¿Imatataq rurashwan yarpachakunqantsik hörakuna?

1, 2. ¿Imanötan apostol Pablu sientikurqan, y imanirtan noqantsikpis pënö sientikushwan? (Romänus 7:21-24).

¿IMANÖ nunatan karqan apostol Pablu? Capazchi yarpanki valienti kanqanta, alli yachatsikoq kanqanta y Bibliapa atska librunkunata qellqashqa kanqanta. Peru tsënö kashqa karpis, apostol Pabluqa höra höraqa noqantsiknömi mana alli sientikoq y llakikoq.

² (Leyi Romänus 7:21-24). Apostol Pabluqa, romänu cristiänukunaman cartakunqanchömi nirqan imanö sientikunqanta. Llapan shonqunwan Diosnintsikta sirwirpis, jutsasapa karmi höra höraqa mana allikunata rurëta munaq o mana allikunaman pensaq. Y manam tsëllatsu, unë ruranqankunata yarparmi alläpa llakikoq y cambiukunata ruranan mana fäcil kaptinmi alläpa yarpachakoq. Capazchi noqantsikpis pënö sientikuntsik.

3. ¿Imatataq këchö yachakushun?

³ Apostol Pabluqa alläpa llakikurpis,a manam Jehovä Diosnintsikta dejarirqantsu. Peru ¿imanirtan apostol Pabluqa höra höra llakikurqan? ¿Imatataq rurarqan alläpa mana llakikunampaq? Y ¿imatataq noqantsikqa rurashwan llakikunqantsik hörakuna? Tsëkunatam këchö yachakushun.

¿IMANIRTAN APOSTOL PABLU HÖRA HÖRA LLAKIKURQAN?

4. ¿Imanir-raq apostol Pabluqa höra höra llakikoq?

⁴ Mana allikunata ruranqanta yarparmi llakikurqan. Pabluqa o Sauluqa manaraq cristiänu karqa, imëka mana allikunatam rurarqan. Hasta Jesuspa qateqnin Estëbanta wanutsiyaptimpis acuerdum karqan (Hëch. 7:58; 8:1). Y cristiänukunatapis alläpam sufritsirqan (Hëch. 8:3; 26:9-11).

5. ¿Imakunata yarpartan apostol Pabluqa mana alli sientikoq?

⁵ Apostol Pabluqa cristiänu tikrarirqa, manaraq cristiänu karnin ruranqankunata yarparmi mana alli sientikoq. Y capazchi watakuna pasaptinqa, masraq mana alli sientikoq. Tsëtaqa musyantsik 55 watamampa Corintu cristiänukunaman cartakunqanchömi. Kënömi nirqan: “Diospa congregacionninchö kaqkunata imëkata rurar sufritsishqa karmi, apostolnö reqishqa kanäpaqnötsu kä” (1 Cor. 15:9). Y tsëpita pitsqa watanö pasarinqanchömi, Ëfesuchö këkaq cristiänukunaman cartakur nirqan wakin cristiänukunapitaqa “mana kaqlla” kanqanta (Efes. 3:8). Y Timoteuman cartakunqanchönam nirqan manaraq cristiänu karnin “Teyta Diosta ofendishqa” kanqanta, cristiänukunata sufritsishqa kanqanta y “mana respetakoq” kashqa kanqanta (1 Tim. 1:13). Capazchi apostol Pabluqa congregacionkunata visitar, sufritsinqan cristiänukunawan o familiankunawan tinkoq. Y pëkunawan tinkurqa, sufritsishqa kanqanta yarparchi mana alli sientikoq.

6. ¿Imanirtan apostol Pablu sufrirqan? (Nötata leyi).

⁶ Capazchi qeshyarnin llakikoq. Pabluqa sufrinqantam willakurqan, y tsëpaqmi nirqan ‘cuerpunchö kasha’ tukshïkaqnö kanqanta (2 Cor. 12:7). Manam willakurqantsu imapita sufrinqanta. Capazchi qeshyapäkurqan, alläpa yarpachakurqan o juk cösaskunarëkur sufrirqan. Peru clärum nirqan alläpa sufrinqantaqa.b

7. Mana allikunata rurarirqa, ¿imanötan Pablu sientikoq? (Romänus 7:18, 19).

⁷ Allikunata rurëta munarpis, mana allikunata rurarmi llakikoq. Pabluqa mana fäcil kaptimpis, allikunata ruranampaqmi kallpachakoq (leyi Romänus 7:18, 19). Peru höraqa mana allikunatam ruraq, tsëmi nirqan allikunata ruranampaq kallpachakunanqa mana fäcil kanqanta (1 Cor. 9:27). Y mana allikunata rurarirqa, alläpachi llakikoq.

