QARANCHÖ YACHATSIKÏPITA | ¿MUSYËTA MUNANKIMANKU BIBLIA IMATA YACHATSIKUNQANTA?

Bibliapita yachatsikuyan entëru Patsachö

Jehoväpa testïgunkunaqa yachatsikunqantsikpitam reqishqa kantsik. Peru musyarqëkiku, ¿entëru Patsachö Bibliapita yachatsikuyanqäta?

Juk nunam Bibliapita yachakïkan trabajunchö

2014 watachöqa, 8 millonpitapis mas Jehoväpa testïgukunam Bibliapita yachatsikuyashqa 9.500.000 nunakunatanö 240 nacionkunachö y markakunachö.a Peru cäsi 140 nacionkunachöqa, 9.500.000 Bibliapita noqakunawan yachakïkaqkunapitapis mas wallkaqllam täräyan.

Jehoväpa testïgunkunaqa cäsi 1.500 millon publicacionkunatam jorqayämushqa 700 idiömakunamannö. Tsë jorqayämunqanchömi Bibliakuna, librukuna, revistakuna y follëtukuna këkan. Këta rurayanqanmi yanapakun pï mëpis munanqan idiömachö Bibliapita yachakuyänampaq.

“Bibliapita yachakïqa manam gustamaqtsu, peru kananqa gustamannam. Yachakunqäqa alläpam yanapamashqa.” (Sudafricapita, Katlego)

“Yachatsiyämanqanmi llapan tapukïnïkunata contestarqan, y maskunatapis yachakurqämi.” (Mëxicupita, Berta)

“Munanqä höram wayïchö yachakuyaq kayä. ¡Ima mastaraq mañaköman!” (Brasilpita, Eziquiel)

“Cläsikunaqa 15 a 30 minütukunam duraq, wakin junaqkunaqa masmi duraq. Tsëtaqa noqam decideq kä.” (Australiapita, Viniana)

“¡Cläsikuna debaldilla kanqantaqa manam creeqtsu kä!” (Beninpita, Aimë)

“Yachatsimaqnïqa pancienciayoq y kuyakoqmi kaq. . . Alli amïgam tikrariyarqä.” (Irlanda del Nortepita, Kären)

“Mëtsikaqmi Bibliapitaqa yachakuyan, peru manam Jehoväpa testïgun këmanqa chäyantsu.” (Inglatërrapita, Denton)

BIBLIAPITA YACHAKÏ MUNAQKUNA TAPUKUYANQAN

¿Imanötaq tsë yachatsikï?

Biblia tukïpaq yachatsikunqantam yachakuntsik. Tantiyarinapaq, Diospaq yachatsikïta. Bibliaqa willakun Dios pï kanqanta, imanö kanqanta, ima jutin kanqanta, mëchö këkanqanta y amïgun këta puëdinapaq o mana puëdinapaq kanqantam. Tsë yachakïchöqa, estudiantikunatam yachatsiyan tapukïninkunapa respuestanta Bibliachö tariyänampaq.

Tsënö yachakuyänampaqqa, Rasumpëpaqa, ¿imatataq Biblia yachatsikun?b librutam utilizäyä. Kë librutaqa jorqayämurqan Bibliapa rasumpa kaq yachatsikïninkunata nunakunata yachatsiyänampaqmi. Tsëchöqa parlan Diospaq, Jesuspaq, imanir sufrinqantsikpaq, wanïpaq, imanö mañakunapaq y mas yachatsikïkunapaqmi.

¿Mëchötaq y imëtaq Bibliapita yachatsiyäshunki?

Qammi akranki mëchö y imë yachakunëkipaq.

¿Ëka tiemputaq cada yachakï duran?

Qam munanqëki höra, y puëdinqëki höram shayämushaq. Mëtsikaq nunakunam akrayan semänachö juk höra o mas wallkallachö estudiayänampaq. Wakinkunaqa 10 o 15 minütullam yachakuyan.

¿Paganantsikku?

Manam. Cläsikuna y yachakunëkipaq publicacionkunata qoyäshunqëkiqa debaldillam. Porqui Jesusmi qateqninkunata kënö nirqan: “Debaldillam chaskiyarqunki y debaldilla qarakuyë” (Mateu 10:8, NM).

¿Ëka tiemputaq llapanta yachakuntsik?

Munanqëki tiempupam yachakïta puëdinki. Rasumpëpaqa, ¿imatataq Biblia yachatsikun? libruqa 19 capïtuluyoqmi. Munanqëki kaqtam puëdinqëkimannö yachakïta puëdinki.

Yachakurirqa, ¿Jehoväpa testïgunku tikranëki?

Manam. Noqakunaqa respetayämi cada nuna imata creiyänampaq akranqanta. Tsënö kaptimpis, Bibliapita yachakunqëkiqa alli kaqta akranëkipaqmi yanapashunki.

¿Mëchötaq tarinki maslla yachakïta munanqëkita?

Internetchö jw.org päginäkunachömi maslla tarinki creenciäkunapita y rurënïkunapita rasumpa kaq yachatsikïta.

¿Mëchötaq apuntakunkiman?

Internetchö, jw.org päginachö këkaq formulariuman qellqarmi watukayäshunëkipaq mañakurinkiman.
Ishkë kaq päginachö këkaq mëqan direccionllamampis qellqëta puëdinkim.
Jina guia telefönica nishqanchömi markëkichö Jehoväpa testïgunkunapa nümerunta taririnki qayarinëkipaq.

a Wakintaqa grüpuman rurëkurmi Bibliapita yachatsiyä.

b Kë librutaqa Jehoväpa testïgunkunam rurayämushqa. Kë libruqa 224 päginayoqmi y 230 millonpitapis mastam jorqayämushqa 260 idiömakunachö.

FAMILIAKUNAPAQ YANAPAKÏKUNA

“Warmï Bibliapita yachakur qallëkuptinqa, mana pensanqä cambiukunata rurarmi qallëkurqan. Problëmäkunapis altsakarmi qallëkurqan. Tsëmi musyëta munarqä y estudiar qallëkurqä. Yachakunqäqa alli nuna kanäpaqmi yanapamarqan. Bibliapita yachakuyanqäqa familiätam mas juntashqa.” (Eziquiel)

“Bibliapita yachakur qallëkurmi drögakunata y alcohol upyëta jaqirqä, y mana alli geniütapis allim tsarä. Kananqa wayïpis mas limpiu y shumaq churapakushqam. Familiätapis masmi kuyä y pëkunarëkurmi imëkatapis rurä. Kananqa mas kushishqam kawakö.” (Kären)

“Bibliapita yachakunqärëkurmi noqapaq mana allita parlayaq. Peru qowäqa yanapamaqmi y kënömi nimaq: ‘Manam ima qoqamantsu nunakuna niyanqan. Masqa precisan mas alli warmi tikrëkanqëkim. Rurëkanqëkita sïguilla’. Kananqa mas kushishqam familiä kawakun.” (Viniäna)