¿Imanutaq Jehová Diosqa?

Jehová Diosqa, ¿imanutaq qampaqqa? ¿Kusalatachu Diostaqa qamqa manchanki? Chaymi, mana maydiyapis Diostaqa riqsiyta puytishaqchu nir yarpunkiman. Pero Bibliaqa yaĉhachimanchik Jehová Diosqa kusala allin Dios, kusalata qampaqqa llakin ima nir.

1. ¿Imapaqtaq Jehová Diostaqa mana rikayta puytinchikchu?

ʻPayqa espírituʼ katin (Juan 4:24). Jehová Diosqa mana nuqanchikkuna yupay aychayjun, tulluyjun imachu. Paymi cielopi kawsan, chayrayku chay kawsayashan lugartapis mana rikayta puytinchikchu.

2. ¿Imanu shunquyjuntaq Jehová Diosqa?

Diostaqa mana rikayta puytirmapis, amigon kayta puytinchik, Jehová Diosqa shunqunmanta-pacha kusala llakipakuq Dios. Bibliaqa nin: ‘Chaqa Tayta [Jehová, NWT] Diosqami allin kaqlata munan. Paypa kusa allinla kaqninkunataqami mana askwintallaqa dejanchu. Tukuy tiempopaqmi cuidan’ (Salmo 37:28). ‘Diosninchikqa kusa allita yaĉhan llakipakuyta’, chayrayku tukuy qischakaqkunataqa mana dejanqachu (Santiago 5:11). ‘Tayta [Jehová, NWT] Diosqami llakishala shunquyjunkunawanqa pulla. Llakishala kaqkunatapis washan’ (Salmo 34:18). ¿Yaĉhayaraykichu? Mana allinta tukuqkunaqa Diospa shunqunta llakichinllapa (Salmo 78:40, 41). Pero, allin imakunata ruraqkuna-shuypaqa Jehová Diospa shunquntaqa kusala alegrichinllapa (liyiy Proverbios 27:11).

3. ¿Imanutaq Jehová Diosqa kusalata llakipashuni nir rikachimanchik?

‘Diosqami kusala llakipakuq’ (1 Juan 4:8). Jehová Diosqa kusalata munamarninchik llakipamanchikllapa, chayrayku Bibliawan consejamanchik. Paypis kabal achka imakunata shumaq kawsanapaq qumashanchikllapa (liyiy Hechos 14:17). Diosqa kusa shumaqta ruramashanchik, chaymi allita rikakunapapaq nawinchikta qumashanchik, mishkita mikunapaq shiminchikta qumashanchik, shumaq cantanakunata uyapanallapapaq rinrinchikta qumashanchik ima. Diosqa kusala shumaqta kawsanata munayan.

MAS INTRAKASHUNLLAPA

4. Santo espiritumi: Diospa podernin

Nuqanchikkunaqa imanchikkunata ruranchik makinchikwan, ¿manchu? Jehová Dios-shuypaqa tukuy imata ruran santo espiritunwan. Bibliaqa nin santo espirituqa mana Dioschu, ashwanmi Diospa podernin nir. Liyiyllapa Lucas 11:13; Hechos 2:17 ima, chaymantaqa kaykunamanta parlayllapa:

• Bibliaqa nin Diosqa santo espirituntaqa mañakuqkunaman iĉhan nir. Chaymi, ¿imataq santo espirituqa qampaqqa, Dioschu manaqa Diospa poderninchu? ¿Imapaqtaq qamqa chaynu yarpunki?

Jehová Diosqa santo espiritunwan kusala shumaq imakunata rurayta puytin. Liyiyllapa Salmo 33:6; 2 Pedro 1:20, 21 ima, chaymantaqa kaykunamanta parlayllapa:

• ¿Imakunatataq Jehová Diosqa santo espiritunwan rurasha?

5. Jehová Diosqa kusala llakipakuq katin payman qimikananchikllapa

Moisés allita Diosta serviyarmapis mas allita Diostaqa riqsinaran. Chaymi, Moisesqa Diosta niran: “nannikikunata riqsichimay-ari, chaynu riqsishuyta puytinaypaq” (Éxodo 33:13, NWT). Jehová Diosqa Moisesta willaran imanutaq payqa nir. Liyiyllapa Éxodo 34:4-6, chaymantaqa kaykunamanta parlayllapa:

• ¿Imatataq Diosqa Moisesta willaran?

• ¿Imataq mas Jehová Diosmanta gustashun?

6. Jehová Dios tukuypaq yarpun

Diosqa pueblonta Egiptopi qischakaqta rikarqa, ¿imanutaq sintiran? AUDIOTA uyakuyllapa manaqa liyiyllapa Éxodo 3:1-10. Chaymantaqa kaykunamanta parlayllapa:

AUDIO: A Jehová le dolió ver sufrir a su pueblo (2:45)

• Jehová Diosqa pueblonpaq kusalata llakin nir yaĉharqa, ¿imatataq yaĉhakunki? (Liyiyllapa versiculokuna 7, 8 ima).

• ¿Jehová Diosqa tukuy runakunata yanapanayanqachu? ¿Puytinqachu? ¿Imapaqtaq chaynu yarpunki?

7. Jehová Dios tukuy rurashankunata rikar, paytaqa mas riqsiyta puytinchik

Dios tukuy imata rurashankunawan, payqa imanutaq nir yaĉhachimanchik. VIDEOTA rikayllapa. Liyiyllapa Romanos 1:20, chaymantaqa kaykunamanta parlayllapa:

VIDEO: La creación es prueba del amor de Jehová: el cuerpo humano (1:57)

• Jehová Dios tukuy rurashanta rikarqa, ¿imataq paymanta yaĉhakunki?

KAYKUNATA YAĈHAKUSHANCHIK

Jehová Diosqa espíritu, chayrayku mana rikayta puytinchikchu. Diosqa kusala llakipakuq, kusala munakuq, kusala yaĉhaq, kusala poderniyjun ima.

¿Imataq ninkiman?

• ¿Imapaqtaq Jehová Diosta mana rikayta puytinchikchu?

• ¿Imataq Diospa santo espiritunqa?

• ¿Imanutaq Jehová Diosqa?

MAS YAĈHAKUNAYKIPAQ

Mas Jehová Diosmanta yaĉhakunaykipaq kayta liyiy:

“¿Cómo es Dios?” (La Atalaya, núm. 1 2019)

Yaĉhakuy imapaqtaq ninchikllapa Diosqa mana tukuy lugarkunapi puriyanchu nir.

“¿Está Dios en todas partes? ¿Es omnipresente?” (Artículo de jw.org)

Yaĉhakuy imapaqtaq Biblia niyan santo espirituqa Diospa “makin” nir.

“¿Qué es el espíritu santo?” (Artículo de jw.org)

Yaĉhakuy imataq yanaparan uk runitu mana rikakuqta Diospi creyinanpaq.

“Ahora siento que puedo ayudar a los demás” (La Atalaya, 1 de octubre de 2015)