YAĈHAKUNA 26
¿Imapaqtaq saqra runakuna, qishaykuna ima kan?
Runakunaqa qischakarqa ninllapa, ¿imapaqtaq kayqa pasamayan nir? Pero Bibliaqa nimanchik imapaqtaq qischakayanchik nir.
1. ¿Pitaq culpayjun katin mana allinta kawsayta puytinchikchu?
Satanás diabloqa Jehová Diospaq contran tikrakaran. Paylata kasunanllapata munaran, chayrayku, Adanwan Evata engañaran ama Diosta kasunanllapapaqchu (Génesis 3:1-5). Satanasqa paykunata yarpuchiran Jehová Diosqa mana allin kawsananllapata munayanchu nir. Satanás diabloqa Evata niran Diosta kasurqa mana alegre kawsayta puytinqachu nir. Satanás diabloqa Evata mana wanunkichu nir willarqa, llullakuyaran. Bibliaqa Satanás diablopaq nin: “Tukuy llulla rimaqpaqa taytan” nir (Juan 8:44).
2. ¿Imatataq Adanwan Evaqa ruraranllapa?
Jehová Diosqa Adanwan Evataqa kusa shumaq imakunata quran. Chaynullapis, achka mikuyta quran, pero uk qirupa puquyninlata ama mikuyllapachu nir willaran (Génesis 2:15-17). Pero paykunaqa mana kasukurchu chay qirupa puquyninta mikuranllapa. Evaqa “chay qirupa puquyninta aypar mikuq qallariran”. Chaymanta, Adanpis “mikuq qallariran” (Génesis 3:6, NWT). Paykunaqa mana Diosta kasuranllapachu. Diosninchikqa Adanwan Evataqa mana uchayjuntachu ruraran, pero mana Diosta kasur uchakurqa, uchakuq runakunapaq tikrakaranllapa. Chayrayku, chaymanta-pacha kabalta qischakaq qallariranllapa (Génesis 3:16-19).
3. Adanwan Evaqa mana Diosta kasuranllapachu, chayrayku, ¿imanutaq kawsayanchikllapa?
Adanwan Eva mana Diosta kasurqa uchakuq runakunapaq tikrakaranllapa. Chayrayku, nuqanchinkkunapis uchayjunna nacinchikllapa. Bibliapis nin: “Chaymi Adán uchakushanmanta-pacha, tukuy nuqanchikkuna uchayjunllana kar wanunchikllapa” nir (Romanos 5:12).
Chayqa, ¿imapaqtaq qischakanchik? Nuqanchiklla saqra imakunata rurar manaqa wakinkuna saqra imakunata ruratin qischakanchik. Chaynullapis, qischakayta puytinchik mana allin tiempokuna katin (liyiy Eclesiastés 9:11).
MAS INTRAKASHUNLLAPA
Yaĉhakushun imapaqtaq Jehová Diosqa mana culpayjunchu saqra imakuna pasamashaqa, imanutaq Jehová Diosqa qischakaqta rikamarninchikqa sintiyanqa ima nir.
4. Pitaq culpayjun katin qischakanchikllapa
Achka runakunaqa Dios pachapiqa mandakuyan ninllapa. Pero, ¿chaynuchu kanqa? VIDEOTA rikayllapa.
Liyiyllapa Santiago 1:13; 1 Juan 5:19 ima, chaymantaqa kaykunamanta parlayllapa:
¿Jehová Dioschu culpayjun saqra imakuna pasamashaqa?
5. Satanás diablo kay pachapiqa mandakuyan
Liyiyllapa Génesis 3:1-6, chaymantaqa kaykunamanta parlayllapa:
Satanás diabloqa, ¿ima nirantaq Evataqa? (Rikay versiculokuna 4, 5 ima).
Satanás diabloqa, ¿ima nirantaq Diosmantaqa?
Satanás diabloqa niran mana Jehová Diosta ministinchikchu alegre kanapaqqa nir, ¿imaninkitaq qamqa?
Liyiyllapa Eclesiastés 8:9, chaymantaqa kaykunamanta parlayllapa:
Yaĉhakushanchiknu mana Jehová Dioschu kay pachapiqa mandakuyan, ¿imanutaq kawsashanchikllapa pay mana mandakutinqa?
Adanwan Evaqa mana uchayjunchu karanllapa, shumaq jardinpi kawsaqllapa ima, pero Satanás diablo nishanta kasurqa Diospaq contran tikrakaranllapa.
Chaymi Adán uchakushanmanta-pacha tukuy nuqanchikkunaqa uchayjun kanchikllapa, qischakanchikllapa, wanunchikllapa ima.
Jehová Diosqa uchanchikta, qischakayta, wanuyta ima tukchinqa. Runakunaqa manana uchayjunnachu kanqallapa, tukuy tiempopaqna shumaq pachapi kawsanqallapa ima.
6. Nuqanchik llakishaqa Jehová Diosqa llakin
¿Nuqanchik llakishaqa Diospis llakiyanqachu? Yaĉhakuy ima nirantaq mandakuq Davidwan apóstol Pedroqa. Liyiyllapa Salmo 31:7; 1 Pedro 5:7 ima, chaymantaqa kaykunamanta parlayllapa:
Jehová Dios llakipashuyan nir yaĉharqa, ¿imanutaq sintinki?
7. Jehová Diosqa tukuy qischakaykunata tukchinqa
Liyiyllapa Isaías 65:17; Apocalipsis 21:3, 4 ima, chaymantaqa kaykunamanta parlayllapa:
Jehová Diosqa arnimashanchik tukuy qischakaykunataqa tukchinqa nir, ¿chayta yaĉharqa alegriankichu? ¿Imapaqtaq?
¿Yaĉhayaraykichu?
Satanás diablo Evata engañarqa Jehová Diosmanta saqra imakunata rimaran, kusalata llullakur ima rimaran. Payqa niran Jehová Diosqa mana allin mandakuqchu nir. Pero Jehová Dios tukuy qischakaykunata tukchirqa, tukuy runakunata allita intrachinqa payqa kusala allin mandakuq nir. Chayqa, chaykunata rurarqa payqa tukuyta rikachimashun paypa gobiernonqa mas allin gobierno wakinkunamantaqa nir (Mateo 6:9, 10).
WAKINKUNAQA KAYNU NISHUNMANLLAPA: “Diosqa qischakar kawsanapaq ruramashanchik”.
¿Ima ninkitaq?
KAYKUNATA YAĈHAKUSHANCHIK
Qischakanchik, wanunchik ima Satanás diablo Adanwan Eva ima culpayjun katin, pero kusalata qischakashaqa Jehová Dios nuqanchikpaq llakin, chayrayku tukuy qischakaykunata tukchinqana.
¿Imataq ninkiman?
¿Ima nirtaq Satanás diabloqa Evata engañaran?
Adanwan Evaqa mana Diosta kasuranllapachu, chayrayku, ¿imanutaq kawsayanchikllapa?
¿Imapaqtaq ninchikllapa nuqanchik llakishaqa Jehová Diospis llakin nir?
MAS YAĈHAKUNAYKIPAQ
¿Imatataq Bibliaqa uchakuymanta nin? Kaypi liyiy.
Liyiy Satanás diablo llullakushanmanta mas yaĉhanaykipaq.
“¿Por qué permite Dios el sufrimiento?” (La Atalaya, 1 de enero de 2014)
Liyiy imanutaq Diosqa sintin runakuna wakinkunata wanuchitinqa nir.
“¿Por qué sucedió el Holocausto judío? ¿Por qué Dios no lo impidió?” (Artículo de jw.org)
Rikay uk runa qischakaqta imanutaq Bibliaqa yanaparan nir.