¿IMATATAQ APOSTOL PABLU RURARQAN ALLÄPA MANA LLAKIKUNAMPAQ?

8. ¿Imataraq Pablu rurarqan mana alli munëninkunata vencinampaq?

⁸ ¿Imamantan apostol Pablu pensarqan mana alli munëninkunata vencinampaq? Pëtapis y cristiänu mayinkunatapis, mana alli munëkunata dejayänampaq santu espïritunwan Diosnintsik yanapëta puëdinqanmanmi pensaq (Rom. 8:13; Gäl. 5:16, 17). Mëtsika kutim parlarqan Dios munanqannö kawakuyta munarqa, cristiänukuna mana allikunaman mana yarparäyänampaq y mana allikunata mana rurayänampaq (Gäl. 5:19-21, 26). Capazchi kikin mana allikunata pensanqanman y ruranqanman yarparqan. Y tsëkunata vencinampaqqa, Diospa Palabrantachi alli yachakoq y cambiukunata imanö ruranampaq kaqmanchi alli pensaq. Pabluqa wakinkunata consejanqantam kikimpis cumpleq.

9, 10. ¿Imatan apostol Pabluta yanaparqan mana alli sientikunqan hörakuna? (Efesius 1:7; dibüjuta rikäri).

⁹ ¿Imakunatan apostol Pabluta yanaparqan llakikunqan hörakuna kushishqa sientikunampaq? Pëtaqa yanaparqan congregacionkunachö wawqikuna y panikuna alli këkäyanqanta musyanqan (2 Cor. 7:6, 7), alli amïgukunayoq kanqanta yarpanqan (2 Tim. 1:4) y Jehoväwan amïgu kanqanman y “limpiu concienciawan” sirwita puëdinqanman yarpanqanmi (2 Tim. 1:3). Tsëmi Römachö këkaq cristiänukunatapis kënö nirqan: “Señorta sirwir imëpis kushikuyë” (Filip. 4:4). Apostol Pabluqa mana alli sientikunqan hörakunam, mana allikunaman pensanampa rantin mas alli kaqkunaman pensanampaq kallpachakoq.

¹⁰ Tsënöllam apostol Pablutaqa yanaparqan përëkur wanunampaq Tsurinta Jehovä mandamushqa kanqanman pensanqan (Gäl. 2:20; leyi Efesius 1:7). Jesus wanunqanman pensarmi següru karqan jutsata ruranqankunapita Jehovä perdonashqa kanqanta y yapëpis perdonanampaq kaqta (Rom. 7:24, 25). Mana allikunata rurashqa karpis y mana allikunaman pensarpis o mana allikunata rurëta munarpis, apostol Pabluqa Diosnintsikta kushishqam sirwirqan (Heb. 9:12-14).

11. ¿Imanötan Pablupa ejemplun yanapamantsik?

¹¹ Noqantsikpis capazchi apostol Pablunö allikunata rurëta munëkarpis mana allikunata pensarintsik, rurarintsik o parlarintsik. Y capazchi Pablunöpis nintsik, ‘alläpa llakipëpaq’ këkanqantsikta. Veinti seis watayoq Elïzac jutiyoq panim kënö nin: “Apostol Pablupita yachakunqäqa alläpam yanapaman. Jukkunapis noqanö sientikuyanqanta musyarqa, mas allim sientikü. Pablupita yachakunqämi yanapaman sirweqninkuna imanö sientikuyanqanta Jehovä musyëkanqanta següru kanäpaq”. Kananqa yachakurishun apostol Pablunö mana alli sientikurpis kushishqa y limpiu concienciayoq kanapaq imata ruranapaq kaqta.

NOQANTSIKQA, ¿IMATATAQ RURASHWAN LLAKIKUNQANTSIK HÖRAKUNA?

12. ¿Imakunata ruranqantsiktan yanapamäshun alli sientikunantsikpaq?

