BIBLIAPITA TAPUKÏKUNA

¿Imapaqtaq Patsa kamakashqa?

Patsachöqa imëkakunam kan kawë kanampaq. Mëtsika yakum kan, tsëqa alläpam precisan kawë kanampaq. Patsa imanö kinkisharëkanqan, kanqanllachö tumanqan y intipa jiruroqnimpa tumanqanmi, yanapakun jatun lamarkuna rajuman mana tikranampaq ni mana tsakinampaq. Ciëluchö azulyarëkaq y escüdu cuenta mana rikakoq kallpam, Intipa (Rupaypa) alläpa achachënin Patsaman mana pasamunampaq tsapämantsik y maskunapitapis. Jina animalkuna y plantakunapis yanapakunmi Patsa shumaq kanampaq. Tsë llapanta rikarmi, mëtsikaq nunakuna cuentata qokuyashqa, imarëkur kë Patsa kamashqa kanqanta. (Leyi Isaïas 45:18.)

Tsënö kaptimpis, wakinkunaqa tapukuyan, “¿Patsachö imëka mana allikuna y sufrimientukuna kanampaqku Dios kamarqan?” nirmi. (Leyi Deuteronomiu 32:4, 5.)

¿Jehovä munanqan cumplikanqatsuraq?

Patsaqa kamakashqa juk shumaq sitiu kanampaq y nunakuna tsëchö kushishqa, respetanakur y Kamakoqninta kuyar kawakuyänampaqmi. Diosqa nunakunata kamashqa, plantakunapita y animalkunapitapis alläpa jukläyatam. Noqantsikqa musyantsikmi Kamamaqnintsik pï kanqanta, jina kuyakïninta y alli rurënintapis qatita puëdintsikmi. (Leyi Eclesiastes 12:13 y Miquëas 6:8.)

Jehoväqa llapan munanqantam cumplita puëdin, tsëmi següru këkänantsik imëka sufrimientukunata y mana alli rurëkunata ushakätsinampaq kaqta, jina kë Patsa shumaq huertaman tikranampaq y kushishqa tsëchö nunakuna kawakuyänampaq. (Salmu 37:11, 29 y Isaïas 55:11.)