Eläh pampa
Davidwan Goliat. ¿Cuentullaku o rasumpaku?
Wakinkunaqa tapukuyan Davidpaqwan Goliatpaq willakï rasumpa o mana rasumpa kanqantam. ¿Tsënöllaku qampis tapukurqunki juknin yachatsikïchö pëkunapaq willakïta leyikar? Tsëqa, këkunaman pensë.
1 | ¿Pillapis kima metrunö medinmantsuraq?
Bibliaqa willakun, kima metrunö Goliat medinqantam (1 Samuel 17:4). Wakin nunakunaqa, Goliat alläpa jatun nuna kanqanta manam creiyantsu. Peru ¿musyarqëkiku kanan witsampis ishkë metru setenta juk nuna medinqanta? Tsëqa, ¿mana creipaqtsuraq kanman alläpa jatun kanqan? Goliatqa refaim kastapitam karqan, tsë kastaqa jatun kënimpitam reqishqa karqan. Jesus manaraq shamuptin egiptupita juk willakïmi, mantsanëpaq cananeu soldädukunapaq willakurqan, pëkuna ishkë metru cuarenta mas mediyanqanta. Tsëmi Goliat jatun kanqantaqa creita puëdintsik.
2 | ¿Rasumpatsuraq David kawarqan?
Juk tiempum yachaq nunakunaqa niyarqan rey Davidpaq willakïqa juk cuentulla kanqanta, peru tsënö mana kanqanta rikätsikoq pruëbakunaqa kanmi. Unë kaqkunata estudiaqkunam, Davidpa wayimpaq nishqan willakïkunata qellqarëkaqta tariyarqan. Jinamampis, rasumpa kawanqantam Jesuspis willakurqan (Mateu 12:3; 22:43-45). Y Jesus Diospa akrashqan kanqanqa, rey Davidpa kastampita kanqantam rikätsikun (Mateu 1:6-16; Lücas 3:23-31). Awmi, Davidqa rasumpa kawarqan.
3 | ¿Rasumpatsuraq kë willakïchö sitiukuna karqan?
Bibliam willakun Eläh pampachö pelyayanqanta, jinamampis willakunmi tsë filisteukunapa campamentunkunaqa Socoh y Azeqä markakunapa ladërankunachö këkanqanta. Israelïtakunaqa pampapa juknin kaq lädunchömi këkäyarqan. Peru ¿rasumpatsuraq kë sitiukuna karqan?
Rikärishun tsëllaraq tsë sitiuta watukaq nuna imata ninqanta: “Pushayämaqnïkunaqa manam religiösutsu karqan, pëmi Eläh pampaman apayämarqan. Jirkapa puntanman chäyanqäyaqmi lloqayarqä. Pampata rikapakïkäyaptïmi 1 Samuel 17:1-3 textuta leyiyänäpaq niyämarqan, nïkurnam ‘kë izquierda lädupam Socoh ushakashqa marka këkan’ niyämarqan. Y tumarirnam jina niyämarqan: ‘Derëcha kaq läduchömi ushakashqa Azeqä marka këkan. Y kë markachömi filisteukunapa campamentunkunaqa këkarqan, rikarëkäyanqëki frenti ladërankunachö. Itsa tsëqa israelïtakunapa campamentunkuna këkunachö këkarqan’. Noqa shëkanqä sitiuchö Davidwan Saul këkanqantanömi pensarqä. Tsëpitanam, jirkapita uräyarqä y atska rumikunayoq tsaki mayupa tsimpayarqä. Tsëchömi pensarirqä David, imanö pitsqa taksha y luchoq rumikunata akranampaq muchkirëkanqanman (umpurëkanqanman). Tsë rumikunapita juk kaqwanmi Goliatta wanutsinan karqan”. Kë visitakoqkunata y wakin nunakunataqa, Bibliapa willakïnin alläpa precïsu kanqanta rikëmi espantatsirqan.
Tsëkunarëkurmi, Davidpaqwan Goliatpaq willakïkuna rasumpa kanqantaqa següru këkashwan. Tsë willakïchö nunakuna y sitiukunaqa rasumpam kayarqan. Manam tsëllatsu, kë willakïqa Diospa Palabranchöpis këkanmi, y pëqa palabranchö “rasompa caqllata parlakoq” Diosmi (Tïtu 1:2; 2 Timoteu 3:16).