Pëqa “cawagcagcunapa Diosninmi”

¿Diosqa wanïta ushakätsita puëdinku? ¡Awmi puëdinmi! ¿Imanöparaq Llapanta Puëdeq Diospita wanï o juk chikeqnin más puëdeq kanman? (1 Corintios 15:26; Éxodo 6:3.) Wanushqakunata kawaritsimurmi Diosqa wanïta ushakäratsinqa y mushoq Patsachö tsëta ruramunampaq kaqtam awnikun.a ¿Tsë awnikunqanman markäkïta o yärakuyta puëdintsikku? Diospa tsurin Jesusmi tsëtaqa kushikïpaq contestaramantsik. (Lei Mateo 22:31, 32, NTCN.)

Wanushqakuna kawariyämunampaq mana creeq saducëokunatam, Jesusqa kënö nirqan: “Manacu gamcuna liyiyashcanqui wañushgacuna cawayämunanpag Dios Yaya palabranchö gellgatsir niyäshungayquita? ‘Nogaga unaycag Abrahampawan Isaacpa y Jacobpa respetayänan Diosnincunam cä.’ Tsaynö ninganpitam Abrahamwan Isaac y Jacob cawaycäyanganta musyantsic. Tsaymi Dios Yayaga manam wañushgacunapa Diosnintsu sinöga cawagcagcunapa Diosninmi”. Kë textochöqa Jesus rikätsikïkarqan 1514 watachö, pë manaraq shamuptin, rupëkaq shiraka kashapa nöpanchö Moiseswan Dios parlayanqampaqmi (Éxodo 3:1-6). “Abrahampawan Isaacpa y Jacobpa respetayänan Diosnincunam cä” nirnin teytan ninqanta Jesus yarpätsikunqanqa, wanushqakuna rasumpa kawariyämunampaq kaqtam rikätsikïkarqan. ¿Imanirtaq tsëtaqa nintsik?

Jehová Moiseswan parlanqan witsanqa, Abrahan, Isaac y Jacob nunakunaqa unënam wanukushqa kayarqan, Abrahanqa 329 watanam wanukushqa karqan, Isaacnam 224 watana y Jacobnam 197 watana. Tsënö kaptimpis, Jehoväqa manam “Diosnincunam carqä” nirqantsu sinöqa sirweqninkuna kawëkäyaptinnömi “Diosnincunam cä” nirqan. ¿Imanir?

Jehoväqa “manam wañushgacunapa Diosnintsu sinöga cawagcagcunapa Diosninmi” nirqanmi Jesusqa. Tsëta ninqanman pensarishun. Wanushqakuna mana kawariyämunan kaptinqa, Abrahan, Isaac y Jacobqa imëyaqpis wanushqachi sïguikuyanman, tsëqa wanushqakunapa Diosninchi Jehoväqa kanman. Tsënö kaptinqa sirweqninkunata wanïpita salvanampaq manachi podernin kanmantsu y wanïchi Jehoväpitapis más poderyoq kanman.

Tsëqa, ¿ima nishwanraq Abrahanpaq, Isaacpaq, Jacobpaq, y Jehoväta sirwikar wanushqa wakin nunakunapaq? Jesusqa clärom kënö nirqan: “Pepaqqa llapanpis cawecayanmi” (Lucas 20:38). Jehoväqa sirweqninkunata kawaritsimunampaq awnikunqanta cumplinqam, tsëmi pëpaqqa imëka kawëkäyaqnö (Romanos 4:16, 17). Kawaritsimunampaq hora chämunqanyaqmi pëqa yarpëninchö llapanta këkätsin.

¿Wanukushqa kastëkikunawan yapë tinkurita munankimantsuraq? Yarpë, Jehoväqa wanïpitapis más poderyoqmi. Wanushqakuna kawariyämunampaq awnikunqanta cumplinantaqa manam ni ima michanqatsu. ¿Maslla yachakïta munankimantsuraq kë awnikïpita y awnikoqnin Diospita? Tsëqa ‘cawagcagcunapa Diosnin’ Jehoväman witikanqëkitam cuentata qokurinki.