¿Yarpankiku?

¿Ultimu yarqamoq Täpakoq revistakunata leyirqunkiku? ¿Puëdinkimantsuraq kë tapukuykunata contestëta?:

Santiägu 5:11 ninqanqa, ¿imanötan yanapamantsik Jehovä alläpa kuyamanqantsikta musyanapaq?

Jehovä alläpa llakipäkoq kar, jutsantsikpita perdonamänapaq listu këkanqantam musyantsik. Santiägu 5:11 ninqampis, kuyamarnintsik yanapamanqantsiktam rikätsimantsik. Noqantsikpis, Pënö këtam procuranantsik (w21.01, pägina 21).

¿Imanirtan Jehoväqa dirigeqkuna kanampaq patsätsishqa?

Kuyamarnintsikmi. Tsëmi Jehoväta sirweqkunaqa juk familianölla kayan. Y juk familiachö Jehovä patsätsinqanta respetaqkunaqa, musyayanmi imatapis decidinampaq y rurayänampaq patsätsinampaq pita churashqa kanqanta (w21.02, pägina 3).

¿Imanirtan Diosta sirweqkunaqa mensäjikunata apatsir cuidädu kanantsik?

Internetpa mëtsikaq qellqapänakuyanqan grüpukunaman yëkuyta pensëkarqa, pï nunakuna kayanqanman pensashun. Mëtsikaq kayaptinqa, tsëta rurëqa manam fäciltsu kanman (1 Tim. 5:13). Jina rasumpa kanqanta mana musyayanqan noticiakunatam pimampis chäratsiyanman y wawqi paninkunapitam provechakuyanman (w21.03, pägina 31).

¿Imarëkurtan Jesus sufrinanta Dios permitirqan?

Juk: Jesusqa qeruchö wanurqan, maldecishqa kayanqampita judïukuna libri kayänampaqmi (Gäl. 3:10, 13). Ishkë: Mandakoq kaq Sacerdöti kanampaqmi, Tsurinta Jehovä alistëkarqan. Y kima: alläpa sufrikarnimpis, nunakuna Jehovällata sirwita puëdiyanqanta rikätsikunampaqmi (Job 1:9-11) (w21.04, päginakuna 16 y 17).

¿Imatataq rurashwan nunakunata wayinkunachö mana tarir?

Wayinkunachö kayänan hörata tantiëkur yachatsikoq yarqushun. Juk lädukunachöpis yachatsikuyta procurashun. Jina juknöpapis yachatsikushwanmi, itsa cartata qellqar (w21.05, päginakuna 15 y 16).

¿Ima nitatan Pabluqa munëkarqan “leyrëkurmi leypaq wanurqö” nirqa? (Gäl. 2:19).

Moises Qellqanqan Leyqa, nunakuna imachöpis pantareq kayanqantam rikätsikurqan y israelïtakunatam Cristuyaq pusharqan (Gäl. 3:19, 24). Tsëmi Pabluta yanaparqan Jesusman markäkunampaq o yärakunampaq. Tsënöpam Pabluqa Leypaq wanushqa karqan; manam Ley ninqanta wiyakunannatsu karqan (w21.06, pägina 31).

Aguantar sïguinapaqqa, ¿imatataq Jehoväpita yachakuntsik?

Jehoväqa, jutinta mana respetayanqanta, pëlla llapanta gobernaq kanqampita contran këkäyanqanta, wakin angelninkuna contran churakäyanqanta, Satanas mana rasumpa kaqta parlanqanta, kuyashqa sirweqninkuna sufreqta rikanqanta, kuyashqa amïgunkuna wanuyanqanta, mana alli nunakuna wakinkunata sufritsiyanqanta, nunakuna mana alli portakuyanqanta y kamanqan Patsata ushakëkätsiyanqantam aguantëkan (w21.07, päginakuna 9 a 12).

Josë pasanqankunapitaqa, ¿imatataq pacienciakoq këpita yachakuntsik?

Josëqa, wawqinkuna mana allita rurayanqantam aguantarqan. Tsërëkurmi, Egiptuchö mana kaqpita tumpayarqan y mëtsika watakuna carcelararqan (w21.08, pägina 12).

Ageu 2:6 a 9 y 20 a 22 ninqanchö, ¿nacionkuna imanö kuyutsishqa kayänampaq kaqtataq willakun?

Nacionkunaqa, manam Diospa Gobiernumpita alli noticiakunata wiyakuyta munayantsu, peru mëtsikaqmi tsë noticiakunapita yachakuyta munayan. Ichikllachönam, ushakäyanqan junaqchö nacionkuna juk kuti masllana kuyutsishqa kayanqa (w21.09, päginakuna 15 a 19).

¿Imanirtan Diospita yachatsikuyta qelanäshwantsu?

Jehoväqa rikëkanmi kallpachakunqantsikta y tsëpitam kushikun. Diospita yachatsikur sïguishqa y mana qelanashqaqa, mana wanurmi imëyaqpis kawakushun (w21.10, päginakuna 25 y 26).

¿Imanötan Levïticu librupa 19 kaq capïtulun yanapamantsik kë consëjuta wiyakunapaq: “Llapan portakïnikikunachö santu nunakuna kayë”? (1 Pëd. 1:15).

Tsë versïculuchö qellqarëkaqtaqa, Levïticu 19:2 ninqampitachi apostol Pëdruqa qellqarqan. Levïticu librupa 19 kaq capïtulunqa, 1 Pëdru 1:15 ninqanta, vïdantsikchö imanö wiyakunapaq kaqtam cläru rikätsimantsik (w21.12, päginakuna 3 y 4).