¿Cärruta manejëta dejankimannaku?

¿Qamtapis familiëkikuna manana manejanëkipaqku nikäyäshunki? Tsëqa, ¿imatan yanapashunkiman manejarnin sïguinëkipaq o mana sïguinëkipaq kaqta decidinëkipaq?

Wakin nacionkunachöqa edäna kaqkunaqa manejar sïguiyänampaq licenciata yapë jorqëta munarqa, doctormanran exäminta rurakoq ëwayänan o juk certificädutaran jorqayänan o jipiyänan. Tsënö nacionkunachö kawaq cristiänukunaqa ley ninqanta y autoridäkuna niyanqantam cäsukuyan (Rom. 13:1). Cristiänukunaqa mëchö kawarpis, manejëta puëdiyanqanta o manana puëdiyanqantam alliraq pensayänan.

MANEJËTA PUËDINQËKITA O MANANA PUËDINQËKITA ALLI PENSË

Estädus Unïduschö Instituto Nacional sobre el Envejecimiento niyanqanmi, nunakunata animan manejëta puëdiyanqanta o mana puëdiyanqanta musyayänampaq kë tapukuykunaman pensayänampaq:

• ¿Carretërachö señalkunata rikëta y leyita puëdïku? Y ¿paqaspaqa alliraqku rikä?

• ¿Raslla o saslla tumëta puëdïraqku fäcil-lla mana rikakanqan lädukunaman rikänäpaq y cärrupa espëjumpa rikänäpaq?

• ¿Manejëkarnin rasllaku o sasllaku frenëta puëdï?

• ¿Alläpa despaciu manejarku wakinkuna avanzayänanta permitïtsu?

• Kë qepa killakunaqa, ¿atska kutinaku cäsi chocarqö o imawampis cärrüta rayatsirqö?

• ¿Mana alli manejëkanqäta rikämarku policïa päratsimashqa?

• ¿Punuyku manejëkaptï vencimashqa?

• ¿Upuykanqä pastïllakunaku alli manejanäta permitimantsu?

• ¿Familiäkunaku y amïgükunaku cärruta manejaptï yarpachakuyan?

Këchö tapukuykunaman alli pensëkur jukta o ishkëta “awmi” nishqa karqa, alläpa mana manejanëkipaq y paqaskunapa cuidädulla manejanëkipaqmi decidinëki. Y kënömi imëpis pensanëki: “¿Alliraqku manejëkä o mananaku?”. Tsëta musyanëkipaqqa, allim kanman amïguykikunata y familiëkikunata tapurinqëki o mas següru manejëta yachatsikuyänan escuëlaman ëwanqëki. Peru këchö tapukuykunata atskata “awmi” nishqa karqa, mas alliqa kanqa manana manejanëkipaq decidinqëkim.a

BIBLIACHÖ KËKAQ CONSËJUKUNAM YANAPASHUNKI

Capazchi cuentata qokunkimantsu alli manejëta manana puëdinqëkita y manejë gustashuptikiqa manachi pensankimantsu dejëtaqa. Peru Bibliachö ishkë consëjukunata rikärishun alli pensëkur decidinëkipaq.

Humildim kanantsik y unënöna manejëta mana puëdinqantsiktam reconöcinantsik (Prov. 11:2). Edäyarninqa manam alli rikëta y wiyëta puëdintsiknatsu, y kallpantsikpis manam jövin kanqantsiknönatsu, y imatapis manam rasqa o sasqa rurëta puëdintsiknatsu. Tsëmi wakinkunaqa accidentäkurita mantsarnin pukllëtapis dejariyan. Tsënöllam cärruta manejanqantsikwampis pasakun. Capazchi cuentata qokurishwan unënöna mana manejëkanqantsikta, tsëqa accidentäkuyta mantsarmi manejëta dejanantsik (Prov. 22:3). Y pillapis noqantsikpaq alläpa yarpachakurnin mana manejanantsikpaq nimashqaqa, humildim kanantsik y nimanqantsiktam cäsukunantsik (igualaratsi 2 Samuel 21:15 a 17 textutawan).

Ama nunapa vïdampita culpayoq kashuntsu (Deut. 22:8). Mana alli manejashqaqa, cärrupis o mötupis alläpa peligrösum kanman. Manejëta mana puëdikarna manejarninqa, kikintsikpa vïdantsikta y jukkunapa vïdankunatapis peligrumanmi churëkashwan. Y pitapis wanutsirqa, culpayoqmi kashun.

Cärruta manana manejanëkipaq decidirninqa, manam llakikunëkitsu o mana väleqnöqa sientikunëkitsu. Jehovä Diosnintsikqa masqa valoran humildi kanqantsikta y wakinkunata peligruman mana churashqam. Tsëmi Jehovä Diosnintsikqa imëpis yanapashunki y consolashunki (Is. 46:4). Pëqa manam imëpis dejashunkitsu. Tsëmi cärruta manana manejanëkipaq decidinëki kaptinqa, Jehovä Diosnintsikman llapan shonquykiwan mañakunëki; pëmi yanapashunki alli pensëkurnin decidinëkipaq.