Unay saqra tamya shamushanpi ¿pikunataq Dyusta kasuranllapa?

Uk runa Noé shutiqpa tyimpunpi, runakunaqa kusala saqra imakunata ruraqllapa (Lucas 17:27).

Adanwan Evaqa wamrakutinllapaqa tukuy pachapi runakuna untaran, chaymantaqa wakin angelkunamapis Dyusninchikmanta ashurqa dyablu yupay tikrakaranllapa.

Kay angelkunaqa wayra yupay karanllapa, piru kay pachaman shamunanpaqqa runa yupay tikrakaranllapa. Chaynu warmikunawan kasararqa wamrayjun kananllapapaq. Kay warmikunaqa kusala saqra wamrayjun karanllapa, kaykunaqa wakinkunata kusalata qischaqllapa.

Pachapiqa kusala saqra runakuna untaranllapa. Biblyaqa nin “kay pachapi kay saqra runakunaqa kusalata untayaranllapa” nir. Paykunaqa tukuy tyimputa yarpuqllapa saqra imakunalata rurananllapapaq.

Noeqa Dyusninchikta kasur wasi wampuqta ruraran (Génesis 6:13, 14, 18, 19, 22).

Noeqa uk kusala allin runa karan. Jyubá Dyusqa Noeta niran tukuy mana allin runakunata tukchinqa nir, syilumanta uk kusala manchaypaq tamyata kaĉamur.

Jyubá Dyusqa Noeta willaran uk kusala atun wampuq wasita qirumanta rurananpaq: chayqa Noepa karan. Chaymantaqa itaran ayllunkunata tukuy animalkunata ima.

Noeqa wakin runakunata willaran kusala saqra tamya shamunqa nir. Piru paykunaqa mana uyaparanllapachu, ukkunaqa asiparanllapa wakinkunaqa kusalata piñakuranllapa ima.

Noeqa wampuq wasita tukchirqa tukuy animalkunata chayman itaran.