsu niyanmi wakinkunaqa. Wakinkunanam, lluta nunallam karqan y imanöraq wanushqa këkarqa kawarimunman karqan niyan.
¿JESUS PATSACHÖ KAWANQANTA IMANÖTAQ MUSYASHWAN? Discípulo Natanaelnömi noqantsikpis rurashwan.a ‘Nazaretcho täraq Josepa tsurin Jesus’ Mesias kanqanta amïgon Felipi willariptin manam rasllaqa creirerqantsu. Tsëmi kënö tapukorqan: ‘¿Nazaret nunacunaqa imellaqa alli nuna cayashqacu?’. Felïpinam “¡Masqui acu reqinequipaq!” nerqan. Tsënam Natanaelqa kikinraq rikaq ëwarqan (Juan 1:43-51). Noqantsikpis Jesuspita rasumpa kaqta musyanapaqqa, kikintsikraqmi alli estudianantsik.
Unë qellqayanqanmi musyatsikun Jesus unë tiempochö rasumpa kawanqanta. Unë kaqta willakoq Josefo y Tácito shutiyoq alli reqishqa nunakunapis, Jesus rasumpa kawanqantam willakuyarqan. Roma nacionta 64 watachö kayëkuyaptin gobernaqnin Nerón cristiänokunata tumpanqampaqmi, Tácito kënö qellqarqan: “Melanar chikiyanqan cristiänokunatam Neronqa tumpar alläpa feyupa ñakatsiran o hipatserqan. Cristiano niyaqqa Cristupa qateqninkunatam, y tsë Cristutam Tiberio gobernanqan witsanchö Poncio Pilato wanutsiyänampaq mandarqan”.
Huk reqishqa librom I y II siglochö pasanqankuna qellqaranqampaq kënö nin: “Kë qellqayanqankunam rikätsikun unë witsankuna cristiänokunata chikeqkunapis, Jesus rasumpa kawanqanta mana negayanqanta, y siglo XVIII ushanampita qallëkur-raq siglo XX qallanan witsanyaq, manam Jesusqa rasumpatsu kashqa nir parlayanqanta” (Encyclopædia Britannica, edición de 2002). Huk periödicochönam 2002 watachö kënö nir yarqamorqan: “Unë kaqkunata estudiaq nunakunaqa Nazaretpita Jesus rasumpa kawanqanta llapannömi creiyan, tsë estudiaqkunapita Diosqa manam kantsu neqkunallam creiyantsuqa”.
Jesus rasumpa kawarinqanta rikätsikoqkuna. Jesusta wanutsiyänampaq tsaririyaptin pasanqanta yarpärishun. Kuyashqa yanaqinkunaqa haqirirmi ewkuyarqan. Amïgon Pëdrunäqa nunakunata mantsarmi kima kuti manam reqïtsu nerqan Jesuspaq (Mateo 26:55, 56, 69-75). Llapan qateqninkunam wakpa këpa ewkuyarqan (Mateo 26:31). Tsënö karnimpis, Jesus wanonqampita ichik tiempollachö pasanqanmi pëkunata yanaparqan Diospita yapë yachatsikuyänampaq. Pëdruwan Juannäqa, Maestron Jesusta wanutsiyänampaq causaq nunakunatapis mana mantsashpam parlapäyarqan. Y hinantin Roma nacionmampis kushishqam Cristupa yachatsikïninta chätsiyarqan. Hina Diosta serviyänanrëkorqa wanïtapis manam mantsayarqantsu.
¿Imataq tsëkunata rurayänampaq yanaparqan? Kawarimushqa Jesusta nawinkunawan kikinkuna rikäyanqanmi. Apóstol Pablum willakun Jesuspaq, “cawarimurmi puntata yuriporqan apostolnin Pedruta. Tsepitanam chunca ishque (12) apostolnincunata yuripïcorqan. Tsepitanam juc cutichona yuripïcorqan pitsqa pachaq [500] creyicoq mayintsiccunatana” nir. Y Pablu qellqanqan witsanqa, Jesus kawarishqata rikaqkuna llapannöran kawëkäyarqan (1 Corintios 15:3-7). Huk ishkë nunakunalla Jesus kawarenqampaq parlayaptenqa, mëtsikaqraq creiyanmantsu karqan (Lucas 24:1-11). Pero 500 nunakuna kawarimonqanta parlëkäyaptenqa nunakuna rasllachi creiriyarqan.
¿IMAKUNACHÖTAQ YANAPAMANTSIK? Jesusman markäkur y nenqankunata wiyakorqa, hutsankunapitam perdonta chaskiyan y alli concienciayoqmi kawakuyampis (Marcos 2:5-12; 1 Timoteu 1:19; 1 Pedru 3:16-22). Wanukuyänan kaptimpis, yapë kawariyämunampaq kaqmanmi markäkuyan o yärakuyan, Jesus “juisiu junaqcho” wanushqakunata kawaritsimunampaq awnikushqa kaptin (Juan 6:40).
Más yachakïta munarqa, Rasumpëpaqa, ¿imatataq Biblia yachatsikun?b libropa 4 y 5 capïtulonkunachö këkaq, “¿Pitaq Jesucristu?” y “Diosnintsikpa huk valoryoq qarëninmi rescäteqa” neq tïtulokunata ashiri.
[Päginapa ura kuchunchö willakïkuna]
a Mateo, Marcos y Lucas qellqayanqankunachö Bartolome nerqa, Natanael-llapaqtsumchi parlëkäyan.
b Këtaqa rurayashqa Jehoväpa testïgonkunam.
[7 kaq päginachö dibüju]
Jesuspita rasumpa kaqta musyanapaqqa Natanaelnömi ruranantsik.