YAĈHAKUNA 17
¿Imanutaq Jesusqa karan?
Jesusqa kay pachapi imakunatataq ruraran, imakunamantataq rimaran ima nir mas yaĉharqa, payman mas qimikashunllapa, Taytanchik Jehová Diosmanpis mas qimikashun. ¿Imanutaq Jesusqa karan? ¿Imanutaq nuqanchikkunapis pay yupay kayta puytinchik?
1. ¿Imatataq Jesusqa Taytan yupay ruraran?
Jesusqa manaraq pachamapis kayatinchu unaq cielopiqa Taytanwanqa kawsaqna, chayrayku Taytantaqa allita riqsin. Chaymi, Taytan yupay yarpun, llakipakun, Taytan yupay tukun ima (liyiy Juan 5:19). Jesusqa Taytan yupay shunquyjun, chayrayku paylla niran: “Chaqa mayqanpis nuqata rikamaqqami Taytaytapis rikayanna” nir (Juan 14:9). Chayrayku, Jesusta allita riqsirqa Taytanchik Jehová Diostapis allita riqsinki. Jesús kay pachapi karqa tukuy runakunata llakiparan. Chaynulla, Taytanchik Jehová Diospis tukuy runakunapaq kusalata llakin.
2. ¿Imanutaq yaĉhanchik Jesusqa kusalata Taytanta munaq nir?
Jesusqa niran: ʻChaynu pasatinmi, tukuyla runakuna cuentata qukanqallapa Taytayta chiqapta [manaqa ciertota] munarmi, pay nimashanta imatapis ruraniʼ nir (Juan 14:31). Jesús kay pachapi kawsayarqa, kusala saqra imakuna pasatinmapis Taytanta kusalata munar tukuy tiempo kasuran. Chaynullapis, Jesustaqa kusalata gustaq Taytanmanta parlakuyta, wakinkunatapis yanapaq Taytanpa amigon kananllapapaq (Juan 14:23).
3. ¿Imanutaq yaĉhanchik Jesusqa tukuy runakunata kusalata munaq nir?
Bibliaqa nin Jesusqa “tukuy runakunapaq kusalata llakiq” nir (Proverbios 8:31, NWT). Tukuy runakunata yanaparan shunqunmanta-pacha munar, chayrayku achka milagrokunata ruraran wakinkunapaq kusalata llakir (Marcos 1:40-42). Kusala allin runito kar tukuypaq llakiq. Tukuy runakuna payta uyapaqkunataqa consolaq, animachiq ima. Chaynullapis, tukuy runakunata kusalata munar qischakar wanuran, pero kusalata llakin payta kasuqkunapaqqa (liyiy Juan 15:13, 14).
MAS INTRAKASHUNLLAPA
Mas intrakashunllapa imanutaq Jesusqa karan, chaynullapis yaĉhakushun imanutaq nuqanchikkunapis llakipakuyta, wakinkunata yanapayta puytinchik ima nir.
4. Jesusqa Taytanta kusalata munaq
Jesusqa yaĉhachimaranchik imanutaq Taytanta munayta puytinchik nir. Liyiyllapa Lucas 6:12; Juan 15:10; 17:26 ima. Uklap uklap kay textokunata liyirqa, chaymantaqa kaykunamanta parlayllapa:
Jesús yupay, ¿imanutaq Taytanchik Jehová Diostaqa kusalata munayta puytinchik?
Jesusqa Taytanta kusalata munaq, cada día mañakuq ima.
5. Jesusqa tukuy runakunata llakiparan
Jesús paypi llakinanmantaqa ashwan mas wakinkunapaq llakiq, shaykusha karmapis tiemponta urquran wakinkunata yanapananpaq. Liyiyllapa Marcos 6:30-44, chaymantaqa kaykunamanta parlayllapa:
Kay textopi liyishanchiknu, ¿imatataq Jesusqa wakinkunapaq ruraran? (Rikayllapa versiculokuna 31, 34, 41, 42 ima).
¿Imapaqtaq Jesusqa chay runakunataqa yanaparan? (Rikayllapa versículo 34).
Jesús tukuy runakunata yanaparan nir yaĉhayqa, ¿imatataq Taytan Jehová Diosmanta yaĉhachimanchik?
Jesús yupay, ¿imakunatataq wakinkunapaq rurayta puytinchik?
6. Jesusqa wakinkunata yanaparan
Jesusqa mana masiaw imayjun karmapis wakinkunata yanaparan, chaynu nuqanchikkunapis wakinkunata yanapayta puytinchik. Liyiyllapa Hechos 20:35, chaymantaqa kaykunamanta parlayllapa:
Jesús nishannu, ¿imakunataq alegriyachimanchik?
VIDEOTA rikayllapa, chaymantaqa kaykunamanta parlayllapa:
¿Imanutaq wakinkunataqa yanapayta puytinchik mana achka imayjun karmapis?
¿Yaĉhayaraykichu?
Bibliaqa yaĉhachimanchik Taytanchik Jehová Diostaqa mañanapaq Jesuspa shutinpi (liyiyllapa Juan 16:23, 24). Chaynu, Jesustaqa yusul payji niyta puytishunllapa Taytanchik Jehová Diospaq amigon kanallapapaq yanapamashanchikpaq.
WAKINKUNAQA KAYNU YARPUNLLAPA: “Diosqa qischakaqta rikamarninchikmapis mana imatapis ruranchu”.
Jesusmanta kaypi yaĉhakushanchiknu, Taytan Jehová Diosqa, ¿chaynuchu kanqa?
KAYKUNATA YAĈHAKUSHANCHIK
Jesusqa kusalata Taytanta munan tukuy runakunatapis kabalta munan. Jesusqa Taytan yupay yarpun, chayrayku mas Jesusta riqsirqa, Taytan Jehová Diostapis mas riqsinki.
¿Imataq ninkiman?
Jesús yupay, ¿imanutaq Taytanchik Jehová Diostaqa tukuy shunqunchikwan munayta puytinchik?
Jesús yupay, ¿imanutaq wakinkunatapis llakipayta puytinchik?
¿Imataq mas gustashun Jesusmantaqa?
MAS YAĈHAKUNAYKIPAQ
Yaĉhakuy imatataq Jesús yupay rurayta puytinki nir.
“Imitemos el ejemplo de Jesús” (Jesús: el camino, la verdad y la vida, página 317)
Yaĉhakuy imapaqtaq Jesuspa shutinpi Diostaqa mañakuypaqllapa nir.
“¿Por qué orar en el nombre de Jesús?” (La Atalaya, 1 de febrero de 2008)
Bibliaqa ninchu imanutaq Jesuspa qaqllan, cuerpon ima karan nir. Kaypi liyiy.
¿Imanutaq Jesusqa warmikunata rikaq? Kaypi liyiy.
“Dios respeta y valora a la mujer” (La Atalaya, 1 de septiembre de 2012)