Shoqashqa këtaqa wanantsikmi

¿Yarpankiku wamra këkar ishkinqëkita, makikita roqukunqëkita o qonqïkita (qonqurnikita) dañakunqëkita? ¿Imanötaq mamäniki yanapashurqëki? Itsa herïdëkita jampimurqan y vendamurqan. Jina, waqaptiki shumaq parlapäshurniki y kuyëpa waqushurniki (makallashurniki) shoqashurqëki. Wamra karninqa fäcilmi shoqashqa këta tarirqëki.

Watakuna pasanqanmannömi, kawënintsikqa alläpa sasa (aja), y problëmakunapis masmi miran. Shoqashqa këtaqa manam fäcil-llaqa tarintsiktsu. Manam juk vendawan ni waqukïllawantsu mayorkunapa problëmankunaqa altsakärin, tsëmi llakinëpaqqa. Pasakunqankunata rikärishun.

• ¿Alläpa llakishqaku këkanki trabäjïkita oqranqëkirëkur? Julianmi, trabäjumpita qarquriyaptin alläpa mana alli sientikunqanta yarpan. Kënömi tapukoq: “¿Imanöraq familiäta mantenishaq? Atska watanam kë emprësapaqqa trabajarqö, ¿mana alli trabajanqäta pensartsuraq qarqurayämashqa?”.

• ¿Majëki qampita divorciakushqa kaptinku alläpa llakishqa këkanki? Raquelmi kënö willakun: “Qowä (runä) jaqiramanqampitaqa 18 killakunanam pasarishqa, alläpam llakikurqä y imëka shonqüta pakirayämunqantanömi sientirqä. Alläpa mantsakashqam këkarqä”.

• ¿Alläpaku qeshyanki y mana kachakaqnöku kanki? Itsa Job nunanö sientikunki, pëmi llakikur kënö nirqan: “Manam kawëtapis munänatsu” (Job 7:16). O itsa 80 watayoq Luisnö qampis pensanki, pëmi kënö nirqan: “Höraqa wanïllatana shuyarëkanqätam sientï”.

• ¿Wanankiku familiëkita wanupakunqëkirëkur shoqashqa këta? Robertmi kënö willakun: “Avionchö viajëkarnin, juk accidentichö wamrä wanunqanta musyarirqa, manam creirirqätsu. Tsë pasakunqampitaqa alläpam llakikurqä..., espädawan tuksiyäshuptiki alläpa nananqanta Biblia igualatsinqannömi karqan” (Lücas 2:35).

Alläpa sasa (aja) tiempukunapa pasëkarpis, Julian, Raquel, Luis y Robertqa shoqashqa këtam tariyarqan, porqui alläpa puëdeq Diospa shoqakïnintam tariyarqan. ¿Imanötaq Diosqa shoqamantsik? ¿Qamtapis shoqashunkitsuraq wananqëki hörakunachö?