¿Imataq Diospa jutin?

Pitapis reqita munarninqa, ¿manaku “imataq jutiki” nishparaq puntataqa tapurintsik? Y Diosnintsikta tsënö tapushqaqa, ¿ima jutin kanqantaraq nimashwan?

“Noqam Jehovä kä. Tsëmi jutï” (Isaïas 42:8).

¿Diospa jutin Jehovä kanqanta musyarqëkiku? Itsapis mana, porqui Bibliata mëtsika traduceqkunam, tsë jutitaqa traduciyanqampita jorqariyashqa o wakin Bibliallamanmi churayashqa. Y tsë jutita churayänampa rantinmi, “SEÑOR” nishllapa churayashqa. Peru Bibliata escribiyanqan röllukunachöqa, 7 mil kutipitapis masmi tsë jutita escribiyarqan. Y YHWH o JHVH letrakunam hebreu idiömachöqa Diospa jutinta rikätsikun, y atska watakunapam tsë letrakunataqa “Jehovä” nir españolchöqa traduciyashqa.

Diospa jutinqa, hebreu idiömachö escribiyanqan röllukunachö y wakin traduciyanqan Bibliakunachömi yurin.

¿IMANIRTAQ DIOSPA JUTINQA PRECISAN?

Diospaq precisaq kaptin. Jehoväqa kikinmi jutin churakurqan, tsëmi kënö nirqan: “Këmi imëyaqpis jutï, y manam wamrëkikunapa wamrankunapis qonqayanqatsu” (Exodu 3:15). Llapanta Puëdeq, Teyta, Señor o Dios nishqan tïtulukunapitaqa jutinmi Bibliachöqa mas yurin. Jina Abrahan, Moises, David o Jesus jutikunapitapis Diospa jutinmi masqa yurin. Y manam tsëllatsu, Jehoväqa jutimpa reqinantsiktam munan, tsëmi Bibliachöqa kënö nin: “Qampa jutikiqa Jehovä kanqanta, y entëru patsachöqa qamlla Llapampa Janampa Këkanqëkita nunakuna musyayänampaq” (Salmus 83:18).

Jesuspaq precisaq kaptin. Padrenuestru nishqan mañakïchöqa, Jesusqa qateqninkunata kënö nir Diosman mañakuyänampaqmi yachatsirqan: “Jutiki alläpa respëtuwan rikashqa katsun” (Mateu 6:9). Y Teytanman mañakurmi kënö nirqan: “Teyta, jutikita alläpa precisaqpaq churë” (Juan 12:28). Jesuspaqqa, Teytampa jutinta alläpa respëtuwan rikäyänampaq yanapakïqa, imëkapitapis mas precisaqmi karqan. Tsëmi Teytanta kënö nirqan: “Noqaqa pëkunata jutikita musyatsirqömi y musyatsishaqmi” (Juan 17:26).

Diospa sirweqninkunapaq precisaq kaptin. Diospa jutinrëkur tsapashqa kayänampaq kaqta y salvacionta tariyänampaq kaqtam, unë sirweqninkunaqa cläru musyayarqan. Pëkunapita jukmi kënö nirqan: “Jehoväpa jutinqa mana juchoq törrinömi. Tsëmanmi allita ruraq nunaqa ëwan, tsëchö imëkapitapis tsapashqa kanampaq”. Y juknam kënö nirqan: “Jehoväpa jutinchö llapan qayakoq kaqkunam salvashqa kayanqa” (Proverbius 18:10; Hëchus 2:21). Diospa sirweqninkunaqa, jutimpa reqishqa kayänampaq kaqtam Bibliachöqa nin. “Symeonqa chipyëpam willakamushqa juk nacion nunakunata Dios imanö cuentaman churar qallanqanta, tsënöpa jutinta apaq markata pëkunapita jorqanampaq” (Hëchus 15:14; Miquëas 4:5).

¿IMATATAQ TSË JUTIQA RIKÄTSIKUN?

Diosnintsikqa jukllëlla Dios kanqantam. Mëtsika yachaq nunakunam niyan, Jehovä jutiqa “Pëmi Rurakänampaq Ruran” ninan kanqanta. Jutin ima ninan kanqantaqa musyantsik, Moiseswan parlarnin kikimpaq Jehovä imata ninqanchömi. Kënömi nirqan: “Noqaqa rikätsikushaq munanqäta logrëta puëdeq kanqätam” (Exodu 3:14). Këchö rikanqantsiknöpis, Diospa jutinqa Kamakoq kanqantam rikätsikun. Jinamampis, munanqanta cumplinampaq kamanqankunata Jehovä utilicëta puëdinqantam rikätsikun. Llapampa janampa këkanqanta, autoridäyoq kanqanta y alläpa puëdeq kanqanta tïtulukuna rikätsikïkaptimpis, jutinllam imanö kanqanta y imata rurë puëdinqantaqa cläru rikätsikun.

Noqantsikpaq Diosnintsik yarpachakunqantam. Jutin ima ninan kanqanqa rikätsimantsik, llapan kamanqankunata y noqantsiktapis Diosnintsik kuyamanqantsiktam. Palabranchö jutinta willamarnintsikqa, reqinantsikta munanqantam rikätsikun. Jutin ima kanqanta manaraq tapushqam, pëqa jutinta willamarqantsik. Diosqa manam munantsu karuchö këkaqtanö rikänantsikta, tsëpa rantinqa, amïguntsiktanö rikänata y pëman witinatam munan (Salmus 73:28).

Diospa jutinta utilizarqa, amïgun këta munanqantsiktam rikätsikuntsik. Pipis amïguïki kananta munar jutikita willarinqëkiman pensari. Jutikita willarishqa këkaptikipis mana utilizaptinqa, ¿imanöraq sientikunkiman? Itsa pensarinkiman, tsë nunaqa amïguïki këta mana munanqanta. Y tsënöllam Jehoväpis pensan jutinta mana utilizashqaqa. Jutinta utilizarninqa, pëpa amïgun këta munanqantsiktam rikätsikuntsik. Jina Bibliachöqa, pikuna jutinman pensëkäyanqantapis Jehovä musyanqantam nin (Malaquïas 3:16).

Diosta reqinapaqqa, puntataqa ima jutin kanqantam musyanantsik. Peru manam jutinllatatsu reqinantsik, sinöqa kikin Jehoväta y imanö kanqantam alli reqinantsik.