QARANCHÖ YACHATSIKÏPITA | ¿QAMMAN DIOS INTERESÄKUNKU?
Diosqa shoqashunkim
‘Llaquishqacunata cushitseq Teyta Diosmi yanapayämarqan.’ (2 CORINTIUS 7:6)
‘Diospa tsurinqa allapa cuyamarnïmi rantï wanorqan.’ (GÄLATAS 2:20)
WAKINKUNA IMANIR MANA CREIYANQAN: Wakinkunaqa imëkanöpam shoqashqa këta ashiyan, peru problëmankunachö yanapanampaq Diosta mañakï mana alli kanqantam pensayan. Raquelmi kënö nin: “Entëru Patsachö nunakunapa jatun problëmankuna kanqanman pensarmi, noqapa problëmäkuna alläpa sasa mana kanqanta crei y tsëmi Diospa yanapakïninta mañakunäpaq yanapamantsu”.
¿IMATATAQ BIBLIA YACHATSIKUN? Diosqa nunakunata yanapanampaq y shoqanampaq imëkatam rurashqa. Llapantsikmi yurirquntsik “wanutsikoq qeshya” jutsawan. Tsërëkurmi Diospa leyninkunataqa chipyëpa cumplita puëdintsiktsu. Tsënö kaptimpis, Diosqa ‘cuyamarnintsicmi. Tsurin Jesusta cachamorqan, wanur llapan jutsa rurashqantsicpita perdonamänantsicpaq’ (1 Juan 4:10). Jesus wanunqanrëkurmi, Diosqa änimantsik jutsantsikkunapita perdonamänantsikpaq, conciantsik limpiu kanampaq y shumaqyashqa Patsachö mana wanushpa kawakïtapis.a Tsënö kaptinqa, ¿tsë sacrificiuqa llapan nunakunaman Dios interesäkunqantaku rikätsikun, o qammampis interesäkunqantaku?
Apostul Pablu ruranqanta rikärishun, Jesus wanunqampita agradecikurmi kënö qellqarqan: “Diospa tsurinman marcäcurllana[m] cawacü. Pemi allapa cuyamarnï rantï wanorqan” (Gälatas 2:20, noqakunam yanayätsiyarqö). Pablu cristiänu manaraq tikraptin Jesus wanushqa kaptimpis, tsë sacrificiuta pëpaq qarëtanö Dios ruranqantam rikarqan.
Jesus wanunqanqa qampaqpis juk qarëmi, tsëtaqa rurashqa precisaqpaq churashurnikim. Tsë qarëqa, ‘mana ni imay ushacag cushicuy consuelotawan juc rasumpa allicag shuyayquitam’ qoshïnikita puëdin, y “firmi criyicuyniquicunawan parlar llapan imaycatapis allicunallatana” rurayänëkipaq (2 Tesalonicensis 2:16, 17, NTCN).
Tsënö kaptimpis, Jesus wanunqampitaqa cäsi ishkë waranqa watakunanam pasashqa. ¿Imanötaq musyantsik kanampis noqantsikman Dios yarpachakunqanta?
a Noqantsikrëkur Jesus wanunqampita mas yachakïta munarqa, Rasumpëpaqa, ¿imatataq Biblia yachatsikun? librupa 5 kaq capïtulunta rikäri, kë librutaqa Jehoväpa testïgunkunam rurayämushqa.