¿Jehová Diospa testigonkunaqa Jesús yaĉhachikushantachu rurar kawsanllapa?

Jehová Diospa testigonkunaqa Jesús yaĉhachikushankunata rurar kawsanillapa. ¿Imapaqtaq chaynu yarpunillapa? Yaĉhakushunllapa yaĉhachikushayllapataqa maymantataq urqunillapa, imapaqtaq Jehová Diospa testigonkuna shutinillapa, imanutaq ukniyllapa ukniyllapa llakipanakunillapa ima nir.

1. Jehová Diospa testigonkunaqa yaĉhachikushanllapataqa, ¿maymantataq urqunllapa?

Jesusqa Diosta niran: “Rimaynikiqami kusala chiqap” manaqa cierto (Juan 17:17). Jehová Diospa testigonkunaqa Jesús yupay tukuy yaĉhachikushayllapataqa Diospa palabranmanta urqunillapa. Jehová Diospa testigonkunaqa 1870 añopi shutiqllapa Bibliata estudiaqkuna. Paykuna allita Diospa palabranta estudiaq qallariranllapa, chayrayku paykunaqa Bibliamanta tukuy yaĉhakushankunataqa urquqllapa, wakin iglesiakuna mana Biblia niyashannuta yaĉhachikuyatinllapamapis. Chaynullapis, tukuy runakunata Bibliapi tarishankunata parlaq qallariranllapa ima.a

2. ¿Imapaqtaq Jehová Diospa testigonkuna shutinillapa?

Jehová Diosqa paymanta yaĉhachikuqkunata, payta adoraqkunata ima shutichin testigoykuna nir (Hebreos 11:4–12:1). Unay tiempopi Diosqa pueblontaqa niran: “Qamkunami testigoykunaqa kankillapa” nir (liyiy Isaías 43:10, NWT). Chaynullapis, Bibliaqa Jesuspaqqa nin: ʻAllita Taytan Diospaqqa intrachimanchikllapaʼ [Confianapaq Allin Testigo, NWT] nir (Apocalipsis 1:5). Chaymi 1931 añomanta-pacha Jehová Diospa testigonkuna shutinillapa, chaynullapis kusala alegre apanillapa chay shutitaqa.

3. Jehová Diospa testigonkunaqa, ¿imanutaq Jesús yupay munanakunllapa?

Jesusqa yaĉhakuqninkunata ayllunta yupay munaq (liyiy Marcos 3:35). Jehová Diospa testigonkunapis entero pachapi uk ayllula yupay kanillapa. Chayrayku, tukuy Diosta adoraqkunaqa “hermanonchik”, “hermananchik” ima (Filemón 1, 2, NWT). Chaynullapis, kaynu nir mandamashanchik: ‘Creyiq masikikunata llakipayllapa’ nir (1 Pedro 2:17). Jehová Diospa testigonkunaqa kusalata hermanoyllapata munar, entero pachapi qischakaqta rikarqa yanapanillapa.

MAS INTRAKASHUNLLAPA

4. Yaĉhachikushayllapataqa Bibliamanta lluqshichinillapa

Unay tiempopi Jehová Diosqa niran mas naypaq tiempopiqa Bibliataqa mas allita intrakankillapa nir. Liyiyllapa Daniel 12:4, chaymantaqa kaykunamanta parlayllapa:

• Diosta serviqkunaqa, ¿imatataq mas allita intrakanallapapaq karan?

Rikay imanutaq Charles Russell uk grupo Bibliata estudiaqkunawan allita Diospa palabranta intrakaranllapa nir. VIDEOTA rikayllapa, chaymantaqa kaykunamanta parlayllapa:

VIDEO: Se desentierra la verdad de la Biblia (7:45)

• Videopi rikashanchiknu, ¿imanutaq Charles Russell amigonkunawan Bibliataqa allita estudiaqllapa?

¿Yaĉhayaraykichu?

Unay mana intrakayashayllapataqa kananqa allita intrakanillapa. ¿Imapaqtaq? Diosqami palabrantaqa allmanta allmanta intrachimashallapa, imanutaq allmanta allmanta yurqar ritin mas allita rikakunchikllapa chaynu (liyiyllapa Proverbios 4:18). Bibliaqa unay may tiempomanta-pacha chaylla katinmapis allmanta allmanta mas allita intrakasha kanillapa.

5. Kusala alegre Jehová Diosmanta wakinkunata parlanillapa

VIDEO: Un nombre que nos identifica (2:40)

• ¿Imapaqtaq Jehová Diospa testigonkuna shutinillapa?

¿Imapaqtaq Jehová Diosqa runakunata akrasha paymanta yaĉhachikunanllapapaq? Achka runakuna Diosmantaqa llullakur purinllapa, chayrayku paypa yaĉhakuqninkunaqa paymanta allita rimar purinllapa. Yaĉhakushunllapa ima nirtaq Diosmantaqa rimanllapa llullakur puriqkunaqa nir.

Achka religionkunaqa Diostaqa yanqa dioskunawan adoraypaqllapa nir yarpunllapa. Pero, ¿chaynuchu kanqa? Liyiyllapa Levítico 26:1, chaymantaqa kaykunamanta parlayllapa:

• Kay textopi liyishanchiknu, ¿imataq nin Bibliaqa? ¿Imanutaq Diosqa sintin yanqa dioskunawan adorashaqa?

Wakin religionkunaqa Jesusqa Dios nir yaĉhachikunllapa. Pero, ¿chayqa ciertochu kanqa? Liyiyllapa Juan 20:17, chaymantaqa kaykunamanta parlayllapa:

• Kay textopi liyishanchiknu, ¿imataq nin Bibliaqa? ¿Dioswan Jesusqa chayllachu kanqa?

• Jehová Diosqa, payta mas allita riqsinaykipaq, wamranta allita riqsinaykipaq ima, paypa testigonkunata kaĉhamusha nir yaĉharqa, ¿imanutaq sintinki?

6. Ukniyllapa ukniyllapa munanakunillapa

Bibliaqa Diosta adoraqkunataqa cuerponchikpaq partenkunata yupay rikan. Liyiyllapa 1 Corintios 12:25, 26, chaymantaqa kaykunamanta parlayllapa:

• Jesús yaĉhachikushanta rurar kawsaqkunaqa, ¿imatataq ruraranllapa hermanonkunata qischakaqta rikarqa?

• Qam rikashaykinu, ¿imanutaq Jehová Diospa testigonkunaqa munanakunllapa?

Jehová Diospa testigonkunaqa hermanonkuna uklaw lugarmanta qischakaqta rikarqa dasla yanapanllapa. Imanutaq yanapanakunllapa nir yaĉhanaykipaqqa, VIDEOTA rikayllapa. Chaymantaqa kaykunamanta parlayllapa:

VIDEO: Haití hace frente al huracán Matthew (5:29)

• ¿Jehová Diospa testigonkunaqa ukninllapa ukninllapa munanakur yanapanakuyanqallapachu? ¿Imapaqtaq?

KAYKUNATA YAĈHAKUSHANCHIK

Jehová Diospa testigonkunaqa Jesús yaĉhachikushankunata ruranllapa. Uk ayllula yupay entero pachapi Diosta adoranllapa, tukuy yaĉhachikushankunata Bibliamanta lluqshichinllapa, chaynullapis tukuyta Jehová Diosmanta yaĉhachinllapa.

¿Imataq ninkiman?

• Jehová Diospa testigonkunaqa, ¿imapaqtaq chay shutita akrarayllapa?

• ¿Imanutaq ukniyllapa ukniyllapa munanakunillapa?

• Jehová Diospa testigonkunaqa, ¿Jehová Diostaqa pay munashannuchu adorayanqallapa? ¿Ima ninkitaq?

MAS YAĈHAKUNAYKIPAQ

Jehová Diospa testigonkunata mas riqsinaykipaqqa kay videota rikakuy.

Los testigos de Jehová: una historia de fe viva. Parte 1: Salen de la oscuridad (1:00:53)

Yaĉhakuy imanutaq Jehová Diospa testigonkunaqa yanqa religionkuna mana allin rimayashanta tarisha nir.

El pueblo de Dios glorifica su nombre (7:08)

Jehová Diospa testigonkunamanta mas yaĉhanayashaykitaqa kaypi tariyta puytinki.

“Preguntas frecuentes sobre los testigos de Jehová” (Sección de jw.org)

Steven kusa saqra imakunata rurayaq. Pero, ¿imanutaq yanaparan Jehová Diospa testigonkunata riqsiyqa? Kaypi yaĉhakuy.

“Mi vida iba de mal en peor” (La Atalaya, 1 de julio de 2015)