2026 WATA 30 DE MARZUPITA 5 DE ABRILYAQ YACHAKUNAPAQ
76 KAQ CANCION ¿Kushishqaku shonqïki këkan?
Kushishqa wiyakuyänampaq rasumpa kaqta shumaq yachatsikushun
“ Teyta Jehovä, qamqa rasumpa kaqllatam parlanki y cumplinkim” (SAL. 31:5).
¿IMATATAQ YACHAKUSHUN?
Këchöqa yachakushun, Diosnintsikpita rasumpa kaqta imanö yachatsikunapaq kaqta y imanö parlakunapaq kaqtam.
1. ¿Imanötan kawakunantsik Jehoväpa familian kanantsikpaq?
¿IMËLLAPIS tapuyäshurqunkiku Diosnintsikpita rasumpa kaqta yachakurir imanö sientikunqëkita? Tsënö tapuyäshuptikiqa capazchi kënö nir contestarqëki: “Diosnintsikpita rasumpa kaqta yachakurirqa alläpam kushikurqä” o “Diosnintsikpita rasumpa kaqta yachakuriptïqa vïdämi cambiarirqan”. Rasumpa kaqchöqa, llapantsikpis alläpam valorantsik Bibliachö rasumpa kaqta yachakunqantsikta y tsë yachakunqantsikmi Diosnintsik munanqannö kawakunapaq yanapamantsik. Peru ¿imanirtan Jehovä munanqannö kawakuntsik? Pë munanqannö kawakurlla y rasumpa kaqta parlarlla pëpa familian këta puëdinqantsikta musyarmi (Sal. 15:1-3).a
2. (1) ¿Imanö kanqampitataq Jesusta reqiyaq? (2) ¿Imatan nunakunawan pasanan karqan Jesus rasumpa kaqta yachatsikuptin?
2 Jesusqa, imëpis rasumpa kaqllatam parlarqan. Tsëmi hasta chikeqninkunapis niyarqan, rasumpa kaqllata parlakunqanta (Mat. 22:16). Peru rasumpa kaqta yachatsikuptinqa, ¿imanötan nunakuna kayänan karqan? Jesusmi kënö nirqan: “Rakikëta apamoqmi shamurqö, tsëmi tsuriqa papänimpa contran kanqa, y warmi wamranam mamänimpa contran kanqa, y lumtsuynam suegrampa contran kanqa” (Mat. 10:35). Jesuswan qateqninkunaqa manam nunakuna chikinakuyänanta munartsu, Diosnintsikpita rasumpa kaqta yachatsikuyarqan (Mat. 23:37). Peru Jesusqa musyarqanmi rasumpa kaqta yachatsikuptinqa, wakin nunakuna chaskikuyänampaq kaqta y wakin nunakuna mana chaskikuyänampaq kaqta (2 Tes. 2:9-11).
3. ¿Imatataq këchö yachakushun?
3 Noqantsikpis Jesusnömi, rasumpa kaqllata parlakunapaq y Diosnintsikpita rasumpa kaqllata yachatsikunapaq kallpachakuntsik. Peru rasumpa kaqta yachatsikushqapis, wakinkunataqa manam gustantsu. Peru ¿nunakunata mana gustanqampitatsuraq shumaq parlakuyta dejarishwan? Manam. Tsëmi këchöqa yachakushun Diosnintsiklla rasumpa kaqta yachatsimanqantsikta, y imanir, imanö y imë parlakunapaq kaqta. Tsëkunata yachakunqantsikmi yanapamäshun, Diosnintsikpita nunakunata yachatsirninqa shumaq y alli pensëkur parlapänantsikpaq.
¿PILLATAN RASUMPA KAQTA YACHATSIMANTSIK?
4. ¿Imanötan Jehovä Diosnintsik?
4 Jehovällam rasumpa kaqllata parlakoqqa. Këllaman pensarishun: ima alli kanqampaq o ima mana alli kanqampaq ninqankunapis rasumpa kaqllam (Sal. 19:9; 119:142, 151). Pasakunampaq kaqkunata willakunqampis cumplikanmi (Is. 55:10, 11). Y änikunqankunatapis llapantam cumplin (Nüm. 23:19). Diosnintsikqa manam imëpis ulikuntsu o llullakuntsu (Heb. 6:18). Tsëchi Bibliachöqa Jehovä Diosnintsikpaq nin ‘rasumpa kaqllata parlakoq’ kanqanta y cumplinqanta (Sal. 31:5).
5. ¿Wakin nunakuna niyanqannöku Diosta reqinanqa fäciltsu? (Hëchus 17:27).
