¿Imapaqtaq Jesusqa wanuran?

Jesusqa wanuran nuqanchikkuna tukuy tyimputana kawsanallapapaq (Juan 3:16).

Kimsa diyana Jesús wanushanqa katin, aykala warmikuna may pampakashanman ritinqa manana karannachu, Jyubá Dyusninchikqa kawsachimushana karan chayrayku.

Mas tardikaqqa apustulninkunaman rikariran.

Payqa mana kawsamuranchu runa aychayjun yupaychu, ashwanpis Jyubá Dyusqa kawsachimuran wayrata yupay. Apustulninkunaqa syiluman riqta rikaran. Chayrayku kananqa syilupiqa kusala ángel pudirniyjun, mana wanuqchu.

Dyus Jesusta kawsachimurqa kusala mantakuq ruraran mantakunanmanta (Apocalipsis 11:15).

Jesusqa wanuran, Dyusninchik uchanchikkunamanta pirdunamanapaq, wanurpis qashan kawsamunapaq ima (Mateo 20:28). Jesús wanushanrayku tukuy tyimputa kawsayta puytinchikpis.

Jyubá Dyusqa Jesusta akraran syilumantapacha mantakunanpaq. Mana paylachu mantakunqa, ashwanpis 144.000 runa kasukuqkunawan syiluman kawsar ritinllapa. Dyuspa mantakunanqa kusa allin kanqa (Apocalipsis 14:1-3).

Chay Dyuspa allin mantakunanqa kay pachata kusala shumaqpaq tikranqa. Manana kanqachu guerrakuna, runa maqanakuqkuna, mallaqpaq qischakaqkuna imamapis, ashwanpis tukuy runakuna kusalata kushikurna kawsanqa (Salmo 145:16).