YAĈHAKUNA 10
¿Imapaqtaq Jehová Diospa testigonkunawan tantakankiman?
¿Jehová Diospa testigonkunapa tantakanan wasiman rir tantakashaykinachu? Ichapis, manchakur manaraq rishaykichu kanqa. Pero yarpushayki kanqa, ¿imatataq Jehová Diospa testigonkunaqa tantakarqa ruranllapa nir? ¿Nuqapis rinaypaqqa allinchu kanqa? Tantakarqa mas Jehová Diospaq amigon tikrakanki, yanapashunqapis shumaq kawsayta puytinaykipaq. Chaykunamanta kaypi mas yaĉhakushunllapa.
1. ¿Imapaqtaq Jehová Diospa testigonkuna tantakanllapa?
Uk Bibliata escribikuqqa niran: “Tantakasha kaqkunapimi TAYTA DIOSPAQQA shumaqta rimashaq” (Salmo 26:12). Kay tiempopi entero pachapi, Jehová Diospa testigonkunaqa tukuy semanakunapi alegre tantakanllapa Diosmanta yaĉhakunanllapapaq, Diosta cantananllapapaq, Diosta mañakunallapapaq ima. Chaykunata rurarqa Diosta alabayanllapa. Chaynullapis, cada año kusala achka hermanonkunawan tantakanllapa.
2. ¿Imatataq tantakarqa yaĉhakunki?
Tantakarqa, Biblia nishanta allita intrakayta puytinki (liyiy Nehemías 8:8). Qam chayman rirqa mas Jehová Diosmanta yaĉhakunki. Diosmanta mas yaĉhakurqa mas payman qimikanki. Yaĉhakunkipis imatataq rurankiman shumaqta kawsayta puytinaykipaq nir (Isaías 48:17, 18).
3. ¿Tantakarqa imatataq wakinkunamantaqa yaĉhakunki?
Jehová Diosqa Bibliapi nimanchik “ukninchikllapa ukninchikllapa allita riqsinakuypaqllapa, esfuerzakaypaqllapapis kusalata munanakunallapapaq allin imakunata ruranallapapaq ima, ama wakinkuna yupay tantakayman riytaqa dejashunchu” (Hebreos 10:24, 25, NWT). Tantakanayllapaman shamurqa, riqchaq runakunata riqsinki, paykunapis Diosmanta yaĉhakunanllapapaq tantakanllapa. Chaypi shumaq imakunata Bibliamanta uyakurqa, kusalata animakunki (liyiy Romanos 1:11, 12). Reunionman rirqa, riqsinki achka runakuna problemayjun karmapis Diosta alegre servir siguiqkunata. Chayrayku Jehová Diosqa tantakanata munayan.
MAS INTRAKASHUNLLAPA
Yaĉhakushunllapa imanutaq Jehová Diospa testigonkunaqa tantakanllapa. Yaĉhakushunpis imapaqtaq qampis kusalata esfuerzakankiman tantakanaykipaq nir
4. ¿Imapaqtaq Jehová Diospa testigonkunaqa tantakanllapa?
Punta siglopiqa cristianokunaqa Diosta adorananllapapaq tantakaqllapa (Romanos 16:3-5). Liyiyllapa Colosenses 3:16, chaymantaqa kaykunamanta parlayllapa:
¿Imanutaq unay tiempopi cristianokunaqa Diosta adoraqllapa?
Kanan tiempopipis Jehová Diospa testigonkunaqa tantakanllapa Diosta adorananllapapaq. Imanutaq Jehová Diospa testigonkunaqa tantakanllapa nir yaĉhanaykipaq VIDEOTA rikayllapa. Dibujotapis rikay, chaymantaqa kaykunamanta parlayllapa:
Colosenses 3:16 nishannu, ¿Jehová Diospa testigonkuna unay tiempo cristianokuna yupaychu tantakayanllapa?
Videota manaqa dibujota rikashaykinu, ¿imataq mas gustashusha tantakanayllapamantaqa?
Liyiyllapa 2 Corintios 9:7, chaymantaqa kaykunamanta parlayllapa:
¿Imapaqtaq Jehová Diospa testigonkunaqa tantakananllapapiqa mana qillayta mañakunllapachu?
Yaĉhachishuyan chaywan pulla rikay, imatataq kay semanaqa reunionpi yaĉhakushunllapa nir.
Kay semanapi yaĉhakushunllapa chaykunamantaqa, ¿imataq mas gustashusha?
¿Yaĉhayaraykichu?
Maypitaq tantakayman nir yaĉhanaykipaq internetman yaykur jw.org escribir maskakuy.
Tantakanayllapapiqa kan discursokuna, naypaqmanta-pacha yaĉhachimanchikllapa wasin wasin yaĉhachikunapaq, kanpis videokuna ima. Tantakanayllapataqa qallarichinillapa, tukchinillapa Diosta mañakur, cantar ima.
Naypaqmanta tapukutinllapaqa tantakashakunaqa makinllapata alsar rimayta puytinllapa.
Tukuyla shamuyta puytinllapa, runakuna, warmikuna, rukukuna, wamrakuna ima.
Jehová Diospa testigonkunaqa gratis tantakanllapa. Mana qillayta mañashunqallapachu, mana yaykunaykipaq cobrashunqallapachu ima.
5. Esfuerzakay reunionman rinaykipaq
Jesuspa ayllunqa uk pueblo Nazaret shutiqpi kawsaqllapa, pero cada año uk kutila Jerusalenman riqllapa Diosta templopi adorananllapapaq, Jerusalenman ĉhananllapapaqqa kimsa diata ĉhakpa qaqakunapa rurinta riqllapa. Liyiyllapa Lucas 2:39-42, chaymantaqa kaykunamanta parlayllapa:
¿Jesús ayllunkunawan kusalata esfuerzakaqllapachu Jerusalenman rinanllapapaq?
Qamtaqa, ¿imakunataq arkashuyta puytinman reunionman rinaykipaq?
¿Imapaqtaq kusalata esfuerzakankiman reunionman rinaykipaq?
Bibliaqa yaĉhachimanchik Diosta adoranapaq reunionman riyqa kusala allin nir. Liyiyllapa Hebreos 10:24, 25, chaymantaqa kaykunamanta parlayllapa:
¿Imapaqtaq tantakananchikmanqa ama faltachuwanchu?
WAKINKUNAQA KAYNU YARPUNLLAPA: “Diosta adoranapaqqa mana tantakayta ministinchikchu. Wasiylapi Bibliaytaqa liyiyta puytini”.
¿Ima ninkitaq qamqa?
KAYKUNATA YAĈHAKUSHANCHIK
Jehová Diospa testigonkunawan tantakarqa mas Jehová Diosmanta yaĉhakunki. Mas paypaq amigon tikrakanki alabayta puytinki ima.
¿Imataq ninkiman?
¿Imapaqtaq Jehová Diosqa reunionman rinata munayan?
¿Imakunatataq yaĉhakunki Jehová Diospa testigonkunawan tantakarqa?
¿Imanu mastaq reunionkunaqa yanapashuyta puytin?
MAS YAĈHAKUNAYKIPAQ
¿Reunionman rinaykipaq manchakunkichu? Uk runito chaynu manchakuyaran pero reunionman ritinqa kusalata gustaran. ¿Imapaqtaq? Kay videota rikay.
Uk musu achka imakunata ruraran reunionman ama faltananpaqchu. Rikay kay videota.
Liyiy imatataq wakinkunaqa yarpunllapa tantakaykunamantaqa nir.
“¿Por qué estaría bien ir a las reuniones en el Salón del Reino?” (Artículo de jw.org)
Yaĉhakuy imanutaq uk runa suwakuq, masiawta upyaq, maqakuq ima Jehova Diospa testigonkunawan tantakar saqra vidantaqa dejaran.
“No iba a ningún lado sin mi arma” (La Atalaya, 1 de julio de 2014)