5 Wakin nunakunaqa niyan, ‘rasumpa kaqllata parlakoq’ Diosnintsikta reqinanqa mana fäcil kanqantam. Tsënö niyanqanqa, ¿rasumpaku? Manam. Tsëqa, ¿imanötan musyashwan Diosnintsik imanö kanqanta? Llapan kamanqankunata rikarmi (Rom. 1:20). Tsëmi apostol Pablupis Atënaschö këkar griëgu nunakunata nirqan, Diosnintsikqa ashiyänanta munanqanta y nirqanmi ‘cada ünupita alläpa karuchö’ mana këkanqanta (leyi Hëchus 17:27). Y Jehoväqa manam nunakuna ashiyänanllatatsu munan, sinöqa hasta rasumpa kaqta yachakuyta munaq nunakunatam akran pëpita yachakuyänampaq (Juan 6:44).
6. ¿Imakunatataq yachakuntsik Bibliata estudiarnin y imanötan sientikunki tsëkunata yachakushqa karnin?
6 Jehovä Diosnintsik imanö kanqantaqa Bibliata estudiarmi musyëta puëdintsik. Musyanqantsiknöpis, Diosnintsikmi santu espïritunwan nunakunata yanaparqan Palabran Bibliata qellqayänampaq (2 Pëd. 1:20, 21). Tsëmi Bibliachö yachakunqantsikkunaqa llapampis rasumpa kaqlla, y confiakuypaqmi. Këkunallaman pensarishun: Bibliachömi willamantsik, kë Patsachö y ciëluchö llapan kaqkunata Diosnintsik kamanqanta (Gen. 1:1, 26), imanir jutsasapa kanqantsikta, imanir sufrinqantsikta y imanir wanunqantsikta (Rom. 5:12; 6:23). Tsënöllam Bibliachö willamantsik, Satanas ‘ulikoq o llullakoq’ kanqanta y Satanas ruranqankunata ushakätsinampaq Tsurin Jesusta Jehovä churashqa kanqanta (Juan 8:44; Rom. 16:20). Tsënöllam Diosnintsikqa Palabranchö änimantsik, llapan mana alli nunakunata Jesus ushakätsinampaq kaqta, wanushqakunata kawaritsimunampaq kaqta, kë Patsata shumaq huertaman tikratsimunampaq kaqta y llapan nunakuna jutsannaqna tikrayänampaq kaqta (Juan 11:25, 26; 1 Juan 3:8). Rikärinqantsiknöpis Jehovä Diosnintsikqa rasumpa kaqtam yachatsimantsik. Tsëkunata musyanqantsikqa, ¿manaku alläpa kushikuypaq? Awmi. Y tsë musyanqantsikkunataqa llapan nunakunatam willëta puëdintsik (Mat. 28:19, 20).
¿IMANIRTAN RASUMPA KAQLLATA PARLASHWAN Y DIOSNINTSIKPITA RASUMPA KAQLLATA YACHATSIKUSHWAN?
7, 8. Rasumpa kaqta parlarpis, ¿imataq cuentachö katsishwan? Juk ejempluwan willakaramuy (Marcus 3:11, 12; fötukunata rikäri).
7 Yachakurinqantsiknöpis Jehoväpa familianchö kanapaqqa, rasumpa kaqllatam parlanantsik. Peru Diosnintsikta kushitsinapaqqa, rasumpa kaqta parlakurpis, rasumpa kaqta imanir parlëkanqantsiktam cuentachö katsinantsik. Këta entiendirinapaq yarpärishun Jesus yachatsikuykaptin ima pasakunqanta (leyi Marcus 3:11, 12). Galilëa qochapa amänunchö mëtsikaq nunakunata yachëkätsiptinmi, demoniuyoq nunakuna Jesuspa puntanman qonqurikuykur kënö niyarqan: “Qamqa Diospa Tsurinmi kanki”. Demoniukuna tsënö niyanqanqa, rasumpam karqan. Peru ¿imanirtan tsënö niyarqan? Capazchi, rasumpa kaqta parlayaptin nunakuna pëkunaman confiakuyänanta munayarqan, tsëpita tiempuwanqa yachëllapa Jehoväpita rakikätsiyänampaq. Rasumpa kaqta parlashqa karpis, tsë demoniukunaqa munëninkunata rurëta munarmi tsënö parlayarqan. Peru Jesusqa cuentatam qokurqan imanir rasumpa kaqta parlëkäyanqanta, tsëmi pëpita parlar sïguiyänantaqa munarqantsu.
8 ¿Imatataq këpita yachakuntsik? Rasumpa kaqta parlashqapis Jehovä Diosnintsikqa musyëkanmi imata logrëta munar parlëkanqantsikta. Tsëmi nunakunataqa, Jehovä Diosnintsikta rasumpa kuyarnin y alabayänanta munarnin rasumpa kaqta yachatsinantsik y manam noqantsikta alabamänantsikta munartsu (Mat. 5:16; igualaratsi Hëchus 14:12-15 textutawan).