¹² Jehoväpa kaqkunata ruranapaqmi tiempuntsikta alli patsätsinantsik. Diosnintsikpa kaqkunata puntaman churarqa, mas alli kaqkunamanmi pensëta puëdishun. Imanömi alli saludyoq kanapaqpis yanapamantsik alli mikunqantsik, ejerciciukunata ruranqantsik y alli descansanqantsik, tsënöllam alli sientikunapaqpis yanapamantsik Bibliata cada junaq leyinqantsik, yachatsikoq yarqunqantsik, reunionkunapaq preparakunqantsik, reunionkunaman ëwanqantsik y reunionkunachö parlakunqantsik. Tsëkunata puntaman churarninqa, manam mana allikunamanqa pensashuntsu (Rom. 12:11, 12).

13, 14. ¿Imata rurayanqantan mana allikunapa pasëkaq wawqikunata y panikunata yanapashqa?

¹³ Wawqintsik Juanta pasanqampaq parlarishun. Pëqa casädum karqan, y wamrampis kima watayoqllaran karqan. Juantaqa 39 watayoq këkaptinmi cancer qeshyayoq kanqanta willariyarqan, tsëmi alläpa llakikurqan. Pëmi kënö nin: “Jövinllaraq këkar cancer qeshyayoq kanäpaq kaqtaqa manam pensarqätsu”. Peru ¿imatan wawqintsik Juanta yanaparqan llakikurlla mana kakunampaq? Kikinmi kënö nin: “Alläpa utishqa o pishipashqa sientikurpis manam reunionkunaman ëwëta, yachatsikoq yarquyta y familiäwan Diospita yachakuyta dejayarqätsu”. Tsëpitanam kënö nin: “Cancer qeshyayoq këkanqäta willarayämaptinqa, qallananchöqa alläpam llakikurqä. Peru wawqikuna, panikuna y Jehovämi yanapayämarqan alli sientikunäpaq. Jehoväqa llapantsiktam yanapamantsik, tsëtaqa segürum këkä”.

¹⁴ Onci kaq pärrafuchö parlanqantsik Elïzanam kënö nin: “Bibliapita cada yachakur y reunionkunaman cada ëwarmi, mas següru kä mañakunqäta Jehovä wiyanqanta y kuyamanqanta. Y tsëta musyarqa, alläpam kushikü”. Africachö congregacionkunata watukar yanapakoq Nolan jutiyoq wawqipis willakunmi pëta y warmin Dianita ima yanapanqanta. Kënömi nin: “Alläpa llakishqa kayanqä hörakunapis Jehovä Diosnintsikman mañakuyta, reunionkunaman ëwëta, Bibliapita yachakuyta y yachatsikoq yarquytaqa manam dejayätsu. Y Jehoväqa kushishqa kayänäpaqmi yanapayämashqa. Seguïdum yarpäyä Jehovä Diosnintsik yanapayämänampaq y bendiciyämänampaq kaqta. Manam musyayätsu imanö yanapayämänampaq kaqtaqa, peru segürum këkäyä yanapayämänampaq kaqta”.

15. Llakikur sïguirqa, ¿imatataq rurashwan? Juk ejempluwan willakaramuy.

¹⁵ Diosnintsikpa kaqchö ocupädu karpis llakikur sïguirqa, ¿imatataq rurashwan? Këllaman pensarishun: ¿imatataq rurashwan waqtantsik nanaptin? Capazchi cada junaq pureq yarqunqantsik yanapamashwan. Peru tsëta rurashqapis mana päraptinqa, capazchi waqtantsik imanir nananqanta maslla musyapakushwan o doctormampis ëwashwan. Tsënöllam llakikur sïguirqa, tsë asuntupaq Bibliata y publicacionkunata maslla estudianantsik o hasta Diospa kaqchö poqushqa cristiänukunata consëjuta mañakunantsik. Y ¿ima maskunatataq rurashwan? Rikärishun.

16. ¿Imatan yanapamäshun imanir llakikunqantsikta o yarpachakunqantsikta musyanapaq? (Salmus 139:1-4, 23, 24).

¹⁶ Imanir llakikunqantsikta o yarpachakunqantsikta entiendinapaqmi Jehoväman mañakunantsik. Gobernanti Davidqa allim musyarqan pëta Jehovä Dios alli reqinqanta, tsëmi mañakurqan imanir ‘yarpachakunqanta’ entienditsinampaq (leyi Salmus 139:1-4, 23, 24). Noqantsikpis Jehovä Diosnintsiktam mañakunantsik imanir llakikunqantsikta o imanir yarpachakunqantsikta entiendïkatsimänapaq y mana yarpachakunapaq yanapëkamänapaq. Y tsëkunata rurarirqa kënömi pensanantsik: “¿Imanirtan alläpa yarpachakü o llakikü? ¿Imata ruranqätan o imaman yarpanqätan llakitsiman? ¿Mas alli kaqkunaman pensanäpa rantinku yarpachakunqäkunallaman yarparäkü?”.

17. ¿Ima tëmakunatataq yanapamänantsikpaq yachakushwan? (Fötuta rikäri).

¹⁷ Wananqantsikchö yanapamänapaq kaqkunata yachakushun. Allim kanman höra höraqa Jehovä Diosnintsik imanö kanqampita yachakunqantsik. Këllaman pensarishun: apostol Pablutaqa yanaparqan përëkur Jesus wanushqa kanqanman pensanqan y Jehovä perdonakoq kanqanman pensanqanmi. Tsëkunatam noqantsikpis rurashwan. Tsë tëmakunata tarinapaqqa yanapamäshun Jehoväpa testïgunkuna yachakur ashinapaq y Índice de las publicaciones Watch Tower neq publicacionkunam. Tsëchömi kë tëmakunata tarita puëdintsik: Jehovä llakipäkoq kanqanta, perdonakoq kanqanta y alläpa kuyakoq kanqanta. Yanapamänantsikpaq kaqkunatam juk listaman churanantsik, tsëpitanam yarpachakunqantsik hörakuna o llakikunqantsik hörakuna tsëkunata estudianantsik. Tsëchö këkaq textukunatapis leyishun y imanö yanapamanqantsikman alli pensashun (Filip. 4:8).

18. ¿Imakunapita yachakuyanqantan wakin wawqikunata y panikunata yanapashqa?

¹⁸ Punta kaq pärrafukunachö parlanqantsik Elïzam Jobpita yachakunampaq decidirqan. Kënömi nin: “Noqapis Jobnömi sientikurqä. Pëqa imëka sufrimientupam pasarqan. Y imanir sufrikanqanta mana musyarpis, mas sufrinqan hörakunam Jehoväman confiakurqan” (Job 42:1-6). Catorci kaq pärrafuchö parlanqantsik Diani jutiyoq paninam kënö nin: “Qowäwanqa o runäwanqa Jehovä Diosnintsik imanö kanqantam maslla yachakuykäyä. Y alläpam agradecikuyä pë munanqannö kayänäpaq yanapëkäyämanqanta. Imatapis mana allikunata rurayanqäpita y llakikuyanqä hörakunam yarpäyä, Jehovä Diosnintsik yachëkätsiyämanqanta y pë munanqannö kayänäpaq yanapëkäyämanqanta. Tsëman pensarmi mas amïgun kayanqäta sientiyä” (Is. 64:8).

JEHOVÄQA YANAPAMÄSHUNMI

19. Höra höraqa, ¿imanöraq sientikushun, peru imapitataq següru kanantsik?

¹⁹ Yanapamaqnintsik tëmakunata yachakurpis, reunionkunaman ëwarpis y yachatsikoq yarqurpis, höra höraqa apostol Pablunömi llakikushun. Peru Jehovä Diosnintsikmi alläpa mana yarpachakunapaq y mana llakikunapaq yanapamäshun. Jehoväpa amïgun karnin y limpiu concienciawan sirwirmi llakikunqantsikpitapis masqa kushishqa kawakuyta puëdishun.

20. ¿Imata ruranapaqtan kallpachakunantsik?

²⁰ Unë witsan mana allikunata ruranqantsikkunapita llakikurpis, problëmakunapa pasarpis o jutsasapa karnin imata pantarpis, tsëkunallaman mana yarparäkunapaq kallpachakushun. Y Jehoväqa alläpa mana llakikunapaqmi yanapamäshun (Sal. 143:10). Rasumpa kaqchöqa, imëka mana allikunapa pasarmi Shumaq Patsachöna kawakuyta munantsik. Tsë tiempuchöqa manam imapaqpis yarpachakushunnatsu ni llakikushunnatsu, tsëpa rantinqa kuyakoq Diosnintsikta sirwikanqantsikta musyarmi, cada junaq kushishqa shärikamushun.