YAĈHAKUNA 15
¿Pitaq Jesusqa?
Jesustaqa kusala achka runakuna riqsinllapa. Pero achka runakuna-shuypaqa mana allita riqsinllapachu, shutinlata yaĉhanllapa, chayrayku ukta ukta Jesusmantaqa rimanllapa. Pero, ¿imataq nin Bibliaqa paymantaqa?
1. ¿Pitaq Jesusqa?
Jesusqa uk ángel kabal poderniyjun cielopi kawsan. Jehová Diosqa manaraq imatapis rurayar ruraran. Chayrayku, Bibliaqa nin: “Payta Diosqa puntata tukuy imakuna rurashankunamantaqa ruraran” nir (Colosenses 1:15, NWT). Jehová Diosqa Jesustaqa payla ruraran, chayrayku Bibliaqa shutichin Diospa ʻuklayla Wamranʼ nir (Juan 3:16). Jesusqa Taytan Jehová Diosta yanaparan tukuy imakunata rurananpaq (liyiy Proverbios 8:30). Chayrayku, paykunaqa kabalta munanakunllapa. Jesusqa Diospaq riman, chaymi shutichinchik Palabra nir (Juan 1:14).
2. ¿Imapaqtaq Jesusqa pachaman shamuran?
2.000 añona pasasha, Jehová Dios santo espiritunwan uk milagrota rurashanqa: payqa wamran Jesuspa vidanta uk warmi manaraq runawan punushapaq rurinman pasachiran. Chayrayku, Jesusqa naciran uk runa yupay (liyiy Lucas 1:34, 35). Payqa pachaman shamuran Cristo, Mesías kananpaq, tukuy runakunata washananpaq ima.a Biblia imataq paytaqa pasanqa nir rimayashanqa cumplikaran. Chayrayku, tukuy runakuna cuentata qukaranllapa payqa ʻDiospa Akrashan Criston, tukuy tiempopaq kawsaq Diospa Wamran’ karan nir (Mateo 16:16).
3. Kananqa, ¿maypitaq Jesusqa?
Kay pachapi wanutinqa, Taytan Jehová Diosqa uk wayrata yupay kawsachimuran, chaymantaqa cieloman tikrakaran. Chaypimi Diosqa kusala mandakuq kananpaq nisha (Filipenses 2:9). Chayrayku, kananqa Jesusqa uk mandakuq kusala poderniyjun, pero Jehová Diosla mas poderniyjun paymantaqa.
MAS INTRAKASHUNLLAPA
Mas allita intrakashunllapa pitaq Jesusqa karan, imapaqtaq kusala allin payta riqsinapaqqa ima nir.
4. Jesusqa mana uk Dios kusala poderniyjunchu
Jesusqa uk ángel kusala poderniyjun cielopi kawsan, Bibliaqa nin payqa Taytan Jehová Dioslata kasun, Jehová Diosqa Diosnin, Taytan ima. ¿Imapaqtaq chaynu ninchik? VIDEOTA rikayllapa yaĉhanaykillapapaq michka poderniyjuntaq Jesusqa, michka poderniyjuntaq Jehová Diosqa ima nir.
Kay textokunaqa yanapamashunllapa yaĉhanallapapaq michkatataq Jehová Dioswan Jesusqa munanakunllapa nir. Uklap uklap textokunata liyiyllapa, chaymantaqa kaykunamanta parlayllapa:
Liyiyllapa Lucas 1:30-32.
Ángel nishannu, ¿pipaq wamrantaq Jesusqa karan?
Liyiyllapa Mateo 3:16, 17.
Jesús bautizakatinqa, ¿imatataq cielomanta-pacha uyaparanllapa?
¿Pitaq rimasha kasha kanqa?
Liyiyllapa Juan 14:28.
Wasipiqa, ¿pitaq mas mandakun? ¿Uk tayta manaqachu wamran?
¿Imapaqtaq Jesusqa Jehová Diostaqa “Taytay” niran?
Liyiyllapa Juan 12:49.
Jehová Dioswan Jesusqa, ¿chayllachu? ¿Imatataq qamqa ninki?
5. Jesusqa Diospa akrashan Mesías karan
Unaymanta-pacha Bibliaqa rimayaranna pitaq Mesiasqa kanqa nir, paytaqa Diosqa akrasha karan tukuy runakunata washananpaq. VIDEOTA rikayllapa, imanutaq tukuy Biblia niyashanqa Jesús kay pachapi katin cumplikaran nir.
Kay textokunata liyiyllapa, chaymantaqa kaykunamanta parlayllapa:
Liyiyllapa Miqueas 5:2 yaĉhanaykillapapaq maypitaq Jesusqa nacinanpaq karan nir.b
Biblia niyashanqa, ¿cumplikaranchu? (Mateo 2:1).
Liyiyllapa Salmo 34:20; Zacarías 12:10 ima, mas allita yaĉhanaykillapapaq imanutaq akrakasha Mesiasqa wanunanpaq karan nir.
Kay Biblia niyashankunaqa, ¿cumplikaranchu? (Juan 19:33-37).
Chay Bibliapi niyashankuna cumplikananpaqqa, ¿imallataqa Jesusqa rurashachu kanqa?
Chayqa qampaqqa, ¿pitaq Jesusqa?
6. Jesusta allita riqsiyqa kusala allin
Bibliaqa allita yaĉhachimanchik pitaq Jesusqa karan, imapaqtaq Diosqa kay pachaman kaĉhamuran ima nir. Liyiyllapa Juan 14:6; 17:3 ima, chaymantaqa kaykunamanta parlayllapa:
¿Imapaqtaq Jesustaqa allita riqsishunman?
Jesusqa uk nan yupay yanapamanchik Diosman qimikanapaq, yaĉhachimaranchikpis ciertota kawsaq Diosta allita riqsinapaq. Chaynullapis, yanapamashun tukuy tiempo kawsayta puytinapaq.
WAKINKUNAQA KAYNU YARPUNLLAPA: “Jehová Diospa testigonkunaqa mana Jesuspi creyinllapachu”.
¿Imataq qamqa ninkiman?
KAYKUNATA YAĈHAKUSHANCHIK
Jesusqa uk ángel kusala poderniyjun, Diospa wamran, Diospa akrashan Mesías ima.
¿Imataq ninkiman?
¿Imapaqtaq ninchikllapa Jesusqa “Diospa punta wamran karan” nir?
¿Imatataq Jesusqa cielopi rurayaq manaraq pachaman shamuyarqa?
¿Imanutaq yaĉhanchik Jesusqa Diospa akrashan Mesías karan nir?
MAS YAĈHAKUNAYKIPAQ
Mas yaĉhakuy Jesusmanta, imapaqtaq Diospa akrashan Mesías karan nir.
“¿Prueban las profecías de la Biblia que Jesús fue el Mesías?” (Artículo de jw.org)
Imanutaq uk runa kay pachapi wamrakun, ¿chaynuchu Diosqa Jesustaqa wamrakuran? Kaypi liyiy.
“¿Por qué se le llama a Jesús el Hijo de Dios?” (Artículo de jw.org)
Yaĉhakuy imapaqtaq Dios, Jesús, santo espíritu ima mana chayllachu nir.
Yaĉhakuy imanutaq uk warmita allita Jesusmanta yaĉhakuyqa yanaparan nir.
“Una judía explica por qué se replanteó sus creencias” (¡Despertad!, mayo de 2013)
a Yaĉhakunakuna 26-wan 27-pi mas intrakashunllapa imapaqtaq tukuy runakuna Jesusqa washamanallapapaq ministiyaranchik, imanutaq washamaranchikllapa ima nir.