Rasumpa kaqta Bibliawan yachatsikurqa, ¿pita alabayänantataq munantsik? (Leyi 7 y 8 kaq pärrafukunata).
9. ¿Imata ruranqantsiktan allitsu kanman?
9 Kananqa juk masman pensarishun. ¿Imëtan alabamänantsikta munarnin imatapis parlashwan? Capaz juk anciänu willaramashwan pipis mana musyanqanta y noqantsikna, jukkunata willar qallëkushwan. Tsëna wakinkunaqa, tsë willakunqantsikkuna rasumpa kanqanta cuentata qokurir, imëkatapis musyanqantsikta pensarnin alabapämashwan. Peru pëkuna alabapämashqapis yarpänantsikmi, Jehovä Diosnintsiktaqa tsë rurëkanqantsik mana gustanqanta (Prov. 11:13). ¿Imanirtan Jehoväta gustantsu? Rasumpa kaqta willakushqa kashqapis manam noqantsiktsu derëchuyoq kantsik tsëkunata willakunapaq. Tsëmi allitsu kanman alabamänantsikta munarlla imatapis willakunqantsik.
¿IMANÖTAN RASUMPA KAQTA PARLAKUSHWAN Y IMANÖTAN DIOSNINTSIKPITA RASUMPA KAQTA YACHATSIKUSHWAN?
10. Colosensis 4:6 textuchö parlakuyanqëkiqa “imëpis shumaq katsun” nirqa, ¿imanö parlakunapaqtan nikämantsik?
10 (Leyi Colosensis 4:6). Apostol Pablum Colösaschö këkaq cristiänukunata kënö nirqan: “Parlakuyanqëkiqa kachitashqanö imëpis shumaq katsun”. “Imëpis shumaq katsun” ninqanqa, ¿imatataq griëgu idiömachö entienditsikun? Kuyëpa y respëtuwan parlakunantsikpaqmi, y manam yanapanampaq kaqllamanqa pensanantsiktsu.
11, 12. ¿Imanirtan nunakunata kuyëllapa y respëtuwan parlapashwan? Juk ejempluwan willakaramuy (fötukunata rikäri).
11 Kuyëllapa y respëtuwan parlanantsikpaq apostol Pablu consejakunqantaqa, Diosnintsikpita yachatsikunqantsik höram cuentachö katsinantsik. Hebrëus 4:12 textuchömi nimantsik rasumpa kaqta yachatsikunqantsikkunaqa ishkan lädupa alli afilashqa espädanö kanqanta y shonqunkunachö nunakuna imanö kayanqanta musyatsinqanta. Tsëmi alli pensëkur mana yachatsikurqa, pitapis ofendirishwan o discutïmampis chärishwan. Rikärishun juk ejempluta.
12 Diospita yachatsikuykar taririshwan, rasumpa kaqta yachakuyta munaq nunata. Peru tsë nunaqa santukunaman mañakunman y familianwan juntu Navidäta y Pascuata celebrë gustanman. ¿Allitsuraq kanman santukunaman mañakuy y Navidäta y Pascuata celebrë mana alli kanqanta Bibliawan tsë höra rikäratsinqantsik? (Is. 44:14-20; 2 Cor. 6:14-17). Rasumpa kaqta Bibliachö rikätsirpis, manam tsë nunata yanapëkashwantsu kushishqa chaskikunampaq, tsëpa rantinqa mana allim sientikatsishwan. Tsëmi tsë asuntutaqa mas yachakur sïguiptinraq ninantsik.
Bibliawan rasumpa kaqta yachatsikurqa, ¿imatataq rurashwantsu? (Leyi 11 y 12 kaq pärrafukunata).b
13. ¿Imanötan parlakushwan?
13 ¿Imanö mastan parlakushwan? Këllaman pensarishun: mikuynintsikpa kachin alli paqtashqa kaptinqa mishkinmi. Tsënöllam, Diosnintsikpita rasumpa kaqta yachatsikunqantsik shumaq kanampaqqa, kuyëllapa parlakunantsik (Job 12:11). Tsëmi apostol Pablu kënö nirqan: “Parlakuyanqëkiqa kachitashqanö” katsun. Peru kuyëllapa parlakurpis, manam rasumpa kaqta cläru parlapëtaqa dejanantsiktsu. Höraqa tsëta rurananqa manam fäciltsu kanman. Imanömi llapan nunatatsu tsë mikuylla gustan, tsënömi imanö parlakunqantsikpis llapankunatatsu gustan. Këllaman pensarishun: wakin markachö nunakunaqa munayan imatapis directu niyänantam, hasta mayorkunapis tsënö parlapäyänantam munayan. Peru wakin markakunachö tsënö parlapaptikiqa, manam gustayantsu. Tsëmi apostol Pabluqa nirqan, “cada ünuta imanö contestëta” yachanapaq. Tsëmi markantsikmannö o costumbrintsikmannö parlakunapa rantinqa, cada nunata gustanqanmannö parlapänantsik.
