YAĈHAKUNA 14
¿Imanutaq Diosqa adoranata munayan?
Yaĉhakushanchiknu Diosqa yanqa religionkunataqa mana allinta rikanchu. Pero Taytanchik Diostaqa pay munashannu adorar alegriyachiyta puytinchik. Chayqa, ¿imanutaq Diosqa adoranallapata munayan? (Santiago 1:27; nota). Rikashunllapa imatataq Bibliaqa yaĉhachimanchik nir.
1. ¿Maypitaq Diosqa pay munashannu adoranapaq yaĉhachimanchik?
Diosqa pay munashannu adoranapaqqa Biblianwan yaĉhachimanchik. Jesusqa Diosta niran: “Rimaynikiqami kusala chiqap” [manaqa cierto] nir (Juan 17:17). Achka religionkunaqa mana Biblia niyashantachu yaĉhachikunllapa; ashwan, paykuna munayashanta yaĉhachikunllapa, runakuna yarpuyashanta ima. Pero Jehová Diostaqa mana chayqa gustanchu (liyiy Marcos 7:9). Ashwan, tukuy nuqanchikkunaqa Diostaqa alegriyachishunllapa Biblianta liyir, consejonkunata siguir ima.
2. ¿Imanutaq Jehová Diosqa adoranata munayan?
Jehová Diosqa tukuyta ruramashanchik, chayrayku paylata adoranata munayan (Apocalipsis 4:11). Chaymi, Diosninchiktaqa kabalta munaypaqllapa, paylata adoraypaqllapa, ama yanqa dioskunawan adoraypaqchu ima (liyiy Isaías 42:8).
Diostaqa adoraypaqllapa ‘ofrendapaq lugarnin uk kusa allin kawsaq ofrendita yupayna’ (Romanos 12:1). Chaymi, pay munashannu kawsaypaqllapa. Chayrayku, Jehová Diosta munaqkunaqa respetanllapa, payta kasur casaranllapa ima. Chaynullapis, Diosta servinaqkunaqa mana cocapa rapranta aqtunllapachu, mana masiawta tragota upyanllapachu ima.a
3. ¿Imapaqtaq Jehová Diostaqa adoraypaqllapa payta kasuqkunawan?
Tukuy semanakunata tantakarqa Jehová Diostami “tantanakusha kaqkunawan” alabayta puytinchik (Salmo 111:1, 2). Payta alabayta puytinchik cantanakunata shunqunchikmanta-pacha cantar (liyiy Salmo 104:33). Jehová Diosqa kabalta munamanchik, chayrayku tantakanata munayan, chaynullapis tantakarqa alegriyashun, tukuy tiempo kawsanallapapaq yanapamashun ima. Tantakarqa wakinkunata animachinchik, wakinkunapis nuqanchikkunata animachimanchik ima.
MAS INTRAKASHUNLLAPA
Yaĉhakushunllapa imapaqtaq Jehová Diosqa ama yanqa dioskunawan adoranata munayanchu nir. Yaĉhakushunllapapis imanu mastaq Diostaqa alabayta puytinchikllapa nir.
4. Ama yanqa dioskunawan Diostaqa adoraypaqchu
¿Imanutaq yaĉhanchik Diosqa ama yanqa dioskunawan adoranata munayanchu nir? VIDEOTA rikayllapa, chaymantaqa kaykunamanta parlayllapa:
Unay tiempopi wakin Diosta serviqkuna idolowan adoraranllapa, ¿allinchu karan? ¿Imapaqtaq?
Achka runakuna yanqa dioskunaqa Diosman qimikachin nir yarpunllapa. Pero, ¿chaynuchu kanqa? ¿Manaqachu Diosmantaqa ashuchiyanqa? Liyiyllapa Éxodo 20:4-6; Salmo 106:35, 36 ima, chaymantaqa kaykunamanta parlayllapa:
¿Imakunawantaq runakunaqa Diosta adoraqta rikashayki?
¿Jehová Diosqa yanqa dioskunawan adoranata munayanchu?
¿Imatataq qamqa yarpunki?
5. Jehová Dioslata adorashaqa manana yanqa religionkunaqa pantachimashunchu
Rikashunllapa imapaqtaq Jehová Diosta pay munashannu adorashaqa manana yanqa religionkunaqa pantachimashunchu nir. VIDEOTA rikayllapa.
Liyiyllapa Salmo 91:14, chaymantaqa kaykunamanta parlayllapa:
Jehová Diosta munasha, paylata adorasha imaqa, ¿imatataq payqa nuqanchikkunapaq ruranqa?
6. Diosta adoranallapapaq tantakanchik
Shunqunchikmanta-pacha cantar, makinchikllapata alsar, rimar imaqa, Jehová Diosta alabayanchikllapa, ukninchikllapa uknichikllapa animachinakunchikllapa ima. Liyiyllapa Salmo 22:22, chaymantaqa kaykunamanta parlayllapa:
Makinllapata alsar rimatinllapaqa, ¿gustashunchu?
Qamtapis, ¿gustashunmanchu makiykita alsar rimayta?
7. Jehová Diosqa yaĉhakushanchikkunata wakinkunata parlanata munayan
Maypi karpis Diosmantaqa parlakuyta puytinchik. Liyiyllapa Salmo 9:1; 34:1 ima, chaymantaqa kaykunamanta parlayllapa:
Bibliapi yaĉhakushaykimantaqa, ¿imakunatataq wakinkunata parlanayanki?
WAKINKUNAQA KAYNU YARPUNLLAPA: “Mana saqra imakunata rurarqa, imanupis Diostaqa adorayta puytini”.
¿Ima ninkitaq qamqa?
KAYKUNATA YAĈHAKUSHANCHIK
Taytanchik Diostaqa kusalata alegriyachinchik paylata adorar, alabanallapapaq tantakar, yaĉhakushanchikkunata wakinkunata parlar ima.
¿Imataq ninkiman?
¿Imanutaq Diosqa adoranata munayan?
¿Imapaqtaq Jehová Dioslata adoraypaq?
¿Imapaqtaq Jehová Diostaqa adoraypaqllapa payta kasuqkunawan?
MAS YAĈHAKUNAYKIPAQ
Liyiy imanutaq uk warmiqa idolokunata adorayta dejaran nir.
“La Biblia les cambió la vida” (La Atalaya, 1 de julio de 2011)
Yaĉhakuy imakunamantataq makiykita alsarqa rimayta puytinki nir.
“Alabemos a Jehová en la congregación” (La Atalaya, enero de 2019)
Rikakuy imanutaq uk musutaqa tantakayqa yanaparan nir.
Achka runakunaqa cruzta adorar Diosman qimikanchik nir yarpunllapa. Pero, ¿cruzqa Diosman qimikachimayashunchu?
“¿Por qué no usan la cruz los testigos de Jehová?” (Artículo de jw.org)
a Kaykunataqa mas yaĉhakur siguishunllapa yaĉhakuna shamuqkunapi.