Shutinta reqinatam Diosqa munan
Precisaq y respetashqa nunata huk fiestachö o ima reunionchöpis parlapäriqa alläpa kushikïpaqmi. Pero kananna këman pensari, imaraq kanman nunakuna “Señor Presidente”, “Teytë” o “Wiraqotsa” nir reqiyanqan respetashqa nuna, “ama mantsapämëtsu. Shutïpa qayamë” nishuptiki. ¿Masraqchi kushikïkunkiman aw?
DIOSTAPIS “Kamakoq Yaya”, “Llapan Puëdeq”, y “Pëlla Gobernaq” nirmi reqiyan. Tsënö karpis, Palabran Bibliachöqa “noqam Jehová kä. Tsëmi shutï” nimantsikmi (Isaías 42:8). Pëqa sirveqninkuna mana mantsëta shutimpa qayayänantam munan.
Tsëmi profeta Moisespis Diosta rogakur, “perdonëkamë Jehová” nir parlapar qallarqan (Éxodo 4:10). Hina rey Salomonpis “Jehová” nirmi Jerusalén templota inauguranqanchö Diosman mañakur shutinta parlarqan (1 Reyes 8:22, 23). Y profeta Isaïasnam, huk kuti Israel nacionpaq mañakurnin, “qammi Teytäkuna kanki Jehová” nirqan (Isaías 63:16). Clärom këkan, ciëlochö Teytantsikqa shutimpa qayanatam munan.
Tsënö kaptimpis, Diospa shutinta reqinanqa manam ima shutin kanqanta musyananllatsu ni shutimpa qayananllatsu. Pipis kuyaqta y pëman markäkoq o yärakogtaqa, “shutïta reqishqa kaptinmi tsapäshaq” ninmi Jehová (Salmo 91:14). Këchö ninqannöpis, Dios imëkapitapis tsapämänapaqqa manam shutinta musyanantsikllatsu, sinöqa reqinantsikmi. Tsëqa, ¿ima ninantaq Diospa shutinta reqi?