¿IMËTAN RASUMPA KAQTA PARLAKUSHWAN Y IMËTAN DIOSNINTSIKPITA RASUMPA KAQTA YACHATSIKUSHWAN?
14. ¿Jesusqa llapan musyanqantaku qateqninkunata yachatsirqan?
14 Jesusqa imëpis kuyëllapa y shumaqllam qateqninkunata imëkata yachatsirqan (Mar. 6:34). Peru maskunata yachatsita munarpis, manam llapan musyanqantatsu yachatsirqan. Pëqa musyarqanmi maskunata yachatsiptinqa, entiendita mana puëdiyänampaq kaqta. Tsënöllam musyarqan wakin wakintaqa tiempu pasaptinraq entiendiyänampaq kaqta. Tsëmi nirqan maskunata yachatsiptinqa, entiendita mana puëdiyänampaq kaqta (Juan 16:12). ¿Imatataq Jesuspita yachakuntsik?
15. ¿Llapan musyanqantsiktatsuraq estudiantikunata juklla yacharatsishwan? (Proverbius 25:11; fötukunata rikäri).
15 Manam allitsu kanman, Diosnintsikpita imëkata yachakushqa karpis llapan musyanqantsikta pitapis juklla yacharatsinqantsik. Tsëpa rantinqa, Jesusnömi cuentachö katsinantsik imakunata yachakuyta puëdiyanqanta. Pensarishun Navidätawan Pascuata celebrëta gustaq nunaman. Noqantsikqa musyantsikmi Navidäta y Pascuata celebrëqa Jehoväta mana gustanqanta, y tsë fiestakunataqa Diosta mana sirweq nunakunalla rurayanqanta. Peru këman pensarishun: tsë nunawan Bibliapita yachakur qallëkushwan Navidäta o Pascuata celebrayänampaq juk ishkë semänakuna pishikaptin. ¿Allitsuraq kanman Bibliawan rikäratsinqantsik Navidäta y Pascuata celebrë mana alli kanqanta? Tsëta rurarqa, ¿kuyëllapatsuraq y respëtuwantsuraq parlapëkashwan? Manam. Yarpänantsikmi, wakin estudiantikunaqa rasumpa kaqta musyarirqa rasllam o sasllam cambiariyan, peru wakin estudiantikunaqa mas tiemputaran wanayan alli pensayänampaq y cambiayänampaq. Tsëmi cambiukunata rurayänampaq rasumpa kaqta estudiantikunata yachatsirpis, imë yachatsinapaq kaqta alli pensanantsik (leyi Proverbius 25:11).
Jesusnö rasumpa kaqta yachatsikurqa, alli pensashun imata ninapaq kaqta y imë ninapaq kaqta. (Leyi 15 kaq pärrafuta).
16. ¿Imanötan Bibliata estudiëkaqkunata yanapashwan ‘rasumpa kaqta’ yachakuyanqannö kawayänampaq?
16 Jehovä Diosnintsikpita rasumpa kaqta yachatsikurninqa, alläpam kushikuntsik. Peru ‘rasumpa kaqta’ yachakuyanqannö kawar sïguiyänampaqqa, noqantsikmi alli ejemplu kanantsik y Biblia ninqannö kawakunantsik (3 Juan 3, 4). Y yachakurinqantsiknömi imatapis rasumpa kaqta parlarqa, imanir rasumpa kaqta nikanqantsikta cuentachö katsinantsik y pitapis kuyëllapa y respëtuwan parlapänantsik, y allim pensanantsik rasumpa kaqta imë parlapänantsikpaq kaqta. Y pillapis alabamënintsikta munaptinqa, Jehoväta alabanampaqmi ninantsik. Tsëkunata rurashqam, rasumpa kaqllata parlakoq Diosnintsikpa sirweqnin kanqantsikta musyayanqa.
160 KAQ CANCION Alli noticiakuna
a Këchö rasumpa kaq nirqa, masqa parlëkantsik Biblia yachatsikunqampaqmi, peru höra höraqa rasumpa kaqta parlanqantsikpaqpis nikanmi.
b FÖTUKUNATA ENTIENDINAPAQ: Punta kaq fötuchöqa Navidäta celebrëta gustaq nunatam juk wawqi parlapëkan y Navidäta celebrë mana alli kanqantam yachëkätsin. Juk kaq fötuchönam tsë wawqilla tsë nunata rikëkätsin papäkunapaq shumaq consëjukunata. ¿Mëqan yachatsikunqantan mas alli